శుక్రవారం ముల్లన్‌పూర్ వేదికగా గుజరాత్ టైటాన్స్‌తో జరిగిన క్వాలిఫయర్‌-2 మ్యాచ్‌లో వైభవ్ అద్భుతంగా ఆడాడు. 47 బంతుల్లోనే 8 ఫోర్లు, 7 సిక్సర్ల సాయంతో 96 పరుగులు చేసి రాజస్థాన్‌కు భారీ స్కోరు అందించాడు.

అయితే.. అతడి పోరాటం వృథా అయింది. ఎందుకంటే ఈ మ్యాచ్‌లో గుజరాత్ ఏడు వికెట్ల తేడాతో విజయం సాధించి ఫైనల్‌కు దూసుకువెళ్లింది. ఆదివారం (మార్చి 31న) అహ్మదాబాద్‌లోని నరేంద్ర మోదీ స్టేడియంలో రాయల్ ఛాలెంజర్స్ బెంగళూరుతో గుజరాత్ టైటాన్స్ కప్పు కోసం పోటీపడనుంది.

కాగా.. ఈ మ్యాచ్‌లో రాజస్థాన్ ఓడిపోయిన తరువాత వైభవ్ సూర్యవంశీ కలత చెందాడు. అతడు డగౌట్‌లో కన్నీళ్లు కూడా పెట్టుకున్నాడు. డగౌట్‌లో ఒంటరిగా కూర్చుని టవల్‌తో తన ముఖాన్ని కప్పుకున్నాడు. అంతేకాదు.. గుజరాత్ టైటాన్స్ ఆటగాళ్లతో కరచాలనం చేస్తున్నప్పుడు కూడా అతడి ముఖంలో నిరాశ చాలా స్పష్టంగా కనిపించింది. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.

ఇక మ్యాచ్ విషయానికి వస్తే.. తొలుత బ్యాటింగ్ చేసిన రాజస్థాన్ 20 ఓవర్లలో 6 వికెట్ల నష్టానికి 214 పరుగులు చేసింది. రాజస్థాన్ బ్యాటర్లలో వైభవ్ సూర్యవంశీ (96; 47 బంతుల్లో 8 ఫోర్లు, 7 సిక్సర్లు) తృటిలో శతకాన్ని చేజార్చుకున్నాడు. రవీంద్ర జడేజా (45; 35 బంతుల్లో 5 ఫోర్లు, 1 సిక్స్‌), డోనోవన్ ఫెరీరా (38నాటౌట్; 11 బంతుల్లో 2 ఫోర్లు, 4 సిక్సర్లు) లు రాణించారు. గుజరాత్ బౌలర్లలో కగిసో రబాడ, జేసన్ హోల్డర్ చెరో రెండు, సిరాజ్, ప్రసిద్ధ్ కృష్ణలు తలా ఓ వికెట్ తీశారు.

*Riyan Parag : నా వల్ల కాలేదు.. బుడ్డోడే కప్పును అందిస్తాడు.. రియాన్ పరాగ్ హాట్ కామెంట్స్‌..