ఇండియన్ సినిమా అంటే ఒకప్పుడు బాలీవుడ్, టాలీవుడ్, కోలీవుడ్ వంటి పెద్ద ఇండస్ట్రీల చుట్టూనే ఎక్కువ డిస్కషన్ జరిగేది. కానీ ఇప్పుడు పరిస్థితి క్రమంగా మారుతోంది.
చిన్న మార్కెట్ ఉన్న ప్రాంతీయ చిత్ర పరిశ్రమలు కూడా పెద్ద ఇండస్ట్రీల దృష్టిని ఆకర్షిస్తున్నాయి. గుజరాతీ, మరాఠీ, బెంగాలీ, కన్నడ, మలయాళ చిత్ర పరిశ్రమల నుంచి వస్తున్న కొన్ని కథలు ఇప్పుడు దేశవ్యాప్తంగా సినీ వర్గాల్లో డిస్కషన్ కు వస్తున్నాయి.
దీనికి ప్రధాన కారణం మారుతున్న ప్రేక్షకుల అభిరుచి. భారీ సెట్లు, స్టార్ హీరోలు, వందల కోట్ల బడ్జెట్ కంటే కథలో కొత్తదనం ఉంటే ప్రేక్షకులు ఏ భాష సినిమా అయినా ఆదరిస్తున్న పరిస్థితి ఏర్పడింది. ముఖ్యంగా డిజిటల్ ప్లాట్ఫార్మ్ల విస్తరణతో రీజనల్ సినిమాలు కూడా ఇతర భాషల ప్రేక్షకులకు చేరువవుతున్నాయి. దీంతో పెద్ద నిర్మాణ సంస్థలకు కొత్త కథల కోసం తమ సొంత ఇండస్ట్రీలకే పరిమితం కావాల్సిన అవసరం తగ్గుతోంది.
ఒక ప్రాంతంలో సక్సెస్ఫుల్ స్టోరీని మరో ప్రాంతం ప్రేక్షకులకు తగ్గట్టు కొత్తగా తీర్చిదిద్దడం ఇప్పుడు ఒక స్పెషల్ స్ట్రాటజీగా మారుతోంది. అయితే ఇది కేవలం రీమేక్ల వ్యవహారంగా మాత్రమే చూడలేం. స్థానిక సంస్కృతి, ఎమోషన్స్, ఆడియన్స్ అభిరుచికి అనుగుణంగా కథను మార్చడం ద్వారా అదే మూలకథకు పూర్తిగా భిన్నమైన రూపం ఇవ్వాలనే ప్రయత్నాలు కూడా పెరుగుతున్నాయి.
ఇదే సమయంలో మైథాలజీ, భక్తి, విశ్వాసం వంటి అంశాలకు మళ్లీ ప్రాధాన్యం పెరుగుతోంది. ఒకప్పుడు దేవుళ్ల పాత్రల్లో నటించడం స్టార్ హీరోలకు అసాధారణ విషయం కాదు. కానీ ఇప్పుడు పరిస్థితి పూర్తిగా మారిపోయింది. ఏ స్టార్ హీరో ఏ మైథాలజీ పాత్రలో కనిపించబోతున్నాడనే ఒక్క డిస్కషనే సోషల్ మీడియాలో భారీ డిబేట్కు దారి తీస్తోంది. హీరో లుక్ ఎలా ఉండాలి, హీరోని దేవుడిలా చూపించేటప్పుడు ట్రెడిషనల్ గా చూపించాలా లేక ఆ పాత్రను మోడ్రన్ గా తీర్చిదిద్దాలా అనే అంశాలపై ఆడియన్స్ అంచనాలు కూడా పెరిగిపోయాయి.
అంటే చిన్న ఇండస్ట్రీల నుంచి వస్తున్న కథలు కేవలం పెద్ద మార్కెట్లకు రీమేక్ మెటీరియల్గా మాత్రమే మారడం లేదు. కొత్త జానర్లు, విభిన్నమైన క్యారెక్టర్లు, భారతీయ సంస్కృతికి సంబంధించిన కథలను కూడా పెద్ద స్థాయిలో ఆలోచించేలా చేస్తున్నాయి. రాబోయే రోజుల్లో స్టార్ పవర్ కంటే ముందుగా కథ ఎక్కడి నుంచి వచ్చింది అన్నదానికంటే, అందులో ఎంత కొత్తదనం ఉంది అన్నదే ఇండియన్ సినిమా మార్కెట్లో కీలకంగా మారే అవకాశం కనిపిస్తోంది.