By - jyotsna |14 May 2026 11:15 AM IST

రూబియో పేరు మార్పుపై ఆసక్తికర చర్చ

అమెరికా అధ్యక్షుడు డొనాల్డ్ ట్రంప్ తన మంత్రివర్గ సభ్యులతో కలిసి ప్రస్తుతం చైనాలో పర్యటిస్తున్నారు.

ఈ పర్యటనలో అమెరికా విదేశాంగ మంత్రి మార్కో రూబియోకు సంబంధించిన ఆసక్తికర విషయం వెలుగులోకి రావడంతో అంతర్జాతీయ వర్గాల్లో చర్చ మొదలైంది.

'మార్కో లూ'గా చైనాలో అడుగుపెట్టిన రూబియో

చైనా పర్యటన సందర్భంగా మార్కో రూబియో తన పేరులో మార్పు చేసుకుని 'మార్కో లూ' పేరుతో అక్కడికి వెళ్లినట్లు సమాచారం. చైనాతో ఉన్న దౌత్యపరమైన సున్నిత పరిస్థితుల నేపథ్యంలో ఈ నిర్ణయం తీసుకున్నట్లు తెలుస్తోంది.

వీగర్ ముస్లింల అంశంపై గత విమర్శలు

సెనెటర్‌గా ఉన్న సమయంలో మార్కో రూబియో చైనా కమ్యూనిస్టు పార్టీపై తీవ్ర విమర్శలు చేశారు. ముఖ్యంగా వీగర్ ముస్లింలపై చైనా అమానుష చర్యలకు పాల్పడుతోందని ఆరోపించారు. లక్షలాది మంది వీగర్లు శిబిరాల్లో నిర్బంధంలో ఉన్నారని, బలవంతపు పనులు చేయిస్తున్నారని ఆయన పలు సందర్భాల్లో పేర్కొన్నారు.

2020 నుంచి చైనా ప్రవేశ నిషేధం

రూబియో చేసిన ఆరోపణలపై తీవ్ర ఆగ్రహం వ్యక్తం చేసిన చైనా ప్రభుత్వం 2020 నుంచి ఆయనపై ప్రవేశ నిషేధం విధించింది. ఆంక్షలు ఇప్పటికీ కొనసాగుతున్నప్పటికీ, ప్రస్తుతం అమెరికా విదేశాంగ మంత్రిగా ఉన్న దౌత్య హోదా కారణంగా ఈ పర్యటనకు అనుమతి లభించినట్లు సమాచారం.

ట్రంప్-షీ భేటీపై ప్రపంచ దృష్టి

చైనా అధ్యక్షుడు షీ జిన్‌పింగ్‌తో ట్రంప్ భేటీ కావడం అంతర్జాతీయంగా ప్రాధాన్యత సంతరించుకుంది. తైవాన్ అంశంతో పాటు పశ్చిమాసియా పరిస్థితులు, ఇంధన సంక్షోభం వంటి కీలక అంశాలపై ఇరువురు నేతలు చర్చించినట్లు తెలుస్తోంది.

ఇరాన్ చమురు అంశం కూడా చర్చలోకి?

ప్రస్తుతం ఇరాన్ నుంచి అధిక మొత్తంలో ముడి చమురును దిగుమతి చేసుకుంటున్న దేశాల్లో చైనా ముందంజలో ఉంది. పశ్చిమాసియాలో ఉద్రిక్తతలు కొనసాగుతున్న సమయంలో ట్రంప్ పర్యటన జరగడం వల్ల ఇరాన్ అంశం కూడా చర్చల్లో భాగమై ఉండొచ్చన్న అభిప్రాయాలు వ్యక్తమవుతున్నాయి.