నిరుద్యోగులకు రాష్ట్రప్రభుత్వం గుడ్ న్యూస్ చెప్పింది. ఉద్యోగ నియామకాల్లో గరిష్ఠ వయోపరిమితిని పెంచుతూ కీలక నిర్ణయం తీసుకుంది. తెలంగాణ రాష్ట్ర ప్రభుత్వం ప్రత్యక్ష నియామకాల (Direct Recruitment)లో గరిష్ట వయోపరిమితిని 10 సంవత్సరాలు పెంచుతూ కీలక నిర్ణయం తీసుకుంది.

తెలంగాణ రాష్ట్రంలో ప్రత్యక్ష నియామకాల్లో ప్రస్తుతం ఉన్న 34 ఏళ్ల గరిష్ఠ వయోపరిమితిని 44 ఏళ్లకు పెంచింది. ఈ మేరకు సాధారణ పరిపాలన శాఖ (Services-A) ఉత్తర్వులు జారీ చేసింది. ఈ సడలింపు ఒక సంవత్సరం పాటు అమల్లో ఉంటుంది.

రాష్ట్రంలోని వివిధ నియామక సంస్థలు చేపట్టబోయే నియామకాలకు ఈ నిర్ణయం వర్తించనుంది. అయితే ఈ రాష్ట్రంలో ఉద్యోగ నియామకాల్లో గరిష్ఠ వయోపరిమితి నిబంధన పోలీస్ శాఖ ,ఎక్సైజ్ శాఖ,ఫైర్ శాఖ,జైళ్ల శాఖ,అటవీ శాఖతో పాటు ఫిజికల్ స్టాండర్డ్స్ ఉన్న యూనిఫాం సర్వీసులకు ఈ సడలింపు వర్తించదని ప్రభుత్వం స్పష్టం చేసింది. నిరుద్యోగ యువత నుంచి వయోపరిమితి పెంపునకు సంబంధించి వినతులు వచ్చిన నేపథ్యంలో ఈ నిర్ణయం తీసుకున్నట్లు ప్రభుత్వం తెలిపింది.

తెలంగాణ రాష్ట్రం ఏర్పడిన తర్వాత ప్రభుత్వ ఉద్యోగాలకు గరిష్ఠ వయోపరిమితిని పదేళ్ల పాటు సడలించారు. ఆ తర్వాత మరో రెండేళ్ల పొడగించారు. ప్రస్తుతం ఆ గడువు ముగియడంతో ప్రభుత్వం మరో ఏడాది పొడిగిస్తూ ఉత్తర్వులు జారీ చేసింది. తెలంగాణ రాష్ట్రంలోని వివిధ నియామక సంస్థలు విడుదల చేసే నోటిఫికేషన్లకు ఈ వయోసడలింపు వర్తిస్తుందని ఉత్తర్వుల్లో పేర్కొన్నారు.

తెలంగాణ రాష్ట్ర అండ్‌ సబార్డినేట్‌ సర్వీస్‌ రూల్స్, 1996 ప్రకారం, రాష్ట్రంలో ప్రభుత్వ ఉద్యోగాలకు దరఖాస్తు చేసుకునే అభ్యర్థుల గరిష్ట వయోపరిమితి 34 ఏళ్లుగా నిర్ణయించారు. అయితే నిరుద్యోగుల అభ్యర్థనను పరిగణలోకి తీసుకున్న రాష్ట్ర ప్రభుత్వ, రాబోయే ఒక ఏడాది కాలంలో ఇచ్చే నోటిఫికేషన్లకు పదేళ్ల వయసు అదనపు సడలింపును ప్రకటించింది. ఈ కొత్త జీఓ ప్రకారం, ఓపెన్ కేటగిరి అభ్యర్థులు 44 ఏళ్ల వయసు వరకు పోటీ పడవచ్చు. ఎస్సీ, ఎస్టీ, బీసీ, ఇతర రిజర్వేషన్ వర్గాలకు దీనితో పాటు అదనంగా ఆయా కేటగిరీలో వారిగా సడలింపు ఉంటుంది.