By - jyotsna |20 May 2026 12:45 PM IST

ఏఐఏడీఎంకే తిరుగుబాటు వర్గానికి నో!

తమిళనాడులో సీఎం విజయ్ నేతృత్వంలోని ప్రభుత్వం కేబినెట్ విస్తరణకు సిద్ధమవుతున్న వేళ రాజకీయంగా ఉద్రిక్త పరిస్థితులు నెలకొన్నాయి.

ముఖ్యంగా ఏఐఏడీఎంకే తిరుగుబాటు ఎమ్మెల్యేలకు మంత్రి పదవులు ఇస్తారనే ప్రచారం మిత్రపక్షాల్లో ఆందోళనకు దారితీసింది. ఈ నేపథ్యంలో విజయ్ ప్రభుత్వం స్పష్టత ఇవ్వాల్సిన పరిస్థితి ఏర్పడింది.

సీపీఎం హెచ్చరికతో అలర్ట్ అయిన ప్రభుత్వం

ఏఐఏడీఎంకే తిరుగుబాటు వర్గాన్ని ప్రభుత్వంలో చేర్చుకుంటే మద్దతు ఉపసంహరించుకుంటామని సీపీఎం బహిరంగంగా హెచ్చరించింది. డీఎంకే, ఏఐఏడీఎంకేలకు వ్యతిరేకంగా ప్రజలు ఇచ్చిన తీర్పును గౌరవించాలని, తిరుగుబాటు వర్గాలకు అధికారంలో స్థానం కల్పిస్తే నీతివంతమైన పాలన కష్టమవుతుందని అభిప్రాయపడింది. ఈ హెచ్చరికలతో రాజకీయంగా ఒత్తిడి పెరగడంతో విజయ్ సర్కార్ వెంటనే నష్టనివారణ చర్యలు ప్రారంభించింది.

'అవన్నీ కేవలం వదంతులే' : ఆధవ్ అర్జున

ఈ వివాదంపై స్పందించిన క్రీడాశాఖ మంత్రి ఆధవ్ అర్జున.. ఏఐఏడీఎంకే తిరుగుబాటు ఎమ్మెల్యేలకు మంత్రి పదవులు ఇస్తారన్న ప్రచారంలో ఎలాంటి నిజం లేదని స్పష్టం చేశారు. సీపీఎం నేతలతో ఇప్పటికే మాట్లాడామని, వారికి పూర్తి వివరణ ఇచ్చామని చెప్పారు. దీంతో ఈ వివాదానికి తెరపడినట్టేనని వ్యాఖ్యానించారు.

కేబినెట్ విస్తరణపై కీలక ప్రకటన

మిగిలిన మంత్రుల ప్రమాణ స్వీకార తేదీని ముఖ్యమంత్రి విజయ్ స్వయంగా ప్రకటిస్తారని ఆధవ్ అర్జున తెలిపారు. శాఖల కేటాయింపుకు సంబంధించిన పూర్తి జాబితాను ఇప్పటికే గవర్నర్‌కు పంపినట్లు వెల్లడించారు. అధికారిక గెజిట్ నోటిఫికేషన్ త్వరలోనే విడుదలవుతుందని, మంత్రులు బాధ్యతలు స్వీకరించినప్పటికీ శాఖల పంపిణీ ప్రక్రియ ఇంకా పూర్తికాలేదని వివరించారు.

వీసీకే నుంచి గట్టి అభ్యంతరం

తిరుగుబాటు ఏఐఏడీఎంకే ఎమ్మెల్యేలకు మంత్రి పదవులు ఇస్తారన్న వార్తలపై వీసీకే అధినేత తోల్ తిరుమావళవన్ కూడా తీవ్రంగా స్పందించారు. 'ఒకవేళ అలాంటి నిర్ణయం తీసుకుంటే కూటమికి మద్దతుపై పునరాలోచన చేయాల్సి వస్తుంది' అని హెచ్చరించారు. అయితే ప్రస్తుతం అలాంటి ఆలోచనేదీ లేదని టీవీకే నాయకత్వం తమకు హామీ ఇచ్చిందని తెలిపారు.

వామపక్షాల స్పష్టమైన వైఖరి

సీపీఐ(ఎం) సహా వామపక్ష పార్టీలు కూడా తిరుగుబాటు ఎమ్మెల్యేలతో అధికార భాగస్వామ్యానికి తాము వ్యతిరేకమని స్పష్టం చేశాయి. ఈ ఒత్తిడి కారణంగానే విజయ్ సర్కార్ వెనక్కి తగ్గినట్లు రాజకీయ వర్గాలు విశ్లేషిస్తున్నాయి.

కాంగ్రెస్‌కు క్యాబినెట్‌లో స్థానం?

టీవీకే ప్రధాన కార్యదర్శి ఆదవ్ అర్జున మరో కీలక అంశాన్ని వెల్లడించారు. తమ ప్రభుత్వానికి మద్దతుగా నిలిచిన కాంగ్రెస్ పార్టీకి కేబినెట్‌లో చోటు కల్పించాలని సీఎం విజయ్ కోరుకుంటున్నారని చెప్పారు. సామాజిక న్యాయం కోసం పోరాడే పార్టీలతో కలిసి పాలన కొనసాగించాలని టీవీకే భావిస్తున్నట్లు తెలిపారు.

వీసీకే, ఐయూఎంఎల్‌కు ఆహ్వానం

వీసీకే, ఐయూఎంఎల్ పార్టీలను అధికారికంగా మంత్రివర్గంలో చేరాలని ఆహ్వానించినట్లు ఆధవ్ అర్జున వెల్లడించారు. అయితే సిద్ధాంతపరమైన కారణాలతో బయట నుంచి మాత్రమే మద్దతు ఇస్తామన్న వామపక్షాల నిర్ణయాన్ని గౌరవిస్తున్నామని చెప్పారు.

తమిళనాడులో కొత్త రాజకీయ సమీకరణాలు