టాలీవుడ్లో స్టైలిష్ మేకింగ్, హై-వోల్టేజ్ యాక్షన్ సీక్వెన్సెస్తో ప్రత్యేక ముద్ర వేసుకున్న దర్శకుడు సురేందర్ రెడ్డి కెరీర్లో క్లిష్టమైన దశను ఎదుర్కొంటున్నారు.
`రేసుగుర్రం`, `కిక్`, `ధ్రువ` వంటి భారీ బ్లాక్బస్టర్ విజయాలను అందించిన క్రేజీ డైరెక్టర్కు అఖిల్ అక్కినేని కథానాయకుడిగా తెరకెక్కించిన `ఏజెంట్` చిత్రం తీవ్ర నిరాశను మిగిల్చింది. ఈ సినిమా బాక్సాఫీస్ వద్ద అనుకున్న స్థాయిలో రాణించకపోవడంతో సూరి తదుపరి అడుగులపై పెద్ద ఎత్తున అనిశ్చితి నెలకొంది.
భారీ అంచనాలతో రిలీజ్ అయిన `ఏజెంట్` ఫలితం సురేందర్ రెడ్డి కెరీర్ గ్రాఫ్కు అనుకోని బ్రేక్ వేసింది. ఈ ప్లాప్ తర్వాత ఆయన రీ-ఎంట్రీ ఏ విధంగా ఉండబోతోందనే అంశంపై టాలీవుడ్ వర్గాల్లో తీవ్ర చర్చ సాగుతోంది. ఒక విఫలం తర్వాత వెంటనే ఓ భారీ విజయాన్ని అందించి ఫామ్లోకి రావడం ఏ దర్శకుడికైనా అత్యంత కీలకం. అయితే `ఏజెంట్` తర్వాత సురేందర్ రెడ్డి కొత్త ప్రాజెక్ట్ను పట్టాలెక్కించే విషయంలో ఊహించని ఆలస్యం జరుగుతోంది.
పవర్ స్టార్ పవన్ కళ్యాణ్ హీరోగా సురేందర్ రెడ్డి దర్శకత్వంలో భారీ చిత్రాన్ని గతంలోనే అధికారికంగా ప్రకటించిన సంగతి తెలిసిందే. రామ్ తాళ్లూరి నిర్మాణంలో పట్టాలెక్కాల్సిన ప్రాజెక్ట్పై అభిమానుల్లో భారీ అంచనాలున్నాయి. అయితే ప్రస్తుతం పవన్ కళ్యాణ్ రాజకీయ ప్రాధాన్యతలు, ఇతర సినిమాలతో బిజీగా ఉన్నారు. దీంతో ఈ కాంబినేషన్ సెట్స్ పైకి వెళ్లే విషయంలో క్లారిటీ లేదు. సినిమా హోల్డ్లో పడటంతో సురేందర్ రెడ్డి ఎలాంటి నిర్ణయం తీసుకోవాలనే డైలమాలో పడ్డారు. పవన్ డేట్స్ కోసం ఇంకా వేచి చూడాలా లేక ఈలోగా మరొక హీరోతో మీడియం బడ్జెట్ ఎంటర్టైనర్ను లైన్లోకి తీసుకురావాలా? అనే కోణంలో ఆలోచనలు చేస్తున్నట్లు ఫిలింనగర్ టాక్.
లాంగ్ గ్యాప్ రాకుండా ఉండేందుకు వేరే ప్రాజెక్ట్ను ముందుగా పట్టాలెక్కించడమే మంచిదనే అభిప్రాయం కూడా వ్యక్తమవుతోంది. ప్రస్తుతం టాలీవుడ్లో కొత్తతరం కథలు, వినూత్నమైన కాన్సెప్ట్లకు ప్రేక్షకులు బ్రహ్మరథం పడుతున్నారు. ఈ నేపథ్యంలో సురేందర్ రెడ్డి కూడా తన వద్ద ఉన్న స్క్రిప్ట్లను మళ్లీ రీ-వర్క్ చేసి మారుతున్న ప్రేక్షకుల అభిరుచికి అనుగుణంగా పక్కా కథను సిద్ధం చేసే అవకాశం లేకపోలేదు. స్టైలిష్ మేకింగ్కు బలమైన ఎమోషనల్ అండ్ గ్రిప్పింగ్ కథనం తోడైతే సూరి బౌన్స్ బ్యాక్ అవ్వడం పెద్ద కష్టమేమీ కాదు. మరి సూరి ఏ హీరో సినిమాతో ప్రేక్షకుల ముందుకొస్తాడో చూడాలి.