దశాబ్దాల తరబడి గ్రీన్ కార్డ్ క్యూలో నిలబడి దంపతులిద్దరూ కష్టపడి కట్టుకున్న ఆర్థిక స్థిరత్వం ఒక్కసారిగా కూలిపోతుందా? అమెరికాలో స్థిరపడిన వేలాది భారతీయ, తెలుగు కుటుంబాల ఆత్మగౌరవానికి, ఆర్థిక భద్రతకు ప్రతీకగా నిలిచిన హెచ్-4 ఈఏడీ ఉనికిపై మళ్లీ నల్లని మేఘాలు కమ్ముకోవడంతో... ఆయా ఇళ్లల్లో మళ్లీ అనిశ్చితి, నిద్రలేని రాత్రులు మొదలయ్యాయి.

అమెరికాలో మెరుగైన జీవితాన్ని నిర్మించుకోవాలని.. పిల్లలకు మంచి భవిష్యత్తును అందించాలని ఎన్నో కలలతో అడుగుపెట్టిన వేలాది తెలుగు కుటుంబాలకు హెచ్-4 ఈఏడీ అనేది కేవలం ఒక ప్లాస్టిక్ కార్డు లేదా ఉద్యోగ అనుమతి పత్రం మాత్రమే కాదు. అది వారి జీవితాల్లో ఒక నిశ్శబ్ద వెలుగు.. ఎన్నో ఏళ్ల నిరీక్షణ తర్వాత లభించిన ఒక ఆత్మగౌరవ సంతకం. ఈ రోజు ఆ ఈఏడీ ఉనికిపై ఏ చిన్న సంక్షోభ మేఘం కమ్మేసినా అది వేలాది ఇళ్లల్లో అభద్రతా భావాన్ని నిద్రలేని రాత్రులను మిగుల్చుతోంది.

అమెరికాలో ఐటీ లేదా ఇతర రంగాల్లో రాత్రింబవళ్లు శ్రమిస్తున్న హెచ్1బీ వీసాదారుల జీవిత భాగస్వాములు ఎందరో ఇక్కడ అడుగుపెట్టాక తమ సొంత ఐడెంటిటీని, చదువును, నైపుణ్యాలను నాలుగు గోడలకే పరిమితం చేసుకోవాల్సి వచ్చింది. ఎంతో ప్రతిభ ఉండి కూడా ఏమీ చేయలేని ఆవేదనతో కెరీర్ గ్యాప్‌తో నలిగిపోయిన ఎంతోమంది తెలుగు మహిళలకు 2015లో వచ్చిన హెచ్-4 ఈఏడీ ఒక కొత్త ఊపిరినిచ్చింది. మళ్లీ కాళ్లపై నిలబడే ధైర్యాన్ని.. సమాజంలో తమకంటూ ఒక గుర్తింపును ఇచ్చింది. అలాంటి హక్కును ఒక్కసారిగా లాగేసుకుంటే అది ఆర్థికంగానే కాకుండా మానసికంగా కూడా ఆ కుటుంబాలను తీవ్రంగా దెబ్బతీస్తుంది.

అసలు హెచ్-4 ఈఏడీ అంటే ఏమిటి?

హెచ్1బీ వీసాపై అమెరికాలో పనిచేస్తున్న వ్యక్తి జీవిత భాగస్వామి, అర్హత కలిగిన పిల్లలు సాధారణంగా హెచ్-4 ఆధారిత హోదాలో ఉండవచ్చు. అయితే హెచ్-4 హోదా ఉన్న ప్రతి ఒక్కరికీ ఆటోమెటిక్‌గా ఉద్యోగం చేసే హక్కు ఉండదు. 2015లో అమెరికా డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీని తీసుకొచ్చిన నిబంధనల ద్వారా నిర్దిష్ట అర్హతలు కలిగిన హెచ్-4 జీవిత భాగస్వాములకు ఉద్యోగ ఆథరైజేషన్ డాక్యుమెంట్ (ఈఏడీ) దరఖాస్తు చేసుకునే అవకాశం ఏర్పడింది.

ప్రధానంగా ఉద్యోగ ఆధారిత గ్రీన్‌కార్డ్ ప్రక్రియలో నిర్దిష్ట దశకు చేరుకున్న హెచ్-1బీ ఉద్యోగుల జీవిత భాగస్వాములు ఈ ప్రయోజనం పొందే అవకాశం ఉంటుంది. అంటే హెచ్-4 అనేది అమెరికాలో డిపెండెంట్‌గా ఉండే ఇమ్మిగ్రేషన్ స్థితి అయితే.. హెచ్-4 ఈఏడీ అర్హత ఉన్న జీవిత భాగస్వామికి చట్టబద్ధంగా పనిచేసేందుకు ఇచ్చే ఉపాధి అధికారం. ఈ రెండింటినీ ఒకటిగా చూడటం సరికాదు.

ఎందుకు తీసుకొచ్చారు?

అమెరికాలో ఉపాధి ఆధారిత గ్రీన్ కార్డ్ కోసం ప్రస్తుతం ఉన్న కుటుంబాలు, ముఖ్యంగా భారతీయులు.. అనేక సంవత్సరాలు అమెరికాలోనే ఉండాల్సిన పరిస్థితి ఉంది. గ్రీన్ కార్డ్ బ్యాక్‌లాగ్ కారణంగా హెచ్1బీ ఉద్యోగి సంవత్సరాల తరబడి ఒకే ఇమ్మిగ్రేషన్ ప్రయాణంలో కొనసాగుతున్నప్పుడు.. అతని లేదా ఆమె జీవిత భాగస్వామి ఉద్యోగం చేయలేకపోవడం కుటుంబ ఆర్థిక పరిస్థితిపై ప్రభావం చూపుతుంది. విద్య, సాంకేతిక నైపుణ్యాలు, ఉద్యోగ అనుభవం పని చేయలేని పరిస్థితిని తగ్గించేందుకు హెచ్-4 ఈఏడీకి మార్గం ఏర్పడింది. ఆ తర్వాత టెక్నాలజీ, హెల్త్‌కేర్, ఫైనాన్స్, ఇంజనీరింగ్, ఎడ్యుకేషన్, రీసెర్చ్ వంటి రంగాల్లో అనేక మంది హెచ్-4 జీవిత భాగస్వాములు తిరిగి వర్క్‌ఫోర్స్‌లోకి ప్రవేశించారు.

రద్దు అయితే మొదటి దెబ్బ కుటుంబ ఆదాయానికే!

హెచ్-4 ఈఏడీ పూర్తిగా రద్దయ్యే పరిస్థితి వస్తే దాని ప్రభావం ముందుగా కుటుంబ ఆదాయంపై పడే అవకాశం ఉంది. ఉదాహరణకు భర్త హెచ్-1బీపై ఐటీ ఉద్యోగం చేస్తూ భార్య హెచ్-4 ఈఏడీతో మరో టెక్నాలజీ కంపెనీలో పనిచేస్తోందనుకుందాం. ఇద్దరి ఆదాయాన్ని బట్టి ఇంటి రుణం, పిల్లల స్కూల్ ఫీజులు, ఆరోగ్య బీమా, కారు రుణాలు, 401(కె) పొదుపులు వంటి ఖర్చులను ప్లాన్ చేసి ఉండవచ్చు.

అలాంటి సమయంలో భార్య ఉద్యోగం కోల్పోతే అది కేవలం ఒక ఉద్యోగం పోవడం కాదు. కుటుంబ ఆదాయం ఒక్కసారిగా తగ్గే అవకాశం ఉంటుంది. అదే సమయంలో యజమాని పదవీ విరమణ సహకారం, కెరీర్ పురోగతి, భవిష్యత్ జీతం పెరుగుదల, వృత్తిపరమైన అనుభవం వంటి ప్రయోజనాలపై ప్రభావం పడొచ్చు.

తెలుగు కుటుంబాలపై ప్రభావం ఎందుకు గమనించదగ్గది?

అమెరికాలో హెచ్1బీ ఉద్యోగాల్లో భారతీయుల ప్రాబల్యం ఉండటంతో హెచ్-4 ఈఏడీపై జరిగే విధాన మార్పులు కుటుంబాలను ప్రత్యేకంగా ప్రభావితం చేసే అవకాశం ఉంది. అందులో తెలుగు రాష్ట్రాలకు చెందిన ఐటీ నిపుణులు, ఇంజనీర్లు, హెల్త్‌కేర్ కార్మికులు కూడా పెద్ద సంఖ్యలో ఉన్నారు. ఇప్పటికే రెండు ఆదాయాలను నమ్ముకుని కట్టుకున్న కళ్లముందటి కలల మేడలు.. పిల్లల ఉన్నత చదువుల ప్రణాళికలు.. నెలనెలా కట్టాల్సిన ఇంటి రుణాలు... ఇవన్నీ ఒక్కసారిగా ఏకైక ఆదాయంపై పడితే ఆ భారం వర్ణనాతీతం. ఆలుమగలిద్దరూ కలిసి పంచుకున్న బాధ్యతలు మళ్లీ ఒక్కరి భుజాల మీదికే మారితే ఆ మానసిక ఒత్తిడి ఆ కుటుంబంలో నవ్వులను దూరం చేస్తుంది. ఏళ్ల తరబడి పడిన కష్టమంతా బూడిదలో పోసిన పన్నీరవుతుందేమోనన్న భయం ప్రతీ నిమిషం వెంటాడుతుంది. గ్రీన్ కార్డ్ కోసం దశాబ్దాల తరబడి నిరీక్షిస్తున్న భారతీయ కుటుంబాలకు ఈ అనిశ్చితి ఒక ముగింపు లేని సుదీర్ఘ వేదనగా మారుతోంది.

అయితే సోషల్ మీడియాలో వచ్చే అనవసర ప్రచారాలను చూసి భయాందోళనలకు గురికావడం వల్ల మనశ్శాంతి తప్ప ఏమీ దక్కదు. అమెరికా చట్టాల్లో మార్పులు రావడం అనేది ఒక్క రోజులో జరిగే ప్రక్రియ కాదు. దానికి ఎన్నో న్యాయపరమైన, ప్రభుత్వపరమైన దశలు ఉంటాయి. కాబట్టి ప్రచారాలను నమ్మి తొందరపడి నిర్ణయాలు తీసుకోకుండా ధైర్యంతో పరిస్థితిని ఎదుర్కోవడమే ఈ సమయంలో ఏకైక మార్గం. ఆశతో ముందడుగు వేసిన ప్రతీ తెలుగు కుటుంబానికి ఈ అనిశ్చితి తొలగిపోయి, భవిష్యత్తుపై నమ్మకం కలగాలని కోరుకోవడమే మన చేతుల్లో ఉంది.