ప్రపంచం పారిశ్రామిక విప్లవం నుంచి సమాచార విప్లవం వైపు సాగిన క్రమంలో 'గణితం' ప్రాథమిక నైపుణ్యంగా నిలిచింది. కానీ ఇప్పుడు కాలం మారుతోంది.

కృత్రిమ మేధ అనేది కేవలం ఒక సాంకేతిక అంశం మాత్రమే కాదు.. అది భవిష్యత్తు తరానికి ఒక ప్రాథమిక భాషగా మారబోతోంది. దీనిని ముందుగానే పసిగట్టిన చైనా ప్రపంచ దేశాలను ఆశ్చర్యపరిచేలా ఒక సాహసోపేత నిర్ణయం తీసుకుంది. ఆరు ఏళ్ల ప్రాయం నుంచే ప్రతి బిడ్డకూ ఏఐ విద్యను తప్పనిసరి చేస్తూ చైనా ప్రభుత్వం నూతన విద్యా ప్రణాళికను రూపొందించింది.

చిన్నారి మేధస్సు.. కృత్రిమ మేధస్సు!

సాధారణంగా ఆరు ఏళ్ల వయసులో పిల్లలు అక్షరాలు, అంకెలు దిద్దుతుంటారు. కానీ చైనాలో ఇకపై వారు 'కంప్యూటేషనల్ థింకింగ్' పాఠాలు వినబోతున్నారు. ప్రాథమిక పాఠశాల స్థాయి నుంచే ఏఐని ఒక సబ్జెక్టుగా ప్రవేశపెట్టడం వెనుక చైనాకు ఒక స్పష్టమైన విజన్ ఉంది. మొదటగా పిల్లలకు ప్యాటర్న్ రికగ్నిషన్, లాజికల్ రీజనింగ్ వంటి అంశాలను ఆటపాటల ద్వారా నేర్పిస్తారు. హైస్కూల్ స్థాయికి వచ్చేసరికి వారు కోడింగ్, రోబోటిక్స్, డేటా అనలిటిక్స్, మెషిన్ లెర్నింగ్ వంటి క్లిష్టమైన అంశాలలో నిష్ణాతులుగా మారేలా సిలబస్‌ను రూపొందించారు.

దీని ఉద్దేశం కేవలం సాఫ్ట్‌వేర్ ఇంజనీర్లను తయారు చేయడం మాత్రమే కాదు. భవిష్యత్తులో వైద్యం, వ్యవసాయం, ఆర్కిటెక్చర్ వంటి ఏ రంగంలోనైనా ఏఐ ఒక అంతర్భాగం కానుంది. ఆ పరిస్థితులకు అనుగుణంగా విద్యార్థులను ఇప్పటి నుంచే సిద్ధం చేయడమే ఈ ప్రాజెక్ట్ లక్ష్యం.

డీప్‌సీక్ ఇచ్చిన ధైర్యం

ఇటీవల చైనాకు చెందిన డీప్‌సీక్ వంటి ఏఐ మోడళ్లు ప్రపంచవ్యాప్తంగా సృష్టించిన సంచలనం అందరికీ తెలిసిందే. అమెరికా ఆధిపత్యంలో ఉన్న టెక్నాలజీ రంగంలో తక్కువ ఖర్చుతో అత్యంత శక్తివంతమైన మోడళ్లను చైనా సంస్థలు అభివృద్ధి చేయగలవని డీప్‌సీక్ నిరూపించింది. ఈ విజయం చైనా పాలకుల్లో మరింత ఆత్మవిశ్వాసాన్ని నింపింది. టెక్నాలజీ రంగంలో గ్లోబల్ సూపర్ పవర్‌గా ఎదగాలంటే, క్షేత్రస్థాయి నుంచే మానవ వనరులను తీర్చిదిద్దాలని చైనా భావిస్తోంది.

టెక్నాలజీ యుద్ధంలో అగ్రపీఠం కోసం..

అమెరికా, ఇతర పాశ్చాత్య దేశాలకు సవాల్ విసురుతూ సెమీకండక్టర్లు ఏఐ పరిశోధనలపై చైనా బిలియన్ల డాలర్లు కుమ్మరిస్తోంది. "రాబోయే కాలంలో యుద్ధాలు ఆయుధాలతో మాత్రమే కాదు, అల్గారిథమ్స్‌తో కూడా జరుగుతాయి." అనే వాస్తవాన్ని గ్రహించిన చైనా తన తర్వాతి తరాన్ని ఒక 'టెక్-ఆర్మీ'లా సిద్ధం చేస్తోంది. ప్రపంచంలోని ఏ ఇతర దేశం కూడా ఇంత చిన్న వయసులోనే ఏఐని పాఠ్యాంశంగా మార్చలేదు. చైనా తీసుకున్న ఈ నిర్ణయం ఇప్పుడు భారత్, అమెరికా వంటి దేశాలపై కూడా ఒత్తిడి పెంచుతోంది.