బ్రిటన్ విదేశాంగ కార్యదర్శి యెవెట్ కూపర్ అధ్యక్షతన జరిగే ఈ వర్చువల్ సమావేశం, "నౌకాయాన స్వేచ్ఛను పునరుద్ధరించడానికి, చిక్కుకుపోయిన ఓడలు, నావికుల భద్రతకు హామీ ఇవ్వడానికి, కీలకమైన వస్తువుల రవాణాను తిరిగి ప్రారంభించడానికి మనం తీసుకోగల అన్ని సాధ్యమైన దౌత్య, రాజకీయ చర్యలను అంచనా వేస్తుంది" అని బ్రిటన్ ప్రధాన మంత్రి కీర్ స్టార్మర్ అన్నారు.

వాణిజ్య నౌకలపై ఇరాన్ దాడులు, దాడుల ముప్పు కారణంగా పర్షియన్ గల్ఫ్‌ను ప్రపంచంలోని ఇతర సముద్రాలతో కలిపే ఈ జలమార్గంలో దాదాపు అన్ని రవాణాను నిలిపివేశాయి. ఇది ప్రపంచ చమురు ప్రవాహానికి కీలకమైన మార్గాన్ని మూసివేసి, పెట్రోలియం ధరలను ఆకాశానికి చేర్చింది. గురువారం జరిగే సమావేశానికి హాజరయ్యే దేశాలలో అమెరికా లేదు. జలమార్గాన్ని సురక్షితం చేయడం అమెరికా పని కాదని ట్రంప్ అన్నారు. అమెరికా మిత్రదేశాలతో "మీ చమురును మీరే వెతుక్కోండి" అని చెప్పారు.పోరాటం తీవ్రంగా జరుగుతున్నప్పుడు ఇరాన్ నౌకా విధ్వంసక క్షిపణులు, డ్రోన్లు, దాడి నౌకలు, మందుపాతరలతో నౌకలను లక్ష్యంగా చేసుకోగలనప్పుడు, ఏ దేశమూ బలవంతంగా జలసంధిని తెరవడానికి ప్రయత్నించడానికి సుముఖంగా ఉన్నట్లు కనిపించడం లేదు. "పోరాటం ఆగిపోయిన తర్వాత" నౌకాయానానికి భద్రత ఎలా కల్పించాలనే దానిపై చర్చించడానికి, కొన్ని దేశాలకు చెందిన సైనిక ప్రణాళికాకర్తలు త్వరలో సమావేశమవుతారని స్టార్మర్ బుధవారం చెప్పారు.ఈలోగా, యూకే, ఫ్రాన్స్, జర్మనీ, ఇటలీ, కెనడా, జపాన్, యునైటెడ్ అరబ్ ఎమిరేట్స్‌తో సహా 35 దేశాలు ఒక ప్రకటనపై సంతకం చేశాయి. జలసంధిని అడ్డుకునే ప్రయత్నాలను ఇరాన్ ఆపాలని డిమాండ్ చేస్తూ, జలమార్గం గుండా "సురక్షిత ప్రయాణాన్ని నిర్ధారించడానికి తగిన ప్రయత్నాలకు సహకరిస్తామని" ప్రతిజ్ఞ చేశాయి. గురువారం నాటి సమావేశం మొదటి అడుగుగా పరిగణించబడుతుంది. దీని తర్వాత వివరాలను ఖరారు చేయడానికి అధికారుల "కార్యనిర్వాహక స్థాయి సమావేశాలు" జరుగుతాయి.షిప్పింగ్‌ను పునఃప్రారంభించడం "సులభం కాదు" అని, భాగస్వామ్యంతో పాటు "సైనిక శక్తి, దౌత్య కార్యకలాపాల ఐక్య కూటమి" అవసరమని స్టార్మర్ అన్నారు.
'కోయలిషన్ ఆఫ్ ది విల్లింగ్'
ఈ అంతర్జాతీయ ప్రయత్నం ఆలోచన, ఆ యుద్ధంలో భవిష్యత్ కాల్పుల విరమణ తర్వాత ఉక్రెయిన్ భద్రతకు మద్దతుగా యూకే, ఫ్రాన్స్ నేతృత్వంలో ఏర్పాటు చేయబడిన అంతర్జాతీయ "కోయలిషన్ ఆఫ్ ది విల్లింగ్"ను గుర్తుచేస్తుంది. యూరప్ తన సొంత భద్రత కోసం మరింతగా కృషి చేయడానికి ముందుకు వస్తోందని ట్రంప్ పరిపాలనకు నిరూపించే ప్రయత్నంలో ఈ కూటమి ఒక భాగం. నాటో నుంచి అమెరికా వైదొలగవచ్చని ట్రంప్ మళ్లీ సూచించడంతో ఈ కూటమి మరోసారి సమావేశం కానుంది.