టాలీవుడ్‌లో ఒక హీరో అనుకున్న కథ మరో హీరో దగ్గరకు వెళ్లడం సాధారణమే. కానీ, ఒక క్రేజీ కథ ఇద్దరు ముగ్గురు స్టార్ హీరోల చుట్టూ తిరిగి.. చివరికి మొదట అనుకున్న హీరో దగ్గరకే రావడం నిజంగా పెద్ద ట్విస్టే.

ప్రస్తుతం టాలీవుడ్‌లో మోస్ట్ అవేటెడ్ ప్రాజెక్టులుగా ఉన్న రామ్ చరణ్ 'పెద్ది' త్రివిక్రమ్-ఎన్టీఆర్ 'గాడ్ ఆఫ్ వార్' సినిమాల విషయంలో సరిగ్గా ఇదే జరిగింది. ఈ రెండు సినిమాల ఇంట్రెస్టింగ్ క్యాస్టింగ్ ట్విస్టుల గురించి చూద్దాం..

చరణ్ కోసం పుట్టి.. ఎన్టీఆర్ చుట్టూ తిరిగి.. మళ్లీ 'పెద్ది':

దర్శకుడు బుచ్చిబాబు సనా 'ఉప్పెన' లాంటి బ్లాక్‌బస్టర్ తర్వాత రామ్ చరణ్ కోసమే ఒక పవర్‌ఫుల్ కథను సిద్ధం చేశారు. చరణ్‌కు కథ నచ్చినా, ఆయన వేరే ప్రాజెక్టులతో బిజీగా ఉండటంతో ఈ లోపు బుచ్చిబాబు జూనియర్ ఎన్టీఆర్‌ను కలిసి కథ వినిపించారు. ఎన్టీఆర్ ఓకే అన్నా కూడా కొన్ని కారణాల వల్ల ఆ కాంబో సెట్స్ పైకి వెళ్లలేదు. ఇక చివరికి ఎన్నో మలుపులు తిరిగి ఈ కథ మళ్లీ తన అసలు హీరో అయిన రామ్ చరణ్ దగ్గరకే చేరి 'పెద్ది'గా రూపుదిద్దుకుంటోంది. ఇక ఏ.ఆర్. రెహమాన్ మ్యూజిక్ ఇస్తున్న ఈ సినిమాలో జాన్వీ కపూర్ హీరోయిన్ గా నటిస్తుంది. జూన్ 4 న మూవీ రిలీజ్ కు రెడీ అయింది.

త్రివిక్రమ్ 'గాడ్ ఆఫ్ వార్'.. బన్నీ కాదు మళ్లీ తారకే:

ఇక మాటల మాంత్రికుడు త్రివిక్రమ్ శ్రీనివాస్ ప్లాన్ చేస్తున్న 'గాడ్ ఆఫ్ వార్' సినిమా కథ కూడా ఇలాంటి రోలర్ కోస్టర్ రైడ్ చూసింది. మొదట ఈ భారీ స్క్రిప్ట్‌ను ఎన్టీఆర్ కోసమే త్రివిక్రమ్ రెడీ చేశారు. కానీ కొన్ని సమీకరణాల వల్ల ఈ లోపు అల్లు అర్జున్ పేరు చర్చల్లోకి వచ్చింది. బన్నీతో త్రివిక్రమ్ సినిమా అనౌన్స్ అవుతుందని అందరూ అనుకున్నారు. కానీ అల్లు అర్జున్ వేరే ప్రాజెక్టులతో బిజీగా ఉండటంతో, త్రివిక్రమ్ మళ్లీ ఎన్టీఆర్ వైపు మొగ్గు చూపారు. తారక్ కూడా గ్రీన్ సిగ్నల్ ఇవ్వడంతో ఈ ప్రాజెక్ట్ మళ్లీ ఎన్టీఆర్ చేతికే చేరింది అని టాక్.

ఫ్యాన్స్‌కు డబుల్ ట్రీట్ గ్యారెంటీ:

ఈ రెండు సినిమాల క్యాస్టింగ్ గందరగోళం ముగియడంతో అటు మెగా ఫ్యాన్స్, ఇటు నందమూరి ఫ్యాన్స్ ఫుల్ ఖుషీగా ఉన్నారు. రామ్ చరణ్ 'పెద్ది' సినిమాలో కన్నడ స్టార్ శివరాజ్ కుమార్, జగపతి బాబు లాంటి హేమాహేమీలు నటిస్తుండటంతో సినిమాపై అంచనాలు ఆకాశంలో ఉన్నాయి. అటు ఎన్టీఆర్-త్రివిక్రమ్ కలయికలో రాబోయే 'గాడ్ ఆఫ్ వార్' సినిమాకు సంబంధించిన అఫీషియల్ అనౌన్స్‌మెంట్ కూడా త్వరలోనే రాబోతోందని ఇండస్ట్రీ వర్గాల టాక్.