Telangana Janasena: జనసేనాని పవన్ కల్యాణ్ పై మంత్రి పొన్నం ప్రభాకర్, టీఆర్ఎస్ చీఫ్ కవిత చేసిన వ్యాఖ్యలకు తెలంగాణ జనసేన నేతలు కౌంటర్ ఇచ్చారు. పవన్ కల్యాణ్ ను అడ్డుకునే స్థాయి మీకు లేదని జనసేన నేత సాగర్ అన్నారు.

ఒక మంత్రిగా ఉండి పొన్నం ప్రభాకర్ పవన్ గురించి అలా మాట్లాడడం సరికాదన్నారు సాగర్. పిఠాపురం ప్రజలు పవన్ ను దేవుడిగా చూస్తున్నారని చెప్పారు. మాట్లాడితే.. పవన్ సినిమా నటుడు అంటున్నారని.. సినిమా నటుడు అయితే రాజకీయాల్లోకి రాకూడదా? అని నిలదీశారు. తెలంగాణ వచ్చి ఇన్నేళ్లైనా ఇంకా ఎందుకు పవన్ గురించి నెగిటివ్ గా మాట్లాడుతున్నారని మండిపడ్డారు.

”పవన్ కల్యాణ్ తెలంగాణకు వస్తున్నారంటే మంత్రులకు భయం మొదలైంది. ఆ భయంతోనే పొన్నం ప్రభాకర్ ఏం మాట్లాడుతున్నారో ఆయనకే అర్థం కావడం లేదు. జనసేన తెలంగాణలో మీటింగ్ పెట్టకూడదా? తెలంగాణ రాజకీయాల్లో మార్పులు రాబోతున్నాయి” అని సాగర్ అన్నారు.

పవన్ కొండగట్టుకి డబ్బులు ఇచ్చినప్పుడు ఎందుకు మాట్లాడలేదని అడిగారు. కవిత పార్టీలో ఏముందో తెలియదు కానీ ఆమె గెటప్ లో మాత్రం 2.0 కనిపిస్తుందని విమర్శించారు సాగర్. మేము ఎప్పటినుంచో పవన్ కల్యాణ్ వచ్చి మాట్లాడమని అడుగుతున్నాం, ఈ సమావేశానికి కచ్చితంగా అనుమతి వస్తుందని సాగర్ ధీమా వ్యక్తం చేశారు. రేపు పొద్దున అనుమతి రాకుంటే ఎలా ఉంటుందో చూద్దామన్నారు.

శంకర్ గౌడ్, జనసేన తెలంగాణ అధ్యక్షుడు..
”పవన్ కల్యాణ్ వస్తాడు అనగానే కవిత ఎందుకు భయపడుతున్నారు. రాజకీయాల్లో మీరు మాత్రమే ఉండాలా? కొత్త తరం ఉండకూడదా? ఏపీ 21 సీట్లు పోటీ చేస్తే అన్ని చోట్లా గెలిచాము. ఇక్కడ కూడా అలాగే గెలుస్తామని భయపడుతున్నారు. కచ్చితంగా జనసేనగా ఇక్కడ పోటీ చేస్తాము. గద్దర్ లాంటి వ్యక్తిని మీరు ఇంటి బయట నిలబెట్టారు. పవన్ కల్యాణ్ దేశానికి నేత అవుతాడని గద్దర్ చెప్పారు. మీ తండ్రి వేరే రాష్ట్రాల్లో పార్టీ పెట్టేందుకు పోయినప్పుడు ఎందుకు అడగలేదు” అని కవితను ప్రశ్నించారు తెలంగాణ జనసేన అధ్యక్షుడు శంకర్ గౌడ్.