టాలీవుడ్ మెగా పవర్ స్టార్ రామ్ చరణ్, స్టార్ డైరెక్టర్ బుచ్చిబాబు సనా కాంబోలో వస్తున్న భారీ పాన్ ఇండియా మూవీ 'పెద్ది' బాక్సాఫీస్ వద్ద ఇప్పుడే తన విశ్వరూపం చూపిస్తోంది.

సినిమా విడుదల కాకముందే నార్త్ అమెరికాలో రికార్డు స్థాయి అడ్వాన్స్ బుకింగ్స్‌తో గ్లోబల్ స్టార్ రేంజ్ ఏంటో రామ్ చరణ్ మరోసారి నిరూపించాడు. బాలీవుడ్ బ్యూటీ జాన్వీ కపూర్ హీరోయిన్‌గా నటిస్తున్న ఈ క్రేజీ ప్రాజెక్ట్ సాధిస్తున్న సరికొత్త రికార్డులు మరియు సినిమా విశేషాలు ఇప్పుడు చూద్దాం..

నార్త్ అమెరికాలో పెద్ది ఊచకోత:

సాధారణంగా ఏ సినిమాకైనా ట్రైలర్ రిలీజ్ అయ్యాక బుకింగ్స్ ఊపందుకుంటాయి.కానీ 'పెద్ది' సినిమా విషయంలో మాత్రం కేవలం పోస్టర్లు,రెండు పాటలతోనే నార్త్ అమెరికాలో రికార్డులు తిరగరాస్తోంది.ఇక అక్కడ జూన్ 4న ప్రీమియర్స్ జరగనుండగా,ఇంకా చాలా సమయం ఉండగానే అప్పుడే 10,000కు పైగా ప్రీమియర్ టికెట్లు అమ్ముడైపోయాయి.ఇక చరణ్ క్రేజ్ చూసి ట్రేడ్ వర్గాలు సైతం నోరెళ్లబెడుతున్నాయి.

గ్లోబల్ స్టార్ ఖాతాలో మరో రికార్డ్:

ఆర్ఆర్ఆర్ సినిమాతో అంతర్జాతీయంగా గుర్తింపు తెచ్చుకున్న రామ్ చరణ్, 'పెద్ది' చిత్రంతో తన గ్లోబల్ మార్కెట్‌ను మరింత పెంచుకున్నాడు. ట్రైలర్ రాకముందే ఈ స్థాయి బుకింగ్స్ జరిగాయంటే, ఇక ట్రైలర్ రిలీజ్ అయ్యాక బాక్సాఫీస్ దగ్గర ఎలాంటి సునామీ రాబోతుందో ఊహించుకోవచ్చు. మెగా అభిమానులు ఇప్పుడే సోషల్ మీడియాలో కాలర్ ఎగరేస్తూ సందడి చేస్తున్నారు.

మెగా కాంబినేషన్:

క్లాసిక్ హిట్ అయిన 'ఉప్పెన' తర్వాత బుచ్చిబాబు సనా ఎంతో ప్రతిష్టాత్మకంగా ఈ చిత్రాన్ని రూపొందిస్తున్నారు. ఈ సినిమాలో కన్నడ సూపర్ స్టార్ శివ రాజ్‌కుమార్, జగపతి బాబు, సత్య లాంటి భారీ తారాగణం నటిస్తున్నారు.ఇక వృద్ధి సినిమాస్, మైత్రీ మూవీ మేకర్స్, సుకుమార్ రైటింగ్స్ సంయుక్తంగా ఈ సినిమాను భారీ బడ్జెట్‌తో నిర్మిస్తున్నాయి.