హైడ్రామా మధ్య బండి భగీరథ్ పేట్ బషీరాబాద్ పోలీసుల ముందు లొంగిపోయాడు. శనివారం రాత్రి సుమారు 8 గంటల ప్రాంతంలో కేంద్రమంత్రి బండి సంజయే తన కొడుకును పోలీసులకు స్వయంగా అప్పగించారు.

మైనర్ బాలికపై లైంగిక దాడి చేశాడనే ఫిర్యాదుతో భగీరథ్ పైన పేట్ బషీరా బాద్ పోలీసులు ఈనెల 8వ తేదీన పోక్సో కేసు నమోదు చేసిన విషయం తెలిసిందే. తనపైన పోక్సో కేసు నమోదైందన్న విషయం తెలిసిన దగ్గర నుండి అంటే గడచిన వారంరోజులుగా భగీరథ్ పరారీలో ఉన్నాడు.

కొడుకును అప్పగించిన సందర్భంగా సంజయ్ మాట్లాడుతు ''చట్టంపైన గౌరవంతోనే తన కొడుకును పోలీసులకు అప్పగించాను'' అని చెప్పారు. ''చట్టంముందు తన బిడ్డయినా సామాన్యుడైనా సమానమే'' అన్నారు. ''ఎవరైనా సరే చట్టానికి లోబడి ఉండాల్సిందే'' అని చెప్పారు. ''తమ కొడుకు ఏ తప్పూ చేయలేదని ఇప్పటికీ చెబుతున్నాడు'' అని గుర్తుచేశారు. ''ఫిర్యాదు నమోదుకాగానే స్టేషన్లో తానే కొడుకును అప్పగిద్దామని అనుకున్నాను'' అని తెలిపారు. లాయర్లను సంప్రదించి కొడుకుపైన ఆరోపణలను, కొడుకు వాదనను లాయర్ల ముందుంచినట్లు చెప్పారు.

తాము చూపించిన ఆధారాల ప్రకారం కొడుకుపైన నమోదైన కేసును కొట్టేస్తారని లాయర్లు చెప్పటంతోనే కొంత జాప్యం జరిగినట్లు చెప్పారు. అయితే ఇంకా జాప్యం చేయటం సరికాదన్న ఉద్దేశ్యంతోనే అబ్బాయిని లాయర్ల సమక్షంలో పోలీసులకు అప్పగించినట్లు తెలిపారు. న్యాయవ్యవస్ధపైన తనకు సంపూర్ణ విశ్వాసముందని సంజయ్ చెప్పారు.

డ్రామానేనా ?

హైడ్రామా మధ్య భగీరథ పోలీసులకు లొంగిపోయాడని అన్నది ఎందుకంటే లొంగిపోకపోతే పోలీసులు అరెస్టుచేస్తారని సంజయ్ కు అర్ధమైంది. బహుశా ఈ విషయాన్ని లాయర్లు సంజయ్ కు వివరించుంటారు. పోక్సో చట్టం ఎంత బలమైనదో అందులో దోషిగా తేలితే జరగబోయే పరిణామాలన్నింటినీ వివరించి ఉంటారు. పోలీసులకు దొరక్కుండా తప్పించుకుని తిరగటం కూడా నేరమే అన్న విషయాన్ని లాయర్లు సంజయ్ కు స్పష్టంగా చెప్పుంటారు.