కొండంత దేవుడిని దర్శించుకోవడానికి కొండలెక్కి వెళ్లడం ఒక ఎత్తయితే, నూరేళ్లు దాటిన వయసులో కాలినడకన ఆ స్వామి చెంతకు చేరడం భక్తి పరాకాష్టకు నిదర్శనం. ఆ అచంచల విశ్వాసమే 116 ఏళ్ల వయసులోనూ ఆ వృద్ధురాలిని అలిపిరి మెట్లపై నడిపించింది.

ప్రస్తుతం సోషల్ మీడియాలో వైరల్‌గా మారిన ఒక వీడియో అందరినీ ఆశ్చర్యంలో ముంచెత్తుతోంది. తన కుటుంబ సభ్యుల సహాయంతో అలిపిరి కాలిబాట గుండా కొండపైకి వెళ్తున్న ఈ బామ్మను చూసి స్థానికులు, ఇతర భక్తులు అబ్బురపడ్డారు. శారీరక బలహీనతలను సైతం పక్కనబెట్టి, కేవలం ఆ వేంకటేశ్వరస్వామిపై ఉన్న అపారమైన భక్తితోనే ఆమె అంతటి సాహస యాత్రకు పూనుకున్నారు.

సాధారణంగా యువకులే మెట్లు ఎక్కడానికి ఆయాసపడే ఈ రోజుల్లో, పండు ముసలి వయసులో ఆమె అలిపిరి(Tirumala) మార్గంలో నడుస్తున్న తీరు ప్రతి ఒక్కరినీ ఆకట్టుకుంటోంది. భక్తి ఉంటే కొండలైనా దాటవచ్చని, భగవంతుడిపై నమ్మకమే మనిషికి నడవడానికి కావలసిన అసలైన శక్తిని ఇస్తుందని ఈ బామ్మ నిరూపించారు. ఈ వీడియో చూసిన నెటిజన్లు ఆమె భక్తికి ముగ్ధులవుతూ “గోవిందా.. గోవిందా..” అంటూ కామెంట్లు పెడుతున్నారు.