ప్రపంచం మరోసారి యుద్ధ మేఘాల నీడన చిక్కుకుంది. పశ్చిమాసియాలో ఇరాన్-అమెరికా మధ్య నెలకొన్న తీవ్ర ఉద్రిక్తతలు అంతర్జాతీయ సరఫరా గొలుసులను చిన్నాభిన్నం చేస్తున్నాయి.
సముద్ర మార్గాల్లో భద్రతా లేమి, ఆకాశాన్ని తాకుతున్న ఇంధన ధరలు, సరుకు రవాణా నౌకల మళ్లింపు వంటి ప్రతికూలతలు ప్రపంచ దేశాల ఆర్థిక వ్యవస్థలను కుదిపేస్తుంటే భారత్ మాత్రం వీటన్నింటినీ తట్టుకుని సరికొత్త రికార్డులను సృష్టిస్తోంది. 2026 ఏప్రిల్ నెలకు సంబంధించిన వాణిజ్య గణాంకాలు భారత ఆర్థిక వ్యవస్థ పటిష్టతను ప్రపంచానికి చాటిచెప్పాయి.
రికార్డు స్థాయి వృద్ధి.. గణాంకాల విశ్లేషణ
తాజా అధికారిక సమాచారం ప్రకారం.. ఏప్రిల్ నెలలో భారత మొత్తం ఎగుమతులు వస్తువులు, సేవలు కలిపి గతేడాది ఇదే సమయంతో పోలిస్తే 13.6 శాతం వృద్ధిని నమోదు చేసి.. 80.8 బిలియన్ డాలర్ల అసాధారణ మైలురాయిని చేరుకున్నాయి. వస్తువుల ఎగుమతులు 43.56 బిలియన్ డాలర్లు కాగా... సేవల ఎగుమతులు.. 37.2 బిలియన్ డాలర్లుగా ఉంది. ముఖ్యంగా ఐటీ రంగానికి తోడు ఫార్మాస్యూటికల్స్, ఇంజినీరింగ్ వస్తువులు, రసాయనాలు, వ్యవసాయ ఉత్పత్తుల రంగాల్లో నమోదైన రెండంకెల వృద్ధి భారత్ను గ్లోబల్ ట్రేడ్ మ్యాప్లో అగ్రస్థానంలో నిలిపింది.
భౌగోళిక రాజకీయ ఉద్రిక్తతలు.. భారత్కు సానుకూలత
పశ్చిమాసియాలో యుద్ధ వాతావరణం వల్ల హార్ముజ్ జలసంధి వంటి కీలక జలమార్గాలు ప్రమాదంలో పడ్డాయి. అయితే ఈ అనిశ్చితిని భారత్ తన వ్యూహాత్మక దౌత్యం, పటిష్టమైన ఉత్పత్తి సామర్థ్యంతో అధిగమించింది. గల్ఫ్ ప్రాంతంలో ఉద్రిక్తతల కారణంగా అంతర్జాతీయ కొనుగోలుదారులు ప్రత్యామ్నాయ సరఫరాదారుల కోసం వెతుకుతున్న తరుణంలో భారత్ అత్యంత నమ్మదగిన భాగస్వామిగా అవతరించింది.
యూరప్, అమెరికా, ఆఫ్రికా, ఆగ్నేయ ఆసియా దేశాల నుంచి భారత ఉత్పత్తులకు డిమాండ్ విపరీతంగా పెరిగింది. సరఫరాలో జాప్యం జరగకుండా ప్రభుత్వం తీసుకున్న ముందస్తు చర్యలు, నౌకల భద్రతకు కల్పించిన భరోసా ఈ విజయానికి మూలస్తంభాలుగా నిలిచాయి.
దిగుమతుల తీరు తెన్నులు
ఎగుమతులతో పాటు దిగుమతులు కూడా పెరిగాయి. గతేడాది ఏప్రిల్లో 82.3 బిలియన్ డాలర్లుగా ఉన్న దిగుమతులు ఈసారి 88.6 బిలియన్ డాలర్లకు చేరాయి. దీనికి ప్రధాన కారణం అంతర్జాతీయ మార్కెట్లో పెరిగిన ముడి చమురు ధరలు. యుద్ధ భయం వల్ల చమురు నిల్వలను పెంచుకోవడం, పారిశ్రామిక అవసరాల కోసం బంగారం, ఎలక్ట్రానిక్ విడిభాగాలు, ముడిసరుకుల దిగుమతి పెరగడం వాణిజ్య లోటుపై స్వల్ప ప్రభావాన్ని చూపింది. అయినప్పటికీ ఎగుమతులలోని జోరు ఈ ఒత్తిడిని సమర్థవంతంగా బ్యాలెన్స్ చేస్తోంది.
ప్రభుత్వ విధానాల సత్ఫలితాలు
భారత వాణిజ్య రంగం ఇంతటి స్థిరత్వాన్ని ప్రదర్శించడానికి కేంద్ర ప్రభుత్వం అమలు చేస్తున్న విప్లవాత్మక పథకాలే కారణమని విశ్లేషకులు అభిప్రాయపడుతున్నారు. మేక్ ఇన్ ఇండియాతో స్థానిక ఉత్పత్తిని పెంచి, విదేశీ దిగుమతులపై ఆధారపడటాన్ని తగ్గించింది. ఉత్పత్తి ఆధారిత ప్రోత్సాహకాల ద్వారా ఎలక్ట్రానిక్స్, ఫార్మా రంగాల్లో భారత్ గ్లోబల్ హబ్గా మారింది. వ్యూహాత్మక వాణిజ్య ఒప్పందాలు వల్ల వివిధ దేశాలతో కుదుర్చుకున్న ద్వైపాక్షిక ఒప్పందాలు ఎగుమతులకు సులభతర మార్గాలను ఏర్పరిచాయి.
విశ్వగురువు దిశగా అడుగులు
ప్రపంచం ఆర్థిక మాంద్యం, యుద్ధ భయాల మధ్య కొట్టుమిట్టాడుతున్న వేళ భారత్ సాధించిన ఈ 80.8 బిలియన్ డాలర్ల వాణిజ్యం సామాన్యమైన విషయం కాదు. ఇది కేవలం అంకెలకు పరిమితమైన విజయం కాదు.. భారత పారిశ్రామిక శక్తికి, సేవల రంగం యొక్క నైపుణ్యానికి, పటిష్టమైన నాయకత్వానికి నిదర్శనం. రాబోయే నెలల్లో కూడా ఇదే జోరు కొనసాగితే ప్రస్తుత ఆర్థిక సంవత్సరంలో భారత్ ప్రపంచ వాణిజ్యంలో తన సరికొత్త చరిత్రను లిఖించడం ఖాయంగా కనిపిస్తోంది.