ఎన్టీఆర్ పుట్టినరోజు కానుకగా ప్రశాంత్ నీల్ వదిలిన డ్రాగన్ గ్లింప్స్ నెట్టింట ఒక కొత్త సెన్సేషన్ క్రియేట్ చేస్తోంది. మామూలుగా గ్లింప్స్ అంటే ముప్పై సెకన్లు ఉంటుంది.

కానీ ఈసారి ఊహించని రేంజ్ లో 4 నిమిషాల 29 సెకన్ల నిడివితో నీల్ ఒక కొత్త ట్రెండ్ సెట్ చేశాడు. టాలీవుడ్ హిస్టరీలోనే ఇంత పెద్ద గ్లింప్స్ రావడం ఇదే తొలిసారి. అసలు తన సినిమాలో ఎలాంటి ప్రపంచం ఉండబోతోందో ప్రేక్షకులకు ముందే పరిచయం చేసి అంచనాలు పెంచేశాడు.

ఈ వీడియో చూస్తే అసలు కథ స్పాన్ ఎంత పెద్దదో క్లియర్ గా అర్థమవుతుంది. బ్రిటిష్ వాళ్ళు ఇండియాకు వ్యాపారం కోసం వచ్చి 250 ఏళ్లు ఇక్కడే ఉండిపోవడానికి కారణం ఓపియం పాపీ అనే మత్తుపదార్థం అని దర్శకుడు అసలు పాయింట్ చెప్పేశాడు. 1947లో వాళ్ళు వెళ్ళిపోతూ ఆ డ్రగ్ సామ్రాజ్యాన్ని ఇక్కడే వదిలేశారు. ఆ తర్వాత అది ఆఫ్ఘన్ ట్రేడింగ్ కంపెనీ, గోల్డెన్ ట్రేడింగ్ కంపెనీగా విడిపోయి ఓపియం వార్స్ మొదలయ్యాయి.

ఇదే డ్రాగన్ మెయిన్ ప్లాట్ అని డైరెక్టర్ చెప్పకనే చెప్పాడు.

కథ చెప్పిన తర్వాత ఆఫ్ఘన్ ట్రేడింగ్ కంపెనీలో ఉన్న విలన్స్ ను నీల్ తనదైన స్టైల్ లో పరిచయం చేశాడు. దాదా సర్కార్, రష్యన్ డిస్ట్రిబ్యూటర్స్, సోమాలియా లార్డ్ జనరల్ డురాన్ లాంటి క్యారెక్టర్స్ చూస్తుంటే కథ ప్రపంచవ్యాప్తంగా నడుస్తుందని తెలుస్తోంది. అలాగే ట్రైనర్ తో పాటు 91 డెత్స్ అనే ఒక గ్యాంగ్ ను చూపించి ఆ డార్క్ మాఫియా సెటప్ ఎంత వయలెంట్ గా ఉంటుందో ఒక క్లారిటీ ఇచ్చేశాడు.

ఇక ఈ డార్క్ వరల్డ్ లో దేవుడు విశ్రమించిన ఏడో రోజున ఒక డెవిల్ పుట్టిందంటూ ఎన్టీఆర్ ను లుగర్ గా పరిచయం చేసిన తీరు అద్భుతంగా ఉంది. ఆఫ్ఘన్ ట్రేడింగ్ కంపెనీకి అసాస్సిన్ ఇన్ చీఫ్ గా తారక్ ఎంట్రీ ఇచ్చాడు. శవాల గుట్టల మధ్య హ్యాపీ బర్త్ డే లుగర్ అని రాయడం నీల్ మార్క్ ఎలివేషన్. తారక్ కంప్లీట్ గా లీన్ లుక్ లో ఒక కొత్త అవతారంలో కనిపించాడు. ఆ బ్లాక్ వెస్ట్, కళ్ళజోడుతో రగ్గడ్ గా ఉన్న తారక్ ఆన్ స్క్రీన్ ప్రెజెన్స్ ఫ్యాన్స్ కి పూనకాలు తెప్పించేలా ఉంది.

ఈ గ్లింప్స్ లో తారక్ చెప్పిన డైలాగ్స్ క్యారెక్టరైజేషన్ ని ఇంకో లెవెల్ కి తీసుకెళ్లాయి. నిద్రపోయినప్పుడు నా కళ్ళలోకి నేను చంపిన వాళ్ళ ముఖాలు రావు, మిగిలున్న శత్రువుల ముఖాలే కనపడతాయి అని లుగర్ చెప్పిన డైలాగ్ సినిమాపై ఆసక్తిని పెంచుతోంది. పొరపాటున కూడా నా కళ్ళలోకి రావొద్దు అంటూ తారక్ ఇచ్చిన వార్నింగ్ అతడిలోని కోల్డ్ బ్లడెడ్ యాటిట్యూడ్ ను చూపిస్తోంది. మాటల్లోనే అంత పవర్ ఉంటే ఇక యాక్షన్ సీన్స్ లో లుగర్ విధ్వంసం ఎలా ఉంటుందో ఊహించుకోవచ్చు.