దేశంలో మొన్నటి వరకు జరిగిన నాలుగు రాష్ట్రాల ఎన్నికల్లో ఎక్కువ చర్చ బెంగాల్ గురించి జరుగుతున్నా.. తమిళనాడు గురించి జరుగుతున్న చర్చ తక్కువేమీ కాదు.

తమిళనాడు రాజకీయ చరిత్రలో సినిమా గ్లామర్ అనేది ఎప్పుడూ శక్తివంతమైన ఆయుధమే. కానీ, 'దళపతి' విజయ్ స్థాపించిన తమిళగ వెట్రి కళగం (TVK) రాబోయే అసెంబ్లీ ఎన్నికల్లో 'కింగ్% అవుతుందో లేదో తెలియదు కానీ, 'కింగ్ మేకర్' అయ్యే అవకాశాలు మాత్రం మెండుగా కనిపిస్తున్నాయనే చర్చ రాజకీయ వర్గాల్లో జోరుగా సాగుతోంది.

తమిళనాడులో 234 స్థానాలు ఉన్నాయి. ఏ పార్టీ అయినా ప్రభుత్వాన్ని ఏర్పాటు చేయాలంటే 118 అనే మ్యాజిక్ ఫిగర్‌ అందుకోవాలి. దశాబ్దాలుగా డీఎంకే (డీఎంకే), ఏఐడీఎంకే (ఏఐడీఎంకే) మధ్యే అధికారం మారుతూ వస్తోంది. అయితే, ఈసారి విజయ్ ఎంట్రీతో ఈ రెండు ద్రవిడ పార్టీలకు స్పష్టమైన మెజారిటీ రావడం కష్టమనే అంచనాలు వెలువడుతున్నాయి. ఒకవేళ ఏ పార్టీకి 118 సీట్లు రాకపోతే, అప్పుడు విజయ్ టీవీకే పార్టీ మద్దతు కీలకం కానుంది.

విజయ్ పట్టు

విజయ్ తన ఎన్నికల ప్రచారం మొదటి నుంచి ఒకే మాట మీద ఉన్నారు. బయటి నుంచి మద్దతు ఇచ్చే ప్రసక్తే లేదని, ప్రభుత్వంలో భాగస్వామ్యం ఉండాలని ఆయన బలంగా కోరుకుంటున్నారు. రాష్ట్రంలో జరుగుతున్న చర్చల ప్రకారం, విజయ్ ఏకంగా ముఖ్యమంత్రి పదవినే ఆశిస్తున్నట్లు తెలుస్తోంది. కనీసం ఉప ముఖ్యమంత్రి పదవి, కీలక శాఖలు ఇస్తేనే పొత్తుకు మొగ్గు చూపుతారని సమాచారం.

స్టాలిన్ వర్సెస్ పళనిస్వామి

విజయ్ కింగ్ మేకర్‌గా మారే పరిస్థితి వస్తే, రెండు ప్రధాన పార్టీలు ఆయనను ప్రసన్నం చేసుకోవడానికి సిద్ధంగా ఉన్నాయి. స్టాలిన్ నేతృత్వంలోని డీఎంకే, ఏఐడీఎంకే రెండూ విజయ్‌కు డిప్యూటీ సీఎం పదవిని ఆఫర్ చేసే యోచనలో ఉన్నట్లు టాక్. ఎలాగైనా అధికారాన్ని దక్కించుకోవాలని చూస్తున్న ఏఐడీఎంకే, అవసరమైతే విజయ్‌కు సీఎం సీటును ఆఫర్ చేసి, వెనుక నుంచి చక్రం తిప్పాలని ప్లాన్ చేస్తోందట.

కమలనాథుల వ్యూహం

బీజేపీ (బీజేపీ) కూడా తమిళనాడులో పాగా వేయాలని అందుకు విజయ్‌ని ఒక సాధనంగా వాడుకోవాలని చూస్తోంది. మొదట విజయ్ పార్టీ అధికారంలోకి వస్తే, తర్వాత మెల్లగా రాష్ట్ర రాజకీయాలను తమ అదుపులోకి తీసుకోవచ్చనేది 'కమలనాథుల' వ్యూహంగా కనిపిస్తోంది.

ఎమ్మెల్యేలను కాపాడుకోగలరా?

రాజకీయాల్లో గెలిచినంత మాత్రాన సరిపోదు, గెలిచిన తన వారిని కాపాడుకోవడం ముఖ్యమే. ఇప్పటికే డీఎంకేకు చెందిన కీలక నేతలు, టీవీకే నుంచి పోటీ చేస్తున్న 'గెలుపు గుర్రాల'తో రహస్య చర్చలు జరుపుతున్నట్లు ఊహాగానాలు వినిపిస్తున్నాయి. ఒకవేళ హంగ్ ఏర్పడితే, పార్టీతో సంబంధం లేకుండా తమకు మద్దతు ఇవ్వాలని డీఎంకే నేతలు ప్రలోభపెడుతున్నట్లు వార్తలు వస్తున్నాయి. ఈ నేపథ్యంలో తన ఎమ్మెల్యేలను విజయ్ ఎంత వరకు రక్షించుకోగలరనేది పెద్ద ప్రశ్నే