ఇరాన్‌పై ముందస్తుగా ప్లాన్ చేసిన సైనిక దాడిని తాత్కాలికంగా వాయిదా వేసినట్లు అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. ఖతార్, సౌదీ అరేబియా, యునైటెడ్ అరబ్ ఎమిరేట్స్ (UAE) వంటి గల్ఫ్ దేశాల అధినేతలు చేసిన ప్రత్యేక విజ్ఞప్తి మేరకే తాను ఈ నిర్ణయం తీసుకున్నట్లు ఆయన వెల్లడించారు.

"వాళ్లు వద్దనకపోతే ఈపాటికే ఇరాన్ ధ్వంసమయ్యేదే" అనే రీతిలో ట్రంప్ వ్యాఖ్యలు ఉండటం అంతర్జాతీయంగా తీవ్ర చర్చనీయాంశమైంది. ప్రస్తుతం ఇరు దేశాల మధ్య తీవ్ర స్థాయి చర్చలు జరుగుతున్నాయని ఆయన పేర్కొన్నారు.

తన 'ట్రూత్ సోషల్' వేదికగా స్పందించిన ట్రంప్, ఈ దాడిని మరో రెండు మూడు రోజులు వాయిదా వేస్తున్నట్లు సూచనప్రాయంగా తెలిపారు. ఇరాన్‌తో మధ్యవర్తిత్వ ప్రయత్నాలలో కొంత పురోగతి కనిపిస్తోందని, అయితే ఏ క్షణంలోనైనా తక్షణ యుద్ధానికి సిద్ధంగా ఉండాలని రక్షణ శాఖ మంత్రిని ఆదేశించినట్లు స్పష్టం చేశారు. ఒకవైపు చర్చలు జరుపుతూనే, మరోవైపు ముప్పు పొంచి ఉందనే సంకేతాలను ట్రంప్ ఇస్తున్నారు.

లొంగిపోయే ప్రసక్తే లేదు: ఇరాన్ అధ్యక్షుడు

ట్రంప్ వ్యాఖ్యలపై ఇరాన్ అధ్యక్షుడు మసౌద్ పెజెష్కియాన్ గట్టిగానే స్పందించారు. "చర్చలు అంటే లొంగిపోవడం కాదు" అని ఆయన స్పష్టం చేశారు. తమ దేశ సార్వభౌమత్వాన్ని, గౌరవాన్ని, జాతీయ హక్కులను కాపాడుకుంటూనే, పూర్తి అధికారంతో ఇరాన్ చర్చల ప్రక్రియలోకి అడుగుపెట్టిందని ఆయన ఇరాన్ వైఖరిని చాటిచెప్పారు.

ట్రంప్‌ ముందున్న మార్గాలివే..

అల్ జజీరాతో మాట్లాడిన అల్జీరియా మాజీ అమెరికా రాయబారి హెన్రీ ఎన్షర్, ఇరాన్ విషయంలో ట్రంప్ వైఖరిని విశ్లేషించారు. "ఇరాన్‌పై ట్రంప్‌కు ఉన్న సైనిక ప్రత్యామ్నాయాలన్నీ చాలా సంక్లిష్టమైనవి. ఒకవేళ అమెరికా చిన్నపాటి దాడి చేస్తే, దానివల్ల ఇరాన్ ప్రభుత్వానికి ఎలాంటి నష్టం జరగకపోగా తీవ్ర విమర్శలు ఎదుర్కోవాల్సి వస్తుంది. అదే పెద్ద ఎత్తున దాడికి దిగితే, అమెరికా సైనికుల ప్రాణాలకు భారీ ముప్పు వాటిల్లుతుంది. అందుకే, గల్ఫ్ దేశాలే స్వయంగా వచ్చి దాడిని ఆపమని కోరాలని ట్రంప్ ఆశించి ఉంటారు, ఎందుకంటే ఆయనకు కూడా ప్రస్తుతానికి యుద్ధం ఇష్టం లేదు" అని ఎన్షర్ పేర్కొన్నారు.

అమెరికాలో పెరుగుతున్న వ్యతిరేకత

మరోవైపు, ఇరాన్‌పై యుద్ధానికి, ఇజ్రాయెల్‌కు సైనిక సహాయం అందించడానికి అమెరికా ప్రజల నుండి మద్దతు తగ్గుతున్నట్లు 'ది న్యూయార్క్ టైమ్స్', 'సియెనా యూనివర్సిటీ' సంయుక్తంగా నిర్వహించిన సర్వేలో తేలింది. సర్వేలో పాల్గొన్న వారిలో కేవలం 30 శాతం మంది మాత్రమే ఇరాన్‌తో యుద్ధాన్ని సమర్థించగా, 64 శాతం మంది వ్యతిరేకించారు. అలాగే, ఇజ్రాయెల్‌కు సైనిక సాయం అందించడాన్ని 57 శాతం మంది తప్పుపట్టారు.