"ఆడు మగాడ్రా బుజ్జీ.. ఎవడైనా శ్రద్ధగా కొడతాడు, ఇష్టంగా కొడతాడు.. వీడు కసితో కొడుతున్నాడు" అనే 'అతడు' సినిమాలో డైలాగ్ గుర్తుందిగా ..

అలా ఈ వైభవ్ సూర్యవంశీ 38 బంతుల్లో 93 పరుగులు చేసి రాజస్థాన్ రాయల్స్ ను విజయం పథం వైపు నడిపించాడు. రాత్రి రాజస్థాన్ రాయల్స్, లక్నో సూపర్ జెయింట్స్ మధ్య జరిగిన మ్యాచ్ చూసిన ఎవరైనా ముక్కున వేలేసుకోవాల్సిందే, 'ఒరేయ్ బుజ్జీ.. ఆ కొట్టుడేంట్రా నాయనా!' అని అబ్బురపడాల్సిందే. 'వైభవేపోత' ఇన్నింగ్స్ ఆడాడు సూర్యవంశీ అనే 15 ఏళ్ల నూనూగు మీసాల కుర్రాడు.

'సిక్సర' పిడుగు.. ఊచకోత కోసేసాడు!

లఖ్‌నవూ నిర్దేశించిన 221 భారీ లక్ష్య ఛేదనలో రాజస్థాన్‌కు ఓపెనర్లు యశస్వి జైస్వాల్ (43), వైభవ్ సూర్యవంశీ గట్టి పునాది వేశారు. పవర్‌ప్లేలో జైస్వాల్ చెలరేగిపోతే, ఆ తర్వాత అసలు సిసలు విధ్వంసాన్ని వైభవ్ స్క్రీన్ పైకి తెచ్చాడు. 9వ ఓవర్లో ఆకాశ్ సింగ్ బౌలింగ్‌ను టార్గెట్ చేస్తూ.. ఒకే ఓవర్లో 6, 4, 4, 6, 4 చొప్పున ఏకంగా 26 పరుగులు పిండుకుని మ్యాచ్‌ను చేతుల్లోకి తీసుకున్నాడు. ఈ క్రమంలోనే కేవలం 23 బంతుల్లోనే తన హాఫ్ సెంచరీ మార్కును దాటేశాడు.

జురేల్ తో కలిసి జోరు.. మయాంక్ ఓవర్లో మోత!

జైస్వాల్ అవుటైన తర్వాత క్రీజులోకి వచ్చిన ధ్రువ్ జురేల్‌ (32)తో కలిసి వైభవ్ ఇన్నింగ్స్‌ను మరింత వేగవంతం చేశాడు. ముఖ్యంగా 12వ ఓవర్ వేసిన స్పీడ్‌స్టర్ మయాంక్ యాదవ్ బౌలింగ్‌ను ఈ జోడీ కుమ్మేసింది. తొలి మూడు బంతులకు జురేల్ 4, 6, 6 బాదితే.. ఆఖరి రెండు బంతులను వైభవ్ వరుస సిక్సర్లుగా మలిచాడు. ఆ ఓవర్లోనే ఏకంగా 29 పరుగులు రావడంతో లఖ్‌నవూ పూర్తిగా ఆత్మరక్షణలో పడిపోయింది.

విజయతీరాల్లో వైభవ్ అవుట్..

దిగ్వేశ్ సింగ్ వేసిన 13వ ఓవర్లోనూ ఒక ఫోర్, ఒక సిక్స్ బాది 92 పరుగులకు చేరుకున్న వైభవ్, ఆ మరుసటి ఓవర్లో 93 పరుగుల (38 బంతుల్లో) వ్యక్తిగత స్కోరు వద్ద రెండో వికెట్‌గా వెనుతిరిగాడు. సెంచరీ మిస్ అయినప్పటికీ.. అప్పటికే రాజస్థాన్ విజయానికి 42 బంతుల్లో కేవలం 44 పరుగులు మాత్రమే అవసరమైన అత్యంత సులువైన స్థితికి చేరింది. 13 ఓవర్లు ముగిసేసరికి 177/1 స్కోరుతో నిలిచిన రాజస్థాన్ రాయల్స్, వైభవ్ సూర్యవంశీ ఆడిన ఈ మైండ్ బ్లోయింగ్ ఇన్నింగ్స్ కృతజ్ఞతగా అద్భుత విజయాన్ని తన ఖాతాలో వేసుకుంది.

క్రికెట్ పిచ్‌పై కొందరు క్లాస్‌గా ఆడతారు.. మరికొందరు మాస్‌గా ఆడతారు. కానీ నిన్న రాత్రి లఖ్‌నవూ సూపర్ జయంట్స్‌తో జరిగిన మ్యాచ్‌లో రాజస్థాన్ రాయల్స్ యువ ఓపెనర్ వైభవ్ సూర్యవంశీ ఆడిన ఆట చూస్తే.. అటాకింగ్ అనే పదానికి కొత్త అర్థం చెప్పినట్టు అనిపించింది. కేవలం 38 బంతుల్లో 93 పరుగులు.. ఇందులో హాఫ్ సెంచరీ కేవలం 23 బంతుల్లోనే! అసలు క్రీజులో ఉన్నది కుర్రాడా లేక సిక్సర్ల పిడుగా అనే రేంజ్‌లో లఖ్‌నవూ బౌలింగ్ లైన్అప్‌ను చీల్చి చెండాడాడు.

టాప్ ఆర్డర్‌లో యశస్వి జైస్వాల్ లాంటి ఇంటర్నేషనల్ స్టార్ ఓ పక్కన ఉన్నా, మ్యాచ్‌లో లైమ్‌లైట్ మొత్తం వైభవ్ వైపే తిరిగింది. పవర్‌ప్లే ముగిసే వరకు కాస్త ఆచితూచి ఆడిన ఈ యువ సంచలనం, ఆ తర్వాత ఒక్కసారిగా గేర్ మార్చాడు. ముఖ్యంగా ఆకాశ్ సింగ్ వేసిన 9వ ఓవర్ మ్యాచ్‌కే హైలైట్.