పెళ్లి పీటలపై వేసిన ఏడడుగులు.. చివరకు మృత్యువుకు దారితీసిన కక్షల అడుగులయ్యాయి. పంతం, పరువు పేరిట రగిలిన రౌద్రం ఒక ఇల్లాలిని రక్తపు మడుగులో ముంచెత్తాయి.

పెళ్లి బంధాన్ని కాదని మరొకరితో సాగించిన సహజీవనం ఒకరి తప్పయితే.. ఆ తప్పును సరిదిద్దాల్సింది పోయి ప్రాణం తీసే స్థాయికి వెళ్లడం మరొకరి నేరమైంది. కట్టుకున్న భర్తను వదిలేసి వేరొకరితో కాపురం చేస్తూ కుటుంబ పరువు తీస్తోందన్న కక్షతో, భార్యపై ఇనుప రాడ్డుతో విచక్షణారహితంగా దాడి చేసి అంతమొందించిన ఉదంతం పామర్రులో తీవ్ర కలకలం రేపింది. ఈ కిరాతక హత్యకు పాల్పడిన భర్త మురళీకృష్ణతో పాటు అతనికి సహకరించిన సోదరులను గుడివాడ పోలీసులు వ్యూహాత్మకంగా అదుపులోకి తీసుకున్నారు. విలేకరుల సమావేశంలో డీఎస్పీ పి.శ్రీనివాస్ నిందితుల వివరాలను వెల్లడిస్తూ.. చట్టాన్ని చేతుల్లోకి తీసుకుని పరువు పేరుతో అరాచకాలకు పాల్పడే వారిపై రౌడీషీట్‌ తెరుస్తామని హెచ్చరించారు.

పథకం ప్రకారం పక్కాగా దాడిఈ దారుణ హత్య వెనుక భర్త మురళీకృష్ణ అమానవీయ కోణం దాగి ఉంది. తనతో కాపురం చేయకుండా మరో వ్యక్తితో ఉంటున్న భార్య ప్రసన్నకుమారి వల్ల కుటుంబ పరువు పోతోందని అతను ప్రతీకారంతో రగిలిపోయాడు. ఈ క్రమంలోనే ఈనెల 4వ తేదీ ఉదయం తన సోదరులైన రాంబాబు, నాగేశ్వరరావు (చంటి), రాంబాబు మైనర్ కుమారుడిని వెంటబెట్టుకుని రెండు ద్విచక్ర వాహనాలపై పామర్రు చేరుకున్నాడు. నిందితులు ప్రసన్నకుమారి మరొక వ్యక్తితో సహజీవనం చేస్తూ నివాసం ఉంటున్న ఇంటి తలుపులను బలవంతంగా బద్దలు కొట్టి లోపలికి ప్రవేశించారు. ఆమె తేరుకునే లోపే తమతో తెచ్చుకున్న ఇనుప రాడ్డుతో అతి కిరాతకంగా తలపై మోది విచక్షణారహితంగా దాడి చేశారు. ఈ దెబ్బలకు ఆమె అక్కడికక్కడే ప్రాణాలు విడిచింది.సాక్ష్యాల మాయంహత్య అనంతరం నిందితులు పోలీసుల కళ్లు గప్పి తప్పించుకునే ప్రయత్నం చేశారు. నేరానికి ఉపయోగించిన ఇనుప రాడ్డును, రక్తపు మరకలున్న తమ దుస్తులను గుడివాడ వెళ్లే మార్గంలో పొదల్లో పడవేసి పారిపోయారు. అయితే మృతురాలి తండ్రి గోళ్ల రాజారావు ఇచ్చిన ఫిర్యాదుతో దర్యాప్తు ప్రారంభించిన పోలీసు యంత్రాంగం.. శాస్త్రీయ ఆధారాలను సేకరించింది. పామర్రు సీఐ సీహెచ్‌ నాగప్రసాద్, ఎస్‌ఐ కె.శ్రీనివాస్‌ నేతృత్వంలోని బృందం నిందితుల కదలికలపై నిశిత నిఘా పెట్టింది. మంగళవారం సాయంత్రం కొత్తూరు సమీపంలో తాము దాచిన సాక్ష్యాలను వెతుక్కునేందుకు నిందితులు తిరిగి రావడంతో, పోలీసులు మెరుపు దాడి చేసి వారిని రెడ్ హ్యాండెడ్‌గా పట్టుకున్నారు.నిందితులపై రౌడీషీట్ నిందితుల నుంచి హత్యకు వాడిన ఇనుప రాడ్డు, రక్తపు మరకలున్న దుస్తులు, వారు వాడిన బైక్‌లను పోలీసులు సీజ్ చేశారు. ఈ సందర్భంగా డీఎస్పీ పి.శ్రీనివాస్‌ మాట్లాడుతూ.. చట్టాన్ని చేతుల్లోకి తీసుకుని, పరువు పేరుతో ఇలాంటి అరాచకాలకు పాల్పడే వారిని ఎట్టి పరిస్థితుల్లోనూ ఉపేక్షించబోమని స్పష్టం చేశారు. నిందితులపై కేవలం హత్య కేసు మాత్రమే కాకుండా, వారి కదలికలను నియంత్రించేందుకు రౌడీషీట్‌ తెరుస్తున్నట్లు ప్రకటించారు. కేవలం కొన్ని గంటల వ్యవధిలోనే కేసును చాకచక్యంగా ఛేదించి, సాక్ష్యాలతో సహా నిందితులను పట్టుకున్న సీఐ, సిబ్బందిని ఈ సందర్భంగా ఆయన ప్రత్యేకంగా అభినందించారు.