By - jyotsna |22 May 2026 7:00 AM IST

మృతుల్లో ఆరుగురు పోలీసులు, 19 మంది వ్యవసాయ కార్మికులు

మధ్య అమెరికా దేశం హోండురస్‌లో హింస పెచ్చరిల్లింది.

గురువారం వేర్వేరు ప్రాంతాల్లో దుండగులు జరిపిన రెండు వేర్వేరు దాడుల్లో ఆరుగురు పోలీసులు సహా కనీసం 25 మంది ప్రాణాలు కోల్పోయారు. ఈ ఘటనలతో దేశవ్యాప్తంగా తీవ్ర భయాందోళనలు వ్యక్తమవుతున్నాయి. అధికారులు తెలిపిన వివరాల ప్రకారం.. ఈ దాడులు గ్యాంగ్‌ల కార్యకలాపాలు, భూవివాదాలతో ముడిపడి ఉన్నట్టు తెలుస్తోంది.

కార్మికులపై కాల్పులు.. పోలీసులే లక్ష్యంగా దాడి

పబ్లిక్ ప్రాసిక్యూటర్ కార్యాలయ ప్రతినిధి యూరీ మోరా ప్రకారం.. మొదటి ఘటన దేశ ఉత్తర ప్రాంతంలోని ట్రుజిల్లో మున్సిపాలిటీ పరిధిలో ఉన్న ఒక వ్యవసాయ క్షేత్రంలో జరిగింది. ఇక్కడ పనిచేస్తున్న కార్మికులపై సాయుధులైన దుండగులు విచక్షణారహితంగా కాల్పులు జరపడంతో 19 మంది అక్కడికక్కడే మరణించారు. అయితే, మృతుల బంధువులు తమ వారి మృతదేహాలను సంఘటనా స్థలం నుంచి తీసుకువెళ్లడంతో మృతుల సంఖ్యను కచ్చితంగా నిర్ధారించడం కష్టంగా మారిందని జాతీయ పోలీసు ప్రతినిధి ఎడ్గార్డో బరహోనా చెప్పినట్టు అసోసియేటెడ్ ప్రెస్ (ఏపీ) పేర్కొంది. ఘటనపై దర్యాప్తు చేసేందుకు ప్రత్యేక బృందాలను పంపించారు.

ఇక రెండో దాడి.. గ్వాటెమాలా సరిహద్దుకు సమీపంలోని కోర్టెస్ డిపార్ట్‌మెంట్‌లోని ఓమోవా మున్సిపాలిటీలో జరిగింది. రాజధాని టెగుసిగల్పా నుంచి గ్యాంగ్‌లకు వ్యతిరేకంగా ఒక మిషన్‌పై వెళ్తున్న పోలీసుల వాహనంపై దుండగులు మెరుపుదాడి చేశారు. ఈ దాడిలో ఒక సీనియర్ అధికారి సహా ఆరుగురు పోలీసులు మరణించినట్లు అధికారులు ధ్రువీకరించారు.

భూవివాదాలు, పర్యావరణ కార్యకర్తలకు ప్రమాదకరం

ట్రుజిల్లో ప్రాంతం సహజ వనరులతో సమృద్ధిగా ఉన్నప్పటికీ, దశాబ్దాలుగా తీవ్రమైన భూవివాదాలతో అట్టుడుకుతోంది. ఈ ప్రాంతంలో పర్యావరణ పరిరక్షణ, భూహక్కుల కోసం పనిచేసే కార్యకర్తలపై బెదిరింపులు, దాడులు సర్వసాధారణంగా మారాయి. 2024లో పర్యావరణ నాయకుడు జువాన్ లోపెజ్‌ను హత్య చేసిన ఘటన ఇక్కడ కార్యకర్తలు ఎదుర్కొంటున్న ప్రమాదకర పరిస్థితులకు అద్దం పడుతోంది. గ్లోబల్ విట్‌నెస్ అనే ఎన్జీవో ప్రకారం 2024లో ఐదుగురు, అంతకుముందు ఏడాది 18 మంది పర్యావరణవేత్తలు హోండురస్‌లో హత్యకు గురయ్యారు.

ఈ రెండు దాడులపై హోండురస్ ప్రభుత్వం తీవ్రంగా స్పందించింది. నేషనల్ పోలీస్, సాయుధ బలగాలను వెంటనే ఆయా ప్రాంతాలకు తరలించినట్లు భద్రతా మంత్రిత్వ శాఖ తెలిపింది. ఫోరెన్సిక్ నిపుణులు, ప్రాసిక్యూటర్లతో కూడిన ప్రత్యేక బృందాలను ఏర్పాటు చేసి దర్యాప్తును వేగవంతం చేయనున్నట్లు ప్రకటించింది.

హోండురస్ చాలాకాలంగా గ్యాంగ్‌లు, మాదకద్రవ్యాల అక్రమ రవాణాతో ముడిపడిన అధిక నేరాల రేటుతో పోరాడుతోంది. అయితే, ప్రపంచ బ్యాంకు గణాంకాల ప్రకారం 2011లో గరిష్ఠ స్థాయికి చేరిన హత్యల రేటు గత కొన్నేళ్లుగా గణనీయంగా తగ్గుముఖం పట్టింది. నేరాలను అరికట్టేందుకు ప్రభుత్వం అనుసరిస్తున్న సైనిక విధానాలపై అంతర్జాతీయ మానవ హక్కుల సంస్థలు విమర్శలు చేస్తున్నాయి. ఈ క్రమంలోనే మూడేళ్లపాటు రాజ్యాంగ హక్కులను నిలిపివేస్తూ విధించిన 'స్టేట్ ఆఫ్ ఎక్సెప్షన్' జనవరి 2026లో ముగిసింది.