సూపర్ గుడ్ ఫిల్మ్స్ బ్యానర్‌కి ప్రేక్షకుల్లో ఓ మంచి గుర్తింపు ఉంది. సూపర్ గుడ్ ఫిల్మ్స్ బ్యానర్‌లో వచ్చిన సినిమాలు ఫీల్ గుడ్ సినిమాలుగా ఉంటాయని, అడల్ట్ కంటెంట్, బూతులు లేకుండా అందరూ చూడదగ్గట్టుగా ఉంటాయని జనాలు విశ్వసించేవాళ్లు.

అలాంటి బ్రాండ్‌ని క్రియేట్ చేశాడు నిర్మాత ఆర్‌.బీ. చౌదరి. తమిళ్‌లో 'సూపర్ గుడ్ ఫిల్మ్స్' బ్యానర్‌లో సినిమాలు నిర్మించిన ఆర్‌బీ చౌదరి, తెలుగులో 'మెగా సూపర్ గుడ్ ఫిల్మ్స్' బ్యానర్‌పై సినిమాలను నిర్మించారు.

• బూతు సినిమాలతో మొదలెట్టి...

సూపర్ గుడ్ ఫిల్మ్స్, ఆర్‌బీ చౌదరి అనగానే ఫీల్ గుడ్ సినిమాలు, కుటుంబ సమేతంగా చూడదగ్గ చిత్రాలే గుర్తుకు వస్తాయి. అయితే నిజానికి ఆయన కెరీర్ మొదలైంది మాత్రం బూతు సినిమాలతోనే. 1988లో 'ఆదిపాపం' అనే మలయాళ సాఫ్ట్ పోర్న్ మూవీతో ప్రొడక్షన్‌లోకి అడుగుపెట్టాడు ఆర్‌బీ చౌదరి. ఈ మూవీ రూ.7.5 లక్షల బడ్జెట్‌తో తెరకెక్కి, అప్పట్లోనే రూ.2.5 కోట్లు వసూలు చేసింది. మలయాళంలో సాఫ్ట్ పోర్న్‌తో సంచలన విజయం అందుకున్న మొదటి సినిమా ఇదే. ఓ రకంగా మలయాళ సినిమాలు అంటే సాఫ్ట్ పోర్న్ సినిమాలే అనే మార్క్ పడడానికి ఆద్యం పడింది ఈ సినిమాతోనే.
ఆ తర్వాత సిల్క్ స్మిత, దేవీశ్రీ ప్రధాన పాత్రల్లో 'లయనం' అనే మరో బూతు సినిమా చేశాడు ఆర్‌బీ చౌదరి. ఇది కూడా మంచి విజయం అందుకుంది. 'కల్పనా హౌస్' అనే మరో మలయాళ సినిమా తర్వాత 'పుదు వసంతం' సినిమాతో తమిళ్‌లోకి ఎంట్రీ ఇచ్చింది. తమిళ సినిమాలోకి వచ్చిన తర్వాత ఆయన మంచి కథా బలం ఉన్న సినిమాలను నిర్మించడం మొదలెట్టారు.

• 'కెప్టెన్' మూవీతో ఎంట్రీ...

శరత్ కుమార్ హీరోగా కోడి రామకృష్ణ దర్శకత్వంలో వచ్చిన టాలీవుడ్ ఎంట్రీ ఇచ్చిన ఆర్‌బీ చౌదరి, 'సుస్వాగతం', 'సూర్యవంశం', 'రాజా', 'నువ్వు వస్తావని', 'నిన్నే ప్రేమిస్తా', 'ప్రియమైన నీకు', 'సింహరాశి', 'స్నేహమంటే ఇదేరా', 'శివరామ రాజు', 'సంక్రాంతి', 'అందాల రాముడు' (సునీల్), 'అన్నవరం', 'నవ వసంతం', 'భీమిలీ కబడ్డీ జట్టు' వంటి క్లాసిక్స్‌ని తెలుగువారికి అందించారు.

• ఉదయ్ కిరణ్‌తో మూవీ తీయాలనే కోరిక...

కెరీర్‌ పీక్‌లో ఉన్న సమయంలో లవర్ బాయ్ ఉదయ్ కిరణ్‌తో సినిమా చేయాలని ప్రయత్నించారు ఆర్‌బీ చౌదరి. 'చిత్రం', 'నువ్వు నేను', 'జయం' బ్లాక్ బస్టర్ తర్వాత తేజ దర్శకత్వంలో ఉదయ్ కిరణ్ హీరోగా, సదా హీరోయిన్‌గా 'లవర్స్' పేరుతో ఓ మూవీ అనౌన్స్‌మెంట్ కూడా వచ్చింది. అయితే అనివార్య కారణాల వల్ల ఈ మూవీ అనౌన్స్‌మెంట్ దగ్గరే ఆగిపోయింది. ఉదయ్ కిరణ్‌ని ఎంతగానో అభిమానించి, ఆయనతో ఓ సినిమా తీయాలనే ఆర్‌బీ చౌదరి కోరిక తీరలేదు. టాలీవుడ్‌లో సూపర్ స్టార్‌గా ఎదిగిన ఉదయ్ కిరణ్, ఆ తర్వాత వరుస ఫ్లాపులతో స్టార్ డమ్ కోల్పోయాడు. దీంతో అవకాశాల కోసం ఎదురుచూడలేక, అవమానాలు తట్టుకోలేక 2014లో ఆత్మహత్య చేసుకున్న విషయం తెలిసిందే. ఆర్‌బీ చౌదరి, 2026, మే 5న రోడ్డు ప్రమాదంలో కన్నుమూశారు.