టాపార్డర్ బ్యాటర్లు అట్టర్ ఫ్లాప్ కావడంతో టాస్ ఓడి తొలుత బ్యాటింగ్ చేసిన సన్‌రైజర్స్ హైదరాబాద్ జట్టు, నిర్ణీత 20 ఓవర్లలో 9 వికెట్లు కోల్పోయి 157 పరుగులు చేసింది.

మొదటి ఓవర్‌ ఆఖరి బంతికి అభిషేక్ శర్మను డకౌట్ చేసిన మహ్మద్ షమీ, రెండో ఓవర్‌లో స్టార్ బ్యాటర్ ట్రావిస్ హెడ్‌ని కూడా అవుట్ చేశాడు. ఇషాన్ కిషన్ 1 పరుగు చేసి, ప్రిన్స్ యాదవ్ బౌలింగ్‌లో క్లీన్ బౌల్డ్ అయ్యాడు. 20 బంతులు ఆడి ఓ సిక్సర్‌తో 14 పరుగులు చేసిన లియామ్ లివింగ్‌స్టోన్, దిగ్వేష్ సింగ్ రతి బౌలింగ్‌లో అవుట్ అయ్యాడు. 26 పరుగులకే 4 వికెట్లు కోల్పోయింది సన్‌రైజర్స్ హైదరాబాద్..

• షమీ టాప్ క్లాస్..

మొదటి ఓవర్‌లో 1 పరుగు మాత్రమే ఇచ్చిన మహ్మద్ షమీ, రెండో ఓవర్‌లో కూడా ఒకే పరుగు ఇచ్చాడు. తన మూడో ఓవర్‌లో 4 పరుగులు మాత్రమే ఇచ్చిన మహ్మద్ షమీ, ఇన్నింగ్స్ 9వ ఓవర్‌లో మళ్లీ బౌలింగ్‌కి వచ్చి 2 సింగిల్స్ మాత్రమే ఇచ్చాడు.

ఓవరాల్‌గా 4 ఓవర్లలో 9 పరుగులు మాత్రమే ఇచ్చిన మహ్మద్ షమీ 2 వికెట్లు పడగొట్టాడు. మహ్మద్ షమీకి తోడు ప్రిన్స్ యాదవ్, దిగ్వేష్ సింగ్ రతి టాప్ క్లాస బౌలింగ్ పర్ఫామెన్స్ కారణంగా పవర్ ప్లేలో 22/3 స్కోరు మాత్రమే చేయగలిగింది సన్‌రైజర్స్ హైదరాబాద్ జట్టు. 10 ఓవర్లు ముగిసే సమయానికి 35/4 స్కోరు మాత్రమే వచ్చింది.

అరవీర భయంకర బ్యాటర్లు, విధ్వంసక ప్లేయర్లు ఉన్న సన్‌రైజర్స్ హైదరాబాద్, 2 ఓవర్లలో చేసే 35 పరుగులు చేయడానికి, 10 ఓవర్లు పట్టింది.

• ఆదుకున్న నితీశ్ - క్లాసిన్ భాగస్వామ్యం...

26 పరుగులకే 4 వికెట్లు కోల్పోయిన సన్‌రైజర్స్ హైదరాబాద్‌ని నితీశ్ కుమార్ రెడ్డి, హెన్రీచ్ క్లాసిన్ కలిసి ఆదుకున్నారు. ఈ ఇద్దరూ ఐదో వికెట్‌కి 116 పరుగుల భాగస్వామ్యం నెలకొల్పారు. 33 బంతుల్లో 3 ఫోర్లు, 5 సిక్సర్లతో 56 పరుగులు చేసిన నితీశ్ కుమార్ రెడ్డిని మణిమారన్ సిద్ధార్థ్ అవుట్ చేశాడు.

41 బంతుల్లో 5 ఫోర్లు, 2 సిక్సర్లతో 62 పరుగులు చేసిన హెన్రీచ్ క్లాసిన్‌ని అవుట్ చేసిన ఆవేశ్ ఖాన్, తర్వాతి బంతికి హర్ష్ దూబేకి క్లీన్ బౌల్డ్ చేశాడు. శివంగ్ కుమార్ 5 పరుగులు చేయగా హర్షల్ పటేల్ 4 పరుగు చేసి రనౌట్ అయ్యాడు. మిడిల్ ఓవర్లలో నితీశ్, క్లాసిన్ కారణంగా పరుగులు రాబట్టిన హైదరాబాద్, డెత్ ఓవర్లలో మళ్లీ వరుస వికెట్లు కోల్పోయింది.

లక్నో సూపర్ జెయింట్స్ బౌలర్లలో మహ్మద్ షమీ, ప్రిన్స్ యాదవ్, ఆవేశ్ ఖాన్ రెండేసి వికెట్లు తీశారు. దిగ్వేష్ సింగ్ రతి, మణిమారన్ సిద్ధార్థ్ చెరో వికెట్ తీశారు.

Read more news like this on telugu.timesnownews.com