మెగాస్టార్ చిరంజీవి ప్రధాన పాత్రలో 'బింబిసార' ఫేమ్ మల్లిడి వశిష్ట దర్శకత్వంలో రూపుదిద్దుకుంటున్న భారీ బడ్జెట్ సోషియో-ఫాంటసీ చిత్రం 'విశ్వంభర'.
దాదాపు మూడేళ్ళ సుదీర్ఘ నిరీక్షణ తర్వాత ఈ సినిమా ఎట్టకేలకు ప్రేక్షకుల ముందుకు రావడానికి సిద్ధమవుతోంది. అయితే షూటింగ్ పనులు పూర్తి చేసుకున్నప్పటికీ, విజువల్ ఎఫెక్ట్స్ నాణ్యత విషయంలో మేకర్స్ ఎక్కడా రాజీ పడకూడదని భావిస్తుండటంతో సినిమా విడుదలపై పలు ఆసక్తికర చర్చలు జరుగుతున్నాయి.
* భారతీయ పురాణాలకు హాలీవుడ్ టచ్... జెన్-జీ కోసం గ్లోబల్ లెవెల్లో 'ఇతిహాస' ఫ్రాంచైజీ ప్రకటన
తాజా సమాచారం ప్రకారం, చిత్ర యూనిట్ జూలై 10ను అధికారికంగా లాక్ చేసింది. నిజానికి ఈ సినిమా సమ్మర్ రేసులో ఉండాల్సి ఉన్నప్పటికీ, భారీ చిత్రాల విడుదల, సాంకేతిక పనుల జాప్యం వల్ల వాయిదా పడుతూ వచ్చింది. ప్రస్తుతం జూన్ చివరి వారంలో రావాల్సిన ఇతర సినిమాలు, 'టాక్సిక్' వంటి భారీ చిత్రాలు వాయిదా పడటంతో జూలై రెండో వారం మెగాస్టార్కు సోలో రిలీజ్కు చక్కని అవకాశంగా మారింది. జూన్ 4న 'పెద్ది' రిలీజ్ డేట్ ఫిక్స్ కావడంతో నెల రోజుల గ్యాప్ తర్వాత చిరంజీవి బరిలోకి దిగే అవకాశాలు కనిపిస్తున్నాయి.
* ఫ్యాన్స్పై అంత ప్రేమ ఉంటే టికెట్లు ఫ్రీగా ఇవ్వాలి కదా!: స్టార్ హీరోలపై రవిబాబు షాకింగ్ కామెంట్స్
పురాణాల ప్రకారం విశ్వంలో ఉండేవని చెప్పే 7 ఊర్ధ్వ లోకాలు, 7 అధో లోకాలు.. అంటే మొత్తం 14 లోకాల నేపథ్యంతో ఈ సినిమా కథాంశం సాగుతుంది. కథ కేవలం భూలోకానికే పరిమితం కాకుండా, ఈ 14 లోకాలకు పొంచి ఉన్న ఏదో ఒక విపత్తును అరికట్టే దిశగా సాగుతుందని సమాచారం. ఒక సాధారణ వ్యక్తిగా కనిపించే చిరంజీవి పాత్ర, ఈ లోకాలన్నింటినీ రక్షించడానికి అతీత శక్తులతో ఎలా పోరాడింది? అనే అంశం ఉత్కంఠను కలిగిస్తుంది. చిరంజీవికి జోడీగా త్రిష నటిస్తుండగా, ఆషికా రంగనాథ్, కునాల్ కపూర్ కీలక పాత్రలు పోషిస్తున్నారు.