తమిళ స్టార్ హీరో ధనుష్ గురించి టాలీవుడ్ ప్రముఖ రచయిత, నటుడు తనికెళ్ల భరణి చేసిన వ్యాఖ్యలు ప్రస్తుతం సోషల్ మీడియాలో వైరల్గా మారాయి. కమర్షియల్ హీరోగా భారీ స్థాయిలో మార్కెట్ ఉన్నప్పటికీ, ధనుష్ చిన్న సినిమాలకు, కొత్త టాలెంట్కు ఇస్తున్న ప్రోత్సాహాన్ని ప్రశంసిస్తూ భరణి చేసిన కామెంట్స్ సినీ వర్గాల్లో చర్చనీయాంశంగా మారాయి.
ముఖ్యంగా ధనుష్కు చేతులెత్తి నమస్కారం చేయాలంటూ ఆయన మాట్లాడిన మాటలు ఇప్పుడు తెలుగు ప్రేక్షకుల్లో కూడా కొత్త చర్చకు దారి తీశాయి. ఓ ఇంటర్వ్యూలో మాట్లాడుతూ ధనుష్ ఒక కమర్షియల్ హీరో అయి ఉండి కూడా గత ఐదేళ్లుగా రెండు కోట్ల బడ్జెట్తో కొత్తవాళ్లతో సినిమాలు తీస్తున్నాడని, ప్రతి సినిమా పది కోట్ల వరకు రాబడుతోందని, నేషనల్ అవార్డులు కూడా వస్తున్నాయని, ఇది ఎంతో అందమైన కాన్సెప్ట్ అని, తెలుగు ఇండస్ట్రీలో ఎందుకు ఇలాంటి ప్రయత్నాలు ఎక్కువగా కనిపించట్లేదో తనకి అర్థం కావడం లేదని భరణి వ్యాఖ్యానించారు.
ధనుష్ కెరీర్ను పరిశీలిస్తే భరణి చెప్పిన మాటల్లో నిజం కనిపిస్తుందని సినీ విశ్లేషకులు అభిప్రాయపడుతున్నారు. హీరోగా పాన్ ఇండియా స్థాయిలో గుర్తింపు తెచ్చుకున్న ధనుష్, మరోవైపు డైరెక్టర్ గా, నిర్మాతగా కూడా తనదైన ముద్ర వేస్తున్నారు. ముఖ్యంగా కొత్త కథలు, కొత్త దర్శకులు, కొత్త నటులను ప్రోత్సహించే దిశగా ఆయన తీసుకుంటున్న అడుగులు ప్రత్యేకంగా నిలుస్తున్నాయి. చిన్న బడ్జెట్ సినిమాలు కేవలం ప్రయోగాలకే పరిమితం కాకుండా, కంటెంట్ బలంగా ఉంటే మంచి విజయాలు సాధించగలవని ఆయన వరుసగా నిరూపిస్తున్నారు. ఈ సినిమాలు బాక్సాఫీస్ వద్ద లాభాలు అందుకోవడమే కాకుండా, విమర్శకుల ప్రశంసలు, జాతీయ స్థాయి అవార్డులు కూడా సాధించడం విశేషం. అందుకే ధనుష్ మోడల్ ఇప్పుడు దక్షిణాది సినీ పరిశ్రమల్లో చర్చకు వస్తోంది. భారీ బడ్జెట్లతో స్టార్ సినిమాలు చేయడం ఒక వైపు అయితే, మరోవైపు చిన్న సినిమాలకు కూడా బలమైన వేదిక కల్పించడం ద్వారా పరిశ్రమకు కొత్త ఊపు తీసుకురావచ్చని చాలా మంది భావిస్తున్నారు.
ఇక తనికెళ్ల భరణి చేసిన ఈ వ్యాఖ్యలు టాలీవుడ్పై కూడా ఓ పరోక్ష ప్రశ్నగా మారాయి. తెలుగు సినీ పరిశ్రమలో పెద్ద హీరోలు, ప్రముఖ నిర్మాణ సంస్థలు ఉన్నప్పటికీ, కొత్తవాళ్లతో తక్కువ బడ్జెట్లో ప్రయోగాత్మక సినిమాలు నిర్మించే ప్రయత్నాలు చాలా అరుదుగా కనిపిస్తున్నాయనే చర్చ మొదలైంది. ఇటీవల కొన్ని చిన్న సినిమాలు కంటెంట్ బలంతో భారీ విజయాలు సాధించినప్పటికీ, స్టార్ హీరోలు స్వయంగా ముందుకు వచ్చి అలాంటి ప్రాజెక్ట్లను నిర్మించడం మాత్రం తక్కువగానే ఉంది. అందుకే ధనుష్ చేస్తున్న ప్రయత్నాలను చూసి భరణి ప్రశంసించడం వెనుక పెద్ద సందేశం ఉందని సినీ వర్గాలు చెబుతున్నాయి. మొత్తానికి ధనుష్పై తనికెళ్ల భరణి చేసిన ప్రశంసలు ఇప్పుడు సోషల్ మీడియాలో మాత్రమే కాదు, సినీ పరిశ్రమలో కూడా ఆలోచనలకు దారి తీస్తున్నాయి.