తాకట్టు నుంచి తిరిగి ఆలయానికి.. గుడివాడలో సంచలనం రేపిన "కిరీటం డ్రామా"

గుడివాడలోని శ్రీ కళ్యాణ వెంకటేశ్వర స్వామి టెంపులో బంగారు కిరీటం మాయం వ్యవహారం చివరకు భారీ వివాదానికి దారితీసింది.

మొదట కిరీటం తాకట్టు పెట్టలేదంటూ ఖండించిన ఆలయ ట్రస్టు సభ్యులు.. చివరకు ఒత్తిడి పెరగడంతో నిజాన్ని అంగీకరించాల్సి వచ్చింది. ప్రస్తుతం ఈ వ్యవహారం గుడివాడలోనే కాకుండా రాష్ట్రవ్యాప్తంగా చర్చనీయాంశమైంది.

ఎలా బయటపడింది?

గత ఏడాది దాత మట్టూరి సుబ్బారావు దంపతులు స్వామివారికి సుమారు రూ.75 లక్షలకు పైగా విలువైన బంగారు కిరీటాన్ని సమర్పించారు. అయితే ఇటీవల స్వామివారి దర్శనానికి వచ్చిన సుబ్బారావు.. కిరీటం కనిపించకపోవడంతో అనుమానం వ్యక్తం చేశారు.

ఆలయ ట్రస్టు సభ్యులను ప్రశ్నించగా.. వారు తొలుత "కిరీటం సురక్షితంగానే ఉంది.. ఎక్కడికీ పోలేదు" అంటూ వివరణ ఇచ్చినట్లు తెలుస్తోంది. కానీ సందేహం తీరకపోవడంతో దాత తీవ్రంగా నిలదీశారు.

పోలీసుల జోక్యంతో బయటపడిన నిజం

వివాదం ముదరడంతో పోలీసుల జోక్యం జరిగింది. విచారణలో అసలు విషయం వెలుగులోకి వచ్చింది. ఆలయ ట్రస్టు సభ్యులే ఆ బంగారు కిరీటాన్ని తాకట్టు పెట్టినట్లు తేలింది. దీంతో ట్రస్టు బోర్డు ఛైర్మన్‌పై, ఇతర సభ్యులపై కేసు నమోదు చేసినట్లు సమాచారం.

దేవాదాయశాఖ పరిధిలో అధికారిక నియంత్రణ లేకపోయినా.. విషయం తీవ్రత దృష్ట్యా అధికారులు కూడా విచారణ చేపట్టారు.

"కల్యాణ మండపం నిర్మాణం కోసమే"

వివాదం మరింత పెద్దది కావడంతో ట్రస్టు ఛైర్మన్ పోకూరి మోహన్ రావు చివరకు మీడియా ముందు కీలక వ్యాఖ్యలు చేశారు.

ఆర్యవైశ్య కల్యాణ మండప నిర్మాణ నిధుల కోసమే కిరీటాన్ని తాకట్టు పెట్టినట్లు అంగీకరించారు. "తప్పు జరిగింది.. క్షమించండి" అంటూ ప్రజలను, దాత కుటుంబాన్ని క్షమాపణ కోరారు.

అలాగే దాత కుటుంబంతో మాట్లాడి సంప్రోక్షణ అనంతరం కిరీటాన్ని మళ్లీ స్వామివారికి అలంకరిస్తామని ప్రకటించారు.

రాజస్థాన్ నుంచి రాత్రికి రాత్రే కిరీటం

వివాదంలో మరో సంచలన అంశం బయటపడింది. కిరీటాన్ని తాకట్టు పెట్టుకున్న వ్యాపారి రాజస్థాన్‌కు వెళ్లిపోయాడని సమాచారం. దీంతో ట్రస్టు సభ్యులు హుటాహుటీన అక్కడి నుంచి కిరీటాన్ని తిరిగి తెప్పించినట్లు తెలిసింది.

తర్వాత గుడివాడ పట్టణంలోని ఆర్యవైశ్య కల్యాణ మండపం ప్రాంగణంలో మీడియా ముందు ఆ కిరీటాన్ని ప్రదర్శించారు. అయితే ఇదే సమయంలో ట్రస్టు సభ్యుల ప్రవర్తనపై విమర్శలు వెల్లువెత్తాయి.