రామ్ చరణ్ హీరోగా బుచ్చిబాబు సన దర్శకత్వంలో తెరకెక్కుతున్న మూవీ 'పెద్ది'. జూన్ 4న విడుదల అవుతున్న ఈ సినిమాపై టాలీవుడ్‌లో భారీ అంచనాలే ఉన్నాయి.

గ్లింప్స్, టీజర్, ట్రైలర్‌తో సినిమాపై అంచనాలను అంతకంతకూ పెంచుతూ పోతున్నాడు డైరెక్టర్ బుచ్చిబాబు సన. ప్రమోషన్స్‌లోనూ ఏ మాత్రం తగ్గకుండా 'రంగస్థలం కంటే గొప్ప సినిమా' అనే రేంజ్ ఎలివేషన్స్ ఇస్తున్నాడు రామ్ చరణ్. కన్నడ స్టార్ నటుడు శివరాజ్‌కుమార్ కీలక పాత్రలో నటిస్తున్న 'పెద్ది' మూవీలో జాన్వీ కపూర్ హీరోయిన్. 'మీర్జాపూర్' ఫేమ్ దివ్యేందు శర్మ, 'పెద్ది' మూవీలో విలన్‌గా నటిస్తున్నాడు.

• 'పెద్ది' ఆఫర్ రిజెక్ట్ చేసిన స్వాసిక..

మలయాళంలో వరుస సినిమాలు చేసిన స్వాసిక, 'పెద్ది' మూవీ ఆఫర్‌ని రిజెక్ట్ చేశానంటూ చేసిన కామెంట్లు, సోషల్ మీడియాలో తెగ వైరల్ అవుతున్నాయి.

''నాకు తెలుగులో రామ్ చరణ్ 'పెద్ది' మూవీ నుంచి ఆఫర్ వచ్చింది. అయితే వెంటనే నేను నో చెప్పాను. ఎందుకంటే మూవీలో రామ్ చరణ్ తల్లి క్యారెక్టర్ చేయాలని అడిగారు. అందుకే ఆఫర్‌ని రిజెక్ట్ చేశాను. ఎందుకంటే నాకు ఇప్పుడు 34 ఏళ్లు. హీరో వయసు కంటే చిన్నదాన్ని. అయినా నాకు అప్పుడే తల్లి క్యారెక్టర్లు చేసే వయసు వచ్చిందని అనుకోవడం లేదు.. అందుకే మదర్ క్యారెక్టర్ చేయడానికి ఒప్పుకోలేదు...' అంటూ కామెంట్ చేసింది స్వాసిక.. ఈ వ్యాఖ్యలతో స్వాసిక గురించి టాలీవుడ్ అభిమానుల్లో చర్చ మొదలైంది..

• ఎవరీ స్వాసిక..

స్వాసిక అసలు పేరు పూజా విజయ్. తమిళ సినిమా 'వాగాయ్' మూవీతో కెరీర్ మొదలుపెట్టి, ఆ తర్వాత టీవీ హోస్ట్‌గా మారింది. స్వాసికగా పేరు మార్చుకుని, సీరియల్ నటిగా, సినిమా నటిగా మంచి గుర్తింపు తెచ్చుకుంది.. మలయాళంతో పాటు తమిళ సినిమాల్లోనూ నటించింది. తెలుగులో అప్పుడెప్పుడో 2012లో 'ఎటు చూసినా నువ్వే' అనే చిన్న సినిమాలో హీరోయిన్‌గా నటించింది. ఆ మూవీ హిట్ కాకపోవడంతో స్వాసికకి తెలుగులో అవకాశాలు రాలేదు.

నితిన్ హీరోగా తెరకెక్కిన 'తమ్ముడు' మూవీలో విలన్ రోల్ చేసింది... 'తమ్ముడు' మూవీ డిజాస్టర్ కావడంతో స్వాసికకి పెద్దగా గుర్తింపు రాలేదు. ఆ తర్వాత ఆది సాయికుమార్ హీరోగా వచ్చిన ఫాంటసీ థ్రిల్లర్ 'శంబాల' మూవీలో ఓ క్యారెక్టర్‌లో నటించింది స్వాసిక. మలయాళంలో పద్ధతైన పాత్రల్లో నటించిన స్వాసిక, తమిళ్, తెలుగులో బోల్డ్ క్యారెక్టర్‌ చేస్తూ, యూత్‌కి చేరువైంది. కంటి చూపుతోనే కైపుగా కవ్వించే స్వాసిక విజయ్‌కి సోషల్ మీడియాలో మంచి ఫాలోయింగ్ వచ్చింది. సూర్య 'కరుప్పు' (తెలుగులో 'వీరభద్రుడు') మూవీలోనూ నటించింది స్వాసిక.