బంగారం ధరలు జూన్ నెలలో భారీగా తగ్గుముఖం పట్టే అవకాశం ఉందని వార్తలు వస్తున్నాయి. దీనికి ప్రధాన కారణం డాలర్ విలువ బలపడటమే అని చెప్పవచ్చు. గడిచిన కొన్ని వారాలుగా గమనించినట్లయితే డాలర్ విలువ భారీగా పెరిగింది.

ఫలితంగా ఇన్వెస్టర్లు తమ పెట్టుబడులను బంగారం లాంటి సురక్షితమైన పెట్టుబడుల నుంచి అమెరికా జారీ చేసే ట్రెజరీ బాండ్స్ వైపు తరలిస్తున్నారు. ఫలితంగా బంగారానికి డిమాండ్ తగ్గడం చూడవచ్చు. బంగారం డిమాండ్ తగ్గే కొద్దీ కూడా ధరలు తగ్గుతాయని చెప్పవచ్చు. తాజాగా బంగారం ధరలు ఇలా ఉన్నాయి. 24 క్యారెట్ల 10 గ్రాముల బంగారం ధర రూ. 1,50,235 పలుకుతుండగా, 22 క్యారెట్ల 10 గ్రాముల బంగారం ధర రూ. 1,39,957 పలుకుతోంది. అలాగే 18 క్యారెట్ 10 గ్రాముల బంగారం ధర రూ. 1,14,510 పలుకుతోంది. పసిడి ధరలు కొన్ని నెలలుగా ఆల్ టైం రికార్డ్ స్థాయి నుంచి తగ్గుతూ వస్తున్నాయి. జనవరి 23వ తేదీన బంగారం ధర 1.83 లక్షల రూపాయల వద్ద ఆల్ టైం రికార్డును నమోదు చేయగా అక్కడి నుంచి సుమారు 35 వేల రూపాయలు తగ్గినట్లు చూడవచ్చు. అయితే బంగారం ధర అంతర్జాతీయ మార్కెట్లో గమనించినట్లయితే ప్రస్తుతం ఒక ఔన్స్ పసిడి ధర 4600 డాలర్ల వద్ద ట్రేడ్ అవుతోంది. ఒక దశలో గరిష్టంగా 5400 డాలర్ల వరకు బంగారం ధర దూసుకొని వెళ్ళింది.

The Wall Street Journal తాజాగా ప్రచురించిన ఒక కథనం ప్రకారం అమెరికాలో వడ్డీ రేట్లు పెరిగినట్లయితే బంగారంపై ఆకర్షణ తగ్గుతుందని పేర్కొంది. ఒకవేళ బంగారం పై ఇన్వెస్టర్లలో ఇంట్రెస్ట్ తగ్గినట్లయితే ధరలు తగ్గే అవకాశం ఉందని నిపుణులు అంచనా వేస్తున్నారు.

ఎందుకంటే వడ్డీ రేట్లు పెరిగినట్లయితే అమెరికా జారీ చేసే ట్రెజరీ బాండ్లపై వచ్చే రాబడి కూడా పెరుగుతుంది. అదే సమయంలో ఇన్వెస్టర్లు బంగారంలో పెద్ద మొత్తంలో ప్రాఫిట్ బుకింగ్‌కు దారితీస్తున్నారు. చాలామంది లాభాలను ఉపసంహరించుకునేందుకు ఆసక్తి చూపిస్తున్నారు. దీంతో బంగారానికి డిమాండ్ తగ్గుతున్నట్లు చూడవచ్చు. అలాగే భారత వంటి దేశాల్లో కూడా ధరలు ఎక్కువగా ఉన్న నేపథ్యంలో గోల్డ్ ఆభరణాలను కొనుగోలు చేసే వారి సంఖ్య భారీగా తగ్గింది. ఇది కూడా ధరలపై ప్రభావం చూపిస్తోంది.

ఇక జూన్ నెలలో బంగారం ధర 1.40 లక్షల రూపాయల వరకు వచ్చే అవకాశం ఉందని Times of India ఇటీవల ప్రచురించిన ఒక కథనంలో పేర్కొంది. Nuvama Professional Clients Group ఫారెక్స్, కమోడిటీ విభాగం అధిపతి అభిలాష్ తన అభిప్రాయాన్ని పేర్కొంటూ రాబోయే కొన్ని వారాల్లో బంగారం ధర కనిష్ట స్థాయిని అందుకునే అవకాశం ఉందని తెలిపారు. ప్రస్తుతం కరెక్షన్ దశ కొనసాగుతుందని, ఒకవేళ కరెక్షన్ దశ ముగిసిన తర్వాత బంగారం మళ్లీ పెరిగే అవకాశం ఉంటుందని ఆయన పేర్కొన్నారు.

Disclaimer: పై కథనం కేవలం సమాచారం కోసం మాత్రమే ఇవ్వబడింది. ఇది ఎట్టి పరిస్థితుల్లోనూ పెట్టుబడి లేదా వ్యాపార సలహాగా పరిగణించరాదు. స్టాక్ మార్కెట్లు, మ్యూచువల్ ఫండ్స్, క్రిప్టోకరెన్సీ, రియల్ ఎస్టేట్, బంగారం, వెండి వంటి విలువైన లోహాలు అన్ని పెట్టుబడి సాధనాలు లాభనష్టాలకు లోనవుతాయి. మీరు చేసే వ్యాపారాలు లేదా పెట్టుబడుల వల్ల కలిగే లాభనష్టాలకు టైమ్స్ నౌ తెలుగు ఎలాంటి బాధ్యత వహించదు. పెట్టుబడి లేదా ఆర్థిక నిర్ణయాలు తీసుకునే ముందు, మీ సర్టిఫైడ్ ఆర్థిక సలహాదారులను సంప్రదించమని టైమ్స్ నౌ తెలుగు పాఠకులకు సూచిస్తోంది.

Read more news like this on telugu.timesnownews.com