By - jyotsna |22 May 2026 7:34 AM IST

గంటల వ్యవధిలో తల్లి, భర్తను కోల్పోయిన మహిళ

ఉత్తరప్రదేశ్‌లో హృదయ విదారక ఘటన చోటుచేసుకుంది. తల్లి మరణంతో తీవ్ర విషాదంలో ఉన్న ఓ మహిళకు, కొన్ని గంటల వ్యవధిలోనే భర్తను కూడా కోల్పోవాల్సిన దుర్భర పరిస్థితి ఎదురైంది.

ఈ దారుణ ఘటన గోండా జిల్లాలోని ఘాగ్రా నది తీరంలో జరిగింది.

గ్రేటర్ నోయిడాకు చెందిన దీపక్ శర్మ (27) తన భార్య, కుమార్తెతో కలిసి అత్త ఊర్మిళా దేవి అంత్యక్రియలకు హాజరయ్యేందుకు గోండాకు వెళ్లాడు. కేన్సర్‌తో బాధపడుతున్న ఊర్మిళా దేవి మే 19న మరణించడంతో కుటుంబ సభ్యులు ఘాగ్రా నది ఒడ్డున అంత్యక్రియలు నిర్వహించారు.

నదిలోకి దిగగానే మొసలి దాడి

అంత్యక్రియలు ముగిసిన తర్వాత చేతులు, కాళ్లు కడుక్కోవడానికి దీపక్ నదిలోకి దిగాడు. అదే సమయంలో భారీ మొసలి ఒక్కసారిగా అతడిపై దాడి చేసింది. క్షణాల్లోనే అతడి తలను నోట పట్టుకుని నదిలోకి ఈడ్చుకెళ్లింది. కుటుంబ సభ్యులు, బంధువులు కేకలు వేసినా ఎవరూ అతడిని రక్షించలేకపోయారు.

రెండు రోజుల తర్వాత లభించిన మృతదేహం

ఘటన సమాచారం అందుకున్న వెంటనే పోలీసులు, ఎస్డీఆర్‌ఎఫ్ బృందాలు గాలింపు చర్యలు ప్రారంభించాయి. రెండు రోజుల అన్వేషణ అనంతరం మే 21న పైపు వంతెన సమీపంలో దీపక్ మృతదేహాన్ని అధికారులు గుర్తించారు. పోస్టుమార్టం అనంతరం కుటుంబ సభ్యులకు అప్పగించారు.

కుటుంబంలో తీరని విషాదం

ఒకవైపు తల్లి మరణం.. మరోవైపు భర్తను కూడా కళ్లముందే కోల్పోవడంతో ఆ మహిళ తీవ్ర విషాదంలో మునిగిపోయింది. గ్రామంలో కూడా ఈ ఘటన కలకలం రేపింది. నది ఒడ్డున అంత్యక్రియల సమయంలో జాగ్రత్తలు తీసుకోవాల్సిన అవసరంపై స్థానికులు ఆందోళన వ్యక్తం చేస్తున్నారు.