అమెరికా డాలర్‌తో పోలిస్తే రూపాయి 14 పైసలు క్షీణించి, డాలర్‌కు 94.82 రూపాయల వద్ద ముగిసింది. దీంతో రూపాయి అత్యంత కనిష్ట స్థాయికి చేరువకు ఉంది. పెరుగుతున్న ముడి చమురు ధరలు, విదేశీ పెట్టుబడులు స్టాక్ మార్కెట్ల నుంచి నిరంతరం తరలిపోవడం రూపాయిపై ఒత్తిడిని కొనసాగిస్తున్నాయి.

ముడి చమురు ధరలు బ్యారెల్‌కు సుమారు 115 డాలర్ల వద్ద కొనసాగుతున్నాయి. ఇది భారతదేశ దిగుమతుల బిల్లుపై ప్రభావం చూపుతోంది. దీంతో రూపాయి పతనంపై ఆందోళనలను పెంచుతోందని విదేశీ మారక ద్రవ్య నిపుణులు పేర్కొంటున్నారు. అలాగే అమెరికా-ఇరాన్ సంక్షోభం ఒక పెద్ద సంఘర్షణగా మారవచ్చనే భయాలు ఇన్వెస్టర్ల ఆందోళనను మరింత పెంచుతున్నాయి.

ఇన్వెస్టర్లు ఇప్పుడు యూఎస్ ఫెడరల్ రిజర్వ్ రాబోయే విధాన నిర్ణయం కోసం ఎదురుచూస్తున్నారు. అంతేకాకుండా, ఈ ఏడాది ఇప్పటివరకు విదేశీ సంస్థాగత పెట్టుబడిదారులు (FIIలు) భారీగా అమ్మకాలు జరపడం కూడా పెట్టుబడిదారుల సెంటిమెంట్‌ను దెబ్బతీసింది.

ఇంటర్‌బ్యాంక్ విదేశీ మారక మార్కెట్‌లో, రూపాయి డాలర్‌కు 94.79 వద్ద ప్రారంభమై, ఇంట్రాడే ట్రేడింగ్‌లో 94.86 కనిష్ట స్థాయికి పడిపోయింది. చివరకు అది 94.82 రూపాయల వద్ద స్థిరపడింది, ఇది దాని మునుపటి ముగింపుతో పోలిస్తే 14 పైసల క్షీణతను సూచిస్తుంది.

ప్రపంచంలోని ఆరు ప్రధాన కరెన్సీలతో పోలిస్తే అమెరికన్ డాలర్ బలాన్ని కొలిచే 'డాలర్ ఇండెక్స్' 0.08 శాతం మేర పెరిగి 98.72 స్థాయికి చేరుకుంది. ఫ్యూచర్స్ ట్రేడింగ్‌లో అంతర్జాతీయ ప్రమాణంగా పరిగణించే 'బ్రెంట్ క్రూడ్' ధర 3.13 శాతం మేర పెరిగి, బ్యారెల్‌కు 114.74 డాలర్ల వద్ద స్థిరపడింది. మరోవైపు, మే 1వ తేదీ నుండి OPEC కూటమి నుండి వైదొలుగుతున్నట్లు యునైటెడ్ అరబ్ ఎమిరేట్స్ మంగళవారం ప్రకటించింది. ప్రపంచ చమురు కూటమికి ఇది ఒక పెద్ద దెబ్బగా పరిగణిస్తున్నారు.

రూపాయి తగ్గడం వల్ల వీరికి లాభం
రూపాయి విలువ తగ్గడం వల్ల కొన్ని రంగాల వారికి చాలా లాభదాయకం అని చెప్పవచ్చు. ముఖ్యంగా మన దేశం నుంచి ఎగుమతులు చేసే వారికి ఇది ఎంతగానో లాభదాయకం అవుతుంది. మన దేశం నుంచి ప్రధానమైన ఎగుమతుల్లో అత్యంత ముఖ్యమైనది ఫార్మా రంగం అని చెప్పవచ్చు. భారతదేశం ఫార్మా రంగానికి ఒక కేంద్ర స్థానంగా ఉంది అని చెప్పాలి. మన దేశంలో తయారైన మందులు, వ్యాక్సిన్లు ప్రపంచవ్యాప్తంగా అన్ని దేశాలకు ఎగుమతి అవుతుంటాయి. సాధారణంగా ఈ చెల్లింపులు అన్నీ కూడా అమెరికన్ డాలర్ల రూపంలోనే అవుతుంటాయి. రూపాయి విలువ పతనం అవడం వల్ల ఆయా కంపెనీలకు డాలర్ల రూపంలో వచ్చే ఆదాయం పెరుగుతుంది.

ఇక ఫార్మా రంగం తర్వాత పెట్రో కెమికల్ రంగానికి కూడా ఇది ఎంతో ఉపయోగపడుతుంది అని చెప్పవచ్చు. మన దేశంలో పలు రిఫైనరీలు విదేశాల నుంచి క్రూడ్ ఆయిల్ దిగుమతి చేసుకొని వాటిని పెట్రో కెమికల్స్‌గా మార్చి పలు దేశాలకు ఎగుమతి చేస్తున్నాయి. కనుక ఈ రూపంలో వచ్చే ఆదాయం కూడా ఆయా కంపెనీలకు లాభాలను అందజేస్తుంది అని చెప్పవచ్చు. ఇంకా విదేశాల్లో పనిచేసే వారు తమ కుటుంబాలకు డాలర్ రూపంలో డబ్బులు పంపిస్తుంటారు. ఆయా కుటుంబాలకు సైతం తగ్గుతున్న రూపాయి విలువ వల్ల లాభదాయకం అయ్యే అవకాశం ఉంది.

Read more news like this on telugu.timesnownews.com