Himanta Biswa Sarma: ఐఐటీ గువాహటిలో విద్యనభ్యసిస్తున్న వంద మంది ప్రతిభ గల విద్యార్థులకు రాష్ట్ర ప్రభుత్వం అండగా నిలవనుంది. వీరికి ప్రత్యేక ఉపకారవేతనాలు (స్కాలర్షిప్లు) అందజేయనున్నట్లు అసోం ముఖ్యమంత్రి హిమంత బిశ్వ శర్మ ఒక కీలక ప్రకటన చేశారు.
సంస్థ 33వ ఫౌండేషన్ డే (వ్యవస్థాపక దినోత్సవం) వేడుకలకు ఆయన ముఖ్య అతిథిగా విచ్చేశారు. ఈ సందర్భంగా ఆయన మాట్లాడుతూ.. ఈ స్కాలర్షిప్ పథకానికి సంబంధించిన పూర్తిస్థాయి కార్యాచరణను వెంటనే రూపొందించాలని ఐఐటీ డైరెక్టర్తో పాటు ఇతర ఉన్నతాధికారులను ఆయన ఆదేశించారు.
ఈశాన్య రాష్ట్రాల ఆశయాలకు ప్రతిరూపం ఐఐటీ గువాహటి
ఈ ప్రతిష్టాత్మక విద్యాసంస్థపై సీఎం ప్రశంసల జల్లు కురిపించారు. ఐఐటీ గువాహటి అనేది కేవలం విజ్ఞానాన్ని అందించే కేంద్రం మాత్రమే కాదని, అది యావత్ అసోం సహా ఈశాన్య భారత ప్రజల ఆకాంక్షలకు నిలువెత్తు సాక్ష్యమని ఆయన అభివర్ణించారు. రాష్ట్రం ఎదుర్కొంటున్న పలు క్లిష్టమైన, సాంకేతిక, అభివృద్ధి సవాళ్లకు నూతన ఆవిష్కరణల ద్వారా పరిష్కారాలను చూపే క్రమంలో ఈ సంస్థ ఎంతో ముఖ్యమైన భూమిక పోషిస్తుందని ఆయన ధీమా వ్యక్తం చేశారు.
Himanta Biswa Sarma: జీవితం ఒక పరుగు పందెం కాదు.. ఒత్తిడిని జయించాలి
ఇదే వేదికపై నుంచి విద్యార్థుల్లో ఇటీవల పెరుగుతున్న మానసిక ఒత్తిడిపై సీఎం హిమంత స్ఫూర్తిదాయకమైన సందేశం ఇచ్చారు. ప్రతి ఒక్కరి కంటే ముందుండాలని విపరీతమైన ఒత్తిడికి గురికావొద్దని, జీవితం అనేది ఒక రేసు కాదని ఆయన గుర్తుచేశారు. ఇతరుల కన్నా వేగంగా వెళ్లలేకపోయినా, తాము వెనుకబడిపోయామని ఎవరూ కుంగిపోకూడదని హితవు పలికారు. కేవలం చదువుకే పరిమితం కాకుండా, వ్యక్తిగత జీవితానికి కూడా సమాన ప్రాధాన్యం ఇస్తూ సమతుల్యతను కాపాడుకోవాలని విద్యార్థులకు ఆయన అమూల్యమైన సలహా ఇచ్చారు.
Epaper: epaper.vaartha.com