డిజిటల్ యుగంలో సోషల్ మీడియా యువతపై ముఖ్యంగా చిన్న పిల్లలపై చూపుతున్న ప్రభావంపై ప్రపంచవ్యాప్తంగా పెద్ద ఎత్తున చర్చ జరుగుతోంది. ఈ నేపథ్యంలో డెన్మార్క్ ప్రధాని మెట్టె ఫ్రెడెరిక్సన్ చేసిన కొన్ని సంచలన వ్యాఖ్యలు ఇప్పుడు అంతర్జాతీయంగా తీవ్ర చర్చనీయాంశంగా మారాయి.
చిన్నపిల్లలు సోషల్ మీడియాను వినియోగించడం కంటే వారికి సిగరెట్ తాగేందుకు అనుమతించడం మేలని తాను భావిస్తున్నానంటూ ఆమె వ్యాఖ్యానించడం అందరినీ ఆశ్చర్యానికి గురిచేసింది.
పాత ముప్పుల కంటే కొత్త ప్రమాదాలే ఎక్కువ!
ఇటీవల జరిగిన ఒక అంతర్జాతీయ సదస్సులో మాట్లాడిన ఫ్రెడెరిక్సన్, డిజిటల్ వేదికలు యువత మానసిక ఆరోగ్యం, సామాజిక ప్రవర్తనపై చూపుతున్న ప్రతికూల ప్రభావాలను తీవ్రంగా ప్రస్తావించారు. సోషల్ మీడియా వల్ల సమాజానికి కలిగే ప్రమాదాలను మనం ఇంకా పూర్తిగా గుర్తించలేకపోతున్నామని ఆమె ఆవేదన వ్యక్తం చేశారు.
ఈ సందర్భంగా ఆమె మాట్లాడుతూ "నాకు చిన్న పిల్లలు ఉంటే వారిని సోషల్ మీడియాలో ఒంటరిగా వదిలేయడం కంటే స్మోకింగ్ చేసేందుకు అనుమతించడమే మేలని నేను వ్యక్తిగతంగా భావిస్తాను. అయితే నేను ఒక దేశ ప్రధాని బాధ్యతల్లో ఉన్నాను కాబట్టి అలా నేరుగా అధికారికంగా చెప్పలేను." అని పేర్కొన్నారు. ప్రస్తుత సమాజం ఇప్పటికీ పాత ముప్పులైన ధూమపానం, మద్యపానం వంటివి గురించే ఎక్కువగా ఆలోచిస్తోందని, కానీ టెక్నాలజీ రూపంలో పొంచి ఉన్న కొత్త తరహా డిజిటల్ ప్రమాదాలను చాలా తక్కువగా అంచనా వేస్తోందని ఆమె హెచ్చరించారు.
యువతపై డిజిటల్ వ్యసనం ప్రభావం
సోషల్ మీడియా ద్వారా పిల్లలు, యువత ఎదుర్కొంటున్న అనేక సమస్యలను డెన్మార్క్ ప్రధాని వర్గీకరించారు.. లైక్లు, వ్యూస్ కోసం ఆరాటపడటం, ఇతరుల జీవితాలతో పోల్చుకోవడం వల్ల పిల్లల్లో తీవ్ర మానసిక ఆందోళన పెరుగుతోంది. రీల్స్, షార్ట్స్ వంటి అల్గారిథమ్స్కు అలవాటుపడి గంటల తరబడి సమయాన్ని వృథా చేస్తున్నారు. అపరిచితుల బారిన పడటం, సైబర్ వేధింపుల వల్ల చిన్న వయసులోనే పిల్లలు తీవ్రంగా నలిగిపోతున్నారు. సోషల్ మీడియాలో వచ్చే ఫేక్ న్యూస్ వల్ల యువత ఆలోచనా విధానం దెబ్బతింటోంది.
ఐరోపా దేశాల కఠిన చర్యలు
ఇటీవలి కాలంలో యూరప్లోని అనేక దేశాలు పిల్లల సోషల్ మీడియా వినియోగంపై కఠిన నిబంధనల అమలుకు గట్టి ప్రయత్నాలు చేస్తున్నాయి. ముఖ్యంగా చిన్న వయసు పిల్లలకు సోషల్ మీడియా యాక్సెస్ను పూర్తిగా పరిమితం చేయడం.. బలమైన వయస్సు ధృవీకరణ వ్యవస్థలను తీసుకురావడం, డిజిటల్ ప్లాట్ఫారమ్ల జవాబుదారీతనాన్ని పెంచడం వంటి చర్యలపై అక్కడ ముమ్మరంగా చర్చలు జరుగుతున్నాయి.
ప్రపంచవ్యాప్తంగా మిశ్రమ స్పందన
ఫ్రెడెరిక్సన్ చేసిన ఈ వ్యాఖ్యలు అంతర్జాతీయ సమాజంలో ఒక కొత్త చర్చకు తెరలేపాయి. కొందరు ఆమె వ్యాఖ్యలను కేవలం అతిశయోక్తిగా అభివర్ణిస్తుండగా మరికొందరు మాత్రం యువత మానసిక ఆరోగ్యంపై పెరుగుతున్న ఆందోళనలను ప్రతిబింబించే ఒక తీవ్రమైన హెచ్చరికగా దీనిని సమర్థిస్తున్నారు. డిజిటల్ యుగంలో పిల్లల భద్రత, మానసిక ఆరోగ్యం, సాంకేతికత వినియోగం మధ్య సమతుల్యతను ఎలా సాధించాలన్నది ఇప్పుడు ప్రపంచ దేశాల ముందున్న అతిపెద్ద సవాలుగా మారింది.