టీవీకే అధినేత, హీరో విజయ్‌కు బిగ్ షాక్ తగిలింది. తమిళనాడు అసెంబ్లీ ఎన్నికల్లో అతిపెద్ద పార్టీగా టీవీకే అవతరించిన సంగతి తెలిసిందే. అయితే ఏ పార్టీ కూడా ప్రభుత్వాన్ని ఏర్పాటు చేసే మ్యాజిక్ ఫిగర్ 118కి చేరుకోలేకపోవడంతో హంగ్ ఏర్పిడంది.

దీంతో ప్రభుత్వాన్ని ఏర్పాటు చేసేందుకు హీరో విజయ్ తన ప్రయత్నాల్లో నిమగ్నమవుతున్న సంగతి తెలిసిందే. ఇప్పటికే కాంగ్రెస్, వామపక్ష పార్టీలు విజయ్‌కు మద్దతు ప్రకటించిన నేపథ్యంలో గవర్నర్ అపాయింట్మెంట్ తీసుకున్నారు విజయ్. ఈ క్రమంలో బుధవారం మధ్యాహ్నాం టీవీకే చీఫ్ విజయ్ పార్టీ ముఖ్య నేతలతో కలిసి గవర్నర్ రాజేంద్ర అర్లేకర్‌ను కలిశారు. ప్రభుత్వ ఏర్పాటుకు ఆహ్వానించాలని కోరారు. ప్రభుత్వఏర్పాటుకు విజయ్‌కు గవర్నర్ అనుమతి లభించలేదని లోక్‌భవన్ వర్గాల నుంచి సమాచారం అందుతోంది.

సీఎంగా విజయ్ ప్రమాణ స్వీకారం మరింత ఆలస్యం?
టీవీకే అధినేత, హీరో విజయ్ ముఖ్యమంత్రిగా ప్రమాణ స్వీకారం చేసేందుకు మరింత ఆలస్యం అయ్యే అవకాశాలు కనిపిస్తున్నాయి. టీవీకే పార్టీకి సంపూర్ణ మద్దతు లేని నేపథ్యంలో ముఖ్యమంత్రిగా ప్రమాణ స్వీకారం మరింత ఆలస్యం అవుతుంది. టీవీకే పార్టీ 108 స్థానాలతో సరిపెట్టుకుంది. తమిళనాడులో మెుత్తం అసెంబ్లీ స్థానాలు 234 ఉన్నాయి. అయితే ప్రభుత్వాన్ని ఏర్పాటు చేసేందుకు మ్యాజిక్ ఫిగర్ 118. 118 సభ్యుల బలం ఉంటేనే ప్రభుత్వాన్ని ఏర్పాటు చేసే అవకాశం ఉంది. అయితే టీవీకేకు 108 స్థానాలు మాత్రమే రావడంతో ఇతర పార్టీలపై ఆధారపడాల్సిన అవసరం ఏర్పడింది. ఇప్పటికే విజయ్ కాంగ్రెస్ పార్టీ మద్దతు కోరగా అందుకు సుముఖత వ్యక్తం చేసింది. దీంతో కాంగ్రెస్ పార్టీ నుంచి గెలుపొందిన ఐదుగురు సభ్యుల మద్దతు టీవీకే పార్టీకి దక్కనుంది. దీంతో టీవీకే పార్టీ ప్రభుత్వాన్ని ఏర్పాటు చేసేందుకు లభించిన మద్దతు 113కు చేరుకుంది. ఇతర పార్టీలు కూడా మద్దతు ఇచ్చే అవకాశాలు ఉన్నాయని తెలియడంతో టీవీకే చీఫ్, హీరో విజయ్ తమిళనాడు గవర్నర్ రాజేంద్ర అర్లేకర్‌ను కలిశారు. ప్రభుత్వ ఏర్పాటుకు ఆహ్వానించాలని కోరగా అందుకు గవర్నర్ తిరస్కరించారు. మెజార్టీపై గవర్నర్‌ను కన్విన్స్‌ చేయడంలో విజయ్ వెనకపడ్డారు. విజయ్‌కు 112 మంది ఎమ్మెల్యేల మద్దతు ఉందని ప్రభుత్వ ఏర్పాటుకు 118 మంది ఎమ్మెల్యేల బలం అవసరం అని గవర్నర్ తెలియజేసినట్లు లోక్‌భవన్ వర్గాల నుంచి సమాచారం. ప్రభుత్వ ఏర్పాటు పూర్తి సభ్యుల మద్దతు తీసుకువస్తే అనుమతి ఇస్తానని గవర్నర్ అన్నట్లు లోక్‌ భవన్ వర్గాల నుంచి సమాచారం. అంతేకాదు లీగల్ ఓపీనియన్‌కు పంపించినట్లు తెలుస్తోంది. మెుత్తానికి గవర్నర్ రాజేంద్ర అర్లేకర్ అవకాశం ఇవ్వకపోవడంతో విజయ్ ప్రమాణ స్వీకారం మరింత ఆలస్యం అయ్యే అవకాశం కనిపిస్తోంది.

రేపు ప్రమాణ స్వీకారం లేనట్లే
ఇదిలా ఉంటే తమిళనాడు సీఎంగా దళపతి విజయ్ ప్రమాణస్వీకారం చేసేందుకు రెడీ అవుతున్నారు. ఇప్పటికే నెహ్రూ స్టేడియంలో ప్రమాణస్వీకారానికి ఏర్పాట్లు చేస్తున్నారు. సుమారు 5వేల మందికి పాసులు జారీ చేయాలని నిర్ణయం తీసుకున్నారు. ముఖ్యమంత్రిగా విజయ్ ప్రమాణ స్వీకారానికి కాంగ్రెస్ అగ్రనేత రాహుల్ గాంధీతో పాటు ఇతర ప్రముఖులు, నేతలు హాజరవుతారని తెలుస్తోంది. ఈ మేరకు ఏర్పాట్లు జరుగుతున్నాయి. గురువారం ప్రమాణ స్వీకారానికి అన్ని ఏర్పాట్లు చేస్తున్న తరుణంలో గవర్నర్ ఆమోదం లభించకపోవడంతో అది వాయిదా పడినట్లే తెలుస్తోంది. గవర్నర్ ఆమోదం తెలిపిన తర్వాతే మరోసారి తేదీని ఖరారు చేసే అవకాశం ఉన్నట్లు తెలుస్తోంది.

Read more news like this on telugu.timesnownews.com