సినీ నటుడు, టీవీకే అధినేత జోసెఫ్ విజయ్ తమిళనాడు రాజకీయాల్లో పెను సంచలనం సృష్టించారు. తమిళనాడు అసెంబ్లీ ఎన్నికల్లో విజయ్ నేతృత్వంలోని టీవీకే అతిపెద్ద పార్టీగా అవతరించింది.

విజయ్ పార్టీ తొలిసారి అసెంబ్లీ ఎన్నికల బరిలో నిలిచినప్పటికీ... మొత్తం 234 స్థానాలకు గానూ 108 స్థానాల్లో విజయం సాధించింది. దీంతో విజయ్ పేరు దక్షిణాదినే కాకుండా దేశవ్యాప్తంగా మారుమోగుతోంది. ఇదివరకు కేవలం సినిమాల ద్వారానే రికార్డులు క్రియేట్ చేసిన విజయ్... ఇప్పుడు పొలిటికల్ రికార్డు కూడా తన ఖాతాలో వేసుకున్నారు. టీవీకే పార్టీ విజిల్ మోత... దశాబ్దాలుగా తమిళ రాజకీయాలను శాసించిన డీఎంకే, అన్నాడీఎంకేలకు అధికారం దక్కుకుండా చేయడం ద్వారా చరిత్ర తిరగరాశారు.

అయితే విజయ్ తన వ్యక్తిగత జీవితాన్ని చాలా వరకు లో ప్రొఫైల్‌లో ఉంచారు. ఇప్పుడు రాజకీయ జీవితంలో ఉన్న విజయ్ గురించి అనేక ఆసక్తికర విషయాలు వెలుగుచూస్తున్నాయి. అందులో ఒకటి ఇప్పుడు మరోసారి చర్చనీయాంశంగా మారింది. అది విజయ్ వినియోగించే వాహనాలు అన్నింటికి ఒకే రకమైన నంబర్‌ ఉండటం. విజయ్‌ తన బీఎండబ్ల్యూ ఎలక్ట్రిక్ కారు, లెక్సస్ ఎల్‌ఎం, టయోటా వెల్‌ఫైర్ వంటి విలాసవంతమైన కార్లతో పాటు... రాజకీయ ర్యాలీల కోసం వాడిన బస్సుల నంబర్ ప్లేట్‌పై ''0277'' అనే ఒకే రకమైన నంబర్‌ను ఉంచడం గమనించవచ్చు. విజయ్ వాహనాలపై TN 14 AH 0277 (BMW), TN 14 AL 0277 (Lexus), TN 14 AM 0277 (Vellfire), TN 14 AS 0277 (టీవీకే ప్రచార బస్సు) నంబర్లు ఉన్నాయి. ఇది గతంలో సోషల్ మీడియాలో ఎన్నో ఊహాగానాలకు దారితీసింది.

అయితే దీని వెనక ఓ విషాదంతో కూడిన జ్ఞాపకం ఉంది. విజయ్ అభిమానుల్లో పలువురికి ఈ నంబర్‌ వెనక ఉన్న కారణం గురించి తెలుసు. విజయ్ చిన్నతనంలో మరణించిన తన చెల్లి విద్యకు నివాళిగా ఆ నంబర్‌ను తన వాహనాలకు ఉండేలా చూస్తారని చెబుతుంటారు. ఎందుకంటే... విద్య 1977 ఫిబ్రవరి 14న (14-02-1977) జన్మించారు. అయితే అంతుచిక్కని అనారోగ్య కారణంగా విద్య రెండేళ్ల వయసులోనే మరణించారు. చెల్లి మరణం విజయ్‌ను తీవ్రంగా ప్రభావితం చేసిందని, దాంతో అతను ఇంట్రోవర్ట్ మారిపోయాడని చెబుతారు.

విజయ్ తన దివంగత చెల్లెలి జ్ఞాపకార్థం తన కుమార్తెకు దివ్య సాషా (విద్య పేరును పోలి ఉండేలా) అని పేరు పెట్టాడని ఆయన తల్లి శోభనా చంద్రశేఖర్ గతంలో ఓ సందర్భంలో చెప్పారు.

చెల్లి చిన్నతనంలో మరణించడంతో... ఆ భావోద్వేగ బంధం కారణంగానే ఆమె పుట్టినరోజును ప్రతిబింబించేలా తన వాహనాలకు ''0277'' నంబర్ వాడుతుంటారని చాలా మంది అభిమానులు నమ్ముతారు. అంతేకాదు... ఇది విజయ్‌కి తన కుటుంబం పట్ల ఉన్న ప్రేమకు ప్రతీకగా నిలుస్తుంది.

అయితే కొన్ని సందర్బాల్లో విజయ్ తన వాహనాలకు వినియోగిస్తున్న నంబర్ ప్లేట్‌ గురించి జరిగిన చర్చ సమయంలో #TN140277 వంటి హ్యాష్‌ట్యాగ్‌లు ట్రెండింగ్‌లో నిలిచాయి. ఏది ఏమైనా ఇది విజయ్ తన సోదరికి హృదయాపూర్వక నివాళిగా, ఆమెను గుర్తుచేసుకుంటూ ఉన్నారనే సంకేతాలను ఇస్తుంది.

Read more news like this on telugu.timesnownews.com