ఇరాన్‌తో నడుస్తున్న యుద్ధంలో అమెరికా అధ్యక్షుడు డొనాల్డ్ ట్రంప్ దూకుడుకు అడ్డుకట్ట వేసేందుకు యూఎస్ సెనేట్ కీలక ముందడుగు వేసింది. కాంగ్రెస్ (పార్లమెంట్) అనుమతి లేకుండా ఇరాన్‌పై మరిన్ని సైనిక దాడులు చేయకుండా ట్రంప్‌ను నిరోధించేందుకు ఉద్దేశించిన 'వార్ పవర్స్ రిజల్యూషన్' (యుద్ధ అధికారాల తీర్మానం) సెనేట్ కమిటీ ఆమోదం పొందింది.

ట్రంప్ సొంత పార్టీ (రిపబ్లికన్)కి చెందిన నలుగురు సెనేటర్లు డెమొక్రాట్లతో చేతులు కలపడంతో ఈ తీర్మానం ముందుకు సాగింది. రిపబ్లికన్ సెనేటర్లు రాండ్ పాల్ (కెంటుకీ), సుసాన్ కొలిన్స్ (మైనే), లీసా ముర్కోవ్స్కీ (అలాస్కా), బిల్ కాసిడీ (లూసియానా)లు పార్టీ లైన్ దాటి డెమొక్రాట్లకు మద్దతు పలికారు. కాంగ్రెస్ ఆమోదం లేని ఈ యుద్ధాన్ని ముగింపు దశకు తీసుకురావడంలో ఇది మొదటి అడుగుగా రాజకీయ విశ్లేషకులు భావిస్తున్నారు. డెమొక్రాట్లలో సెనేటర్ జాన్ ఫెటర్‌మన్ (పెన్సిల్వేనియా) ఒక్కరే ఈ తీర్మానానికి వ్యతిరేకంగా ఓటు వేయడం గమనార్హం.

'యుద్ధం త్వరలోనే ముగుస్తుంది: ట్రంప్

ఒకవైపు సెనేట్ నుంచి ఒత్తిడి పెరుగుతున్నా.. అధ్యక్షుడు డొనాల్డ్ ట్రంప్ మాత్రం వ్యూహాత్మక ప్రకటనలు గుప్పిస్తున్నారు. ఇరాన్ తీవ్ర ఆర్థిక, రాజకీయ ఒత్తిడిలో ఉందని, వారే ఒప్పందం కోసం ఎంతగానో ఆరాటపడుతున్నారని ట్రంప్ పేర్కొన్నారు.

"మేము చాలా త్వరగా ఈ యుద్ధాన్ని ముగించబోతున్నాం. వారు (ఇరాన్) ఒప్పందం కోసం ఎంతగానో ఎదురుచూస్తున్నారు, ఎందుకంటే వారు ఈ పరిస్థితితో విసిగిపోయారు. ఈ పని గత 47 ఏళ్లలోనే జరిగి ఉండాల్సింది. ఇది చాలా వేగంగా జరగబోతోంది. దీనివల్ల అంతర్జాతీయ మార్కెట్లో చమురు ధరలు ఒక్కసారిగా పడిపోతాయి. మార్కెట్లో భారీగా చమురు నిల్వలు ఉన్నాయి. చమురు ధరలు పతనమైనా.. మన స్టాక్ మార్కెట్ మాత్రం ఆల్-టైమ్ హైలో దూసుకుపోతోంది." అని డొనాల్డ్ ట్రంప్ అన్నారు.

మరోవైపు, ఇరాన్‌పై మరో పెద్ద దాడికి తాము సిద్ధమయ్యామని, దాడి నిర్ణయానికి కేవలం గంట ముందు మాత్రమే దానిని వాయిదా వేసినట్లు ట్రంప్ వెల్లడించారు. యుద్ధాన్ని ముగించేందుకు "తీవ్రమైన చర్చలు" జరుగుతున్నాయని గల్ఫ్ దేశాలు వాషింగ్టన్‌కు హామీ ఇవ్వడంతో మంగళవారం నాటి దాడిని అమెరికా సైన్యం తాత్కాలికంగా వాయిదా వేసిందని ఆయన స్పష్టం చేశారు.

మరిన్ని 'విస్మయాలు' ఉంటాయన్న ఇరాన్...

అమెరికా హెచ్చరికలపై ఇరాన్ విదేశాంగ మంత్రి అబ్బాస్ అరాగ్చీ తీవ్రంగా స్పందించారు. గతంలో జరిగిన ఘర్షణల ద్వారా తాము సైనిక పరంగా ఎంతో అనుభవాన్ని, జ్ఞానాన్ని గడించామని ఆయన చెప్పారు. ఒకవేళ అమెరికా మళ్లీ యుద్ధానికి దిగితే.. ఈసారి మరిన్ని ఊహించని "సర్ప్రైజ్ (ఆశ్చర్యాలు)" ఎదుర్కోవాల్సి వస్తుందని హెచ్చరించారు. డొనాల్డ్ ట్రంప్ ఒప్పందం కోసం ఇరాన్‌కు 'రెండు మూడు రోజుల' సమయం ఇవ్వడం, చర్చల్లో ఇరుపక్షాల మధ్య పురోగతి ఉందని యూఎస్ డిప్యూటీ ప్రెసిడెంట్ జేడీ వాన్స్ ప్రకటించిన నేపథ్యంలో అరాగ్చీ వ్యాఖ్యలు ప్రాధాన్యత సంతరించుకున్నాయి.

తెరపైకి సంచలన నిజం...

న్యూయార్క్ టైమ్స్ కథనం ప్రకారం.. ఈ యుద్ధం ప్రారంభంలో అమెరికా, ఇజ్రాయెల్ గూఢచారీ సంస్థలు అత్యంత సంచలనమైన రహస్య వ్యూహాన్ని (రెజీమ్ చేంజ్ ప్లాన్) రచించాయి. యుద్ధం ఆరంభంలో ఇజ్రాయెల్ జరిపిన వైమానిక దాడుల్లో ఇరాన్ సుప్రీం లీడర్ (అయతొల్లా అలీ ఖమేనీ)తో పాటు కీలక అధికారులు మరణించిన సంగతి తెలిసిందే. ఆ సమయంలో "ఇరాన్ అంతర్గత శక్తులే" దేశాన్ని చేతుల్లోకి తీసుకోవాలని ట్రంప్ బహిరంగంగానే వ్యాఖ్యానించారు.