IPL 2026 SRH vs KKR: ఐపీఎల్ 2026 సీజన్‌లో మొదటి విజయం కోసం 7 మ్యాచుల దాకా వేచి చూసిన కోల్‌కత్తా నైట్ రైడర్స్, వరుసగా మూడో విజయం అందుకుని.. ప్లేఆఫ్స్ రేసులోకి దూసుకొచ్చింది.

హైదరాబాద్‌లో సన్‌రైజర్స్ హైదరాబాద్‌తో మ్యాచ్‌లో 7 వికెట్ల తేడాతో ఈజీ విక్టరీ అందుకుంది కోల్‌కత్తా నైట్ రైడర్స్.

ఓపెనర్లు ఫిన్ ఆలెన్, కెప్టెన్ అజింక్యా రహానే కలిసి తొలి వికెట్‌కి 4 ఓవర్లలో 49 పరుగుల భాగస్వామ్యం జోడించారు. 13 బంతుల్లో 3 ఫోర్లు, 2 సిక్సర్లతో 29 పరుగులు చేసిన ఫిన్ ఆలెన్‌ని ప్యాట్ కమ్మిన్స్ అవుట్ చేశాడు.

• రఘువంశీ హాఫ్ సెంచరీ..

అజింక్యా రహానే 36 బంతుల్లో 4 ఫోర్లు, ఓ సిక్సర్‌తో 43 పరుగులు చేశాడు. రహానేని షకీబ్ హుస్సేన్ అవుట్ చేశాడు. అంగ్‌క్రిష్ రఘువంశీ 47 బంతుల్లో 5 ఫోర్లు, 2 సిక్సర్లతో 59 పరుగులు చేశాడు. రఘువంశీని శివంగ్ కుమార్ పెవిలియన్ చేర్చాడు. అయితే అప్పటికే మ్యాచ్ కేకేఆర్ చేతుల్లోకి వెళ్లిపోయింది. రింకూ సింగ్ 22 పరుగులు చేసి మ్యాచ్‌ని ముగించాడు.

అంతకుముందు టాస్ గెలిచి, తొలుత బ్యాటింగ్ చేసిన సన్‌రైజర్స్ హైదరాబాద్ 19 ఓవర్లలో 165 పరుగులకి ఆలౌట్ అయ్యింది.

ఓపెనర్లు అభిషేక్ శర్మ, ట్రావిస్ హెడ్ కలిసి ఎప్పటిలాగే దూకుడుగా ఇన్నింగ్స్ ఆరంభించారు. 3.3 ఓవర్లలోనే 44 పరుగులు చేసింది సన్‌రైజర్స్ హైదరాబాద్. 10 బంతుల్లో ఓ ఫోర్, ఓ సిక్సర్‌తో 15 పరుగులు చేసిన అభిషేక్ శర్మను కార్తీక్ త్యాగి అవుట్ చేశాడు. ఆ తర్వాత ట్రావిస్ హెడ్, ఇషాన్ కిషన్ కలిసి రెండో వికెట్‌కి 61 పరుగుల భాగస్వామ్యం నెలకొల్పారు.

• ట్రావిస్ హెడ్ హాఫ్ సెంచరీ చేసినా...

9 ఓవర్లలో 105 పరుగులు చేసింది సన్‌రైజర్స్ హైదరాబాద్. 28 బంతులను ఫేస్ చేసిన ట్రావిస్ హెడ్ 9 ఫోర్లు, 3 సిక్సర్లతో 61 పరుగులు చేసి.. సీజన్‌లో మరో హాఫ్ సెంచరీ నమోదు చేశాడు. అయితే ట్రావిస్ హెడ్‌ని వరుణ్ చక్రవర్తి అవుట్ చేశాడు. అక్కడి నుంచి వరుస వికెట్లు కోల్పోయింది సన్‌రైజర్స్ హైదరాబాద్.

8 బంతుల్లో ఓ ఫోర్, ఓ సిక్సర్‌తో 11 పరుగులు చేసిన హెన్రీచ్ క్లాసిన్‌ని కామెరూన్ గ్రీన్ పెవిలియన్ చేర్చాడు. తొలిసారి తుది జట్టులోకి వచ్చిన స్మరణ్ రవిచంద్రన్ ఓ ఫోర్ బాది వరుణ్ చక్రవర్తి బౌలింగ్‌లో అవుట్ అయ్యాడు.

అనికేత్ వర్మ 7 పరుగులు చేసి వరుణ్ చక్రవర్తి బౌలింగ్‌లోనే పెవిలియన్ చేరగా సలీల్ అరోరా 6 బంతుల్లో 2 పరుగులు చేసి సునీల్ నరైన్ బౌలింగ్‌లో క్లీన్ బౌల్డ్ అయ్యాడు. 29 బంతుల్లో 4 ఫోర్లు, 2 సిక్సర్లతో 42 పరుగులు చేసిన ఇషాన్ కిషన్‌ని సునీల్ నరైన్ అవుట్ చేశాడు.

ఓ సిక్సర్ బాదిన ప్యాట్ కమ్మిన్స్, అనుకుల్ రాయ్ బౌలింగ్‌లో అతనికే క్యాచ్ ఇచ్చి అవుట్ అయ్యాడు. శివంగ్ కుమార్ 1, హర్షల్ పటేల్ 6 పరుగులు చేశారు. కోల్‌కత్తా నైట్ రైడర్స్ బౌలర్లలో సునీల్ నరైన్, కార్తీక్ త్యాగి రెండేసి వికెట్లు తీశారు. వైభవ్ అరోరా, కామెరూన్ గ్రీన్, అనుకుల్ రాయ్ తలా ఓ వికెట్ తీశారు. వరుణ్ చక్రవర్తి 3 వికెట్లు తీసి, సన్‌రైజర్స్ హైదరాబాద్‌ బ్యాటింగ్‌ని దెబ్బ తీశాడు.