By - jyotsna |25 May 2026 1:30 PM IST

ఘటనలో పారాగ్లైడర్‌, పైలట్ గాయ

ఆస్ట్రియాలో ఓ పారాగ్లైడర్ తృటిలో ప్రాణాపాయం నుంచి బయటపడిన ఘటన సంచలనం రేపుతోంది.

పారాచూట్ సాయంతో గాల్లో విహరిస్తున్న సమయంలో ఓ సైట్‌సీయింగ్ విమానం అకస్మాత్తుగా ఢీకొట్టడంతో భారీ ప్రమాదం తప్పింది. ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది.

ఆల్ప్స్ పర్వతాల్లో ఘటన

ఈ షాకింగ్ ఘటన ఆస్ట్రియాలోని చిమిటన్‌హోహే పర్వత ప్రాంతంలో శనివారం మధ్యాహ్నం చోటుచేసుకుంది. ఈ ప్రాంతం పారాగ్లైడింగ్‌కు ప్రసిద్ధి చెందింది. స్థానిక పోలీసుల వివరాల ప్రకారం.. 44 ఏళ్ల సబ్రినా అనే మహిళ గాల్లో పారాగ్లైడింగ్ చేస్తుండగా ఓ విమానం ఆమె పారాచూట్‌ను ఢీకొట్టింది.

రెండు ముక్కలైన పారాచూట్

విమానం ఢీకొట్టడంతో పారాచూట్ దెబ్బతిని రెండు భాగాలైంది. దీంతో సబ్రినా నియంత్రణ కోల్పోయి గాల్లోనే గింగిరాలు తిరుగుతూ కిందపడిపోవడం ప్రారంభించింది. భయంతో ఆమె గట్టిగా అరుస్తూ కనిపించింది. ఈ మొత్తం ఘటన ఆమె పారాచూట్‌కు అమర్చిన కెమెరాలో రికార్డైంది.

ఎమర్జెన్సీ పారాచూట్‌తో ప్రాణాపాయం తప్పింది

ప్రమాదాన్ని గుర్తించిన సబ్రినా వెంటనే సమయస్ఫూర్తితో తన వద్ద ఉన్న రిజర్వ్ లేదా ఎమర్జెన్సీ పారాచూట్‌ను తెరిచింది. దీంతో చివరి క్షణంలో ఆమె సురక్షితంగా ల్యాండ్ అయింది. సమాచారం అందుకున్న పోలీసులు హెలికాప్టర్‌తో ఘటనాస్థలానికి చేరుకుని ఆమెను ఆస్పత్రికి తరలించారు. స్వల్ప గాయాలతో ఆమె బయటపడినట్లు అధికారులు తెలిపారు.

పైలట్ వివరణ

జెల్ ఆమ్ సీ విమానాశ్రయంలో ల్యాండ్ అయిన తర్వాత విమాన పైలట్ ఈ ఘటనపై స్పందించారు. సమీపానికి వెళ్లేవరకు పారాగ్లైడర్ కనిపించలేదని, ఆ సమయంలో విమానాన్ని పూర్తిగా నియంత్రించడం సాధ్యపడలేదని తెలిపారు. ప్రమాదంపై పూర్తి స్థాయి దర్యాప్తు కొనసాగుతోందని అధికారులు వెల్లడించారు.