సోమవారం ఖైరతాబాద్‌లోని పంచాయతీరాజ్, గ్రామీణాభివృద్ధి శాఖ కమిషనరేట్ ఆఫీసు ఎదుట వివిధ జిల్లాల నుంచి తరలివచ్చిన ఉద్యోగులు ధర్నా నిర్వహించారు. అనంతరం గ్రామీణాభివృద్ధి శాఖ స్పెషల్ ఆఫీసర్ శ్రీలక్ష్మిని కలిసి పలు డిమాండ్లతో కూడిన వినతిపత్రాన్ని అందజేశారు.

ఈ సందర్భంగా ఉద్యోగ సంఘాల నాయకులు మాట్లాడుతూ.. కష్టపడి పనిచేస్తున్న తమకు సరైన వేతనాలు ఇవ్వకుండా, పేస్కేళ్లు అమలు చేయకుండా తీవ్ర అన్యాయం చేస్తున్నారని ఆవేదన వ్యక్తం చేశారు. మూడు నెలలుగా జీతాలు రాక కుటుంబాలు గడవక అవస్థలు పడుతున్నామని వాపోయారు.

ఎస్‌ఆర్‌డీఎస్ , వీబీ జీ రామ్‌జీ ఎఫ్‌టీఈ ఉద్యోగులకు తక్షణమే పే స్కేళ్లను అమలు చేస్తూ జీవో జారీ చేయాలని డిమాండ్ చేశారు. రెగ్యులర్ ప్రభుత్వ ఉద్యోగులతో సమానంగా ప్రతి నెలా 1వ తేదీనే వేతనాలు చెల్లించాలని కోరారు. ప్రభుత్వం ఈ నెల 15లోగా తమ డిమాండ్లను పరిష్కరించకపోతే ఉద్యమాన్ని మరింత ఉధృతం చేస్తామని హెచ్చరించారు.