కేవలం ఫైళ్ల క్లియరెన్స్ ప్రక్రియల వల్ల అభివృద్ధి పనులకు ఎలాంటి ఆటంకం కలగకూడదని ఆయన స్పష్టం చేశారు. ఇందులో భాగంగానే, ప్రస్తుత కాలానికి అనుగుణంగా లేని, పాతబడిపోయిన ‘బిజినెస్ రూల్స్’ను పూర్తిగా సంస్కరించాలని ఉన్నతాధికారులను ఆదేశించారు. ఈ నిబంధనలను సరళతరం చేయడం కోసం తక్షణమే ఒక ప్రత్యేక కమిటీని ఏర్పాటు చేయాలని నిర్దేశించారు. సచివాలయంలోని రియల్ టైమ్ గవర్నెన్స్ సొసైటీ (RTGS) కేంద్రంలో నిర్వహించిన వివిధ ప్రభుత్వ శాఖల ఉన్నతస్థాయి సమీక్షా సమావేశంలో సీఎం ఈ వ్యాఖ్యలు చేశారు.

సాంకేతికతతో కూడిన పారదర్శక పాలన

అధికార యంత్రాంగం అంతా 'ప్రోయాక్టివ్ గవర్నెన్స్' (ముందస్తు కార్యాచరణ పాలన) అందించడంపై ప్రత్యేక శ్రద్ధ పెట్టాలని చంద్రబాబు సూచించారు. లీడర్‌షిప్ స్థానాల్లో ఉన్న ఉన్నతాధికారులు బాధ్యతాయుతంగా పనిచేసినప్పుడే ప్రభుత్వ పథకాల ఫలాలు సమాజంలో చిట్టచివరి వ్యక్తికి అందుతాయని స్పష్టం చేశారు. 2017వ సంవత్సరంతో పోల్చి చూస్తే రాష్ట్ర స్థూల ఉత్పత్తి (GSDP) 20 శాతం మేర వృద్ధిని నమోదు చేసిందని, ఈ ఆర్థిక వృద్ధి అవకాశాలను రాష్ట్ర ప్రయోజనాలకు అనుకూలంగా మార్చుకునేలా రూల్స్‌లో వెసులుబాటు తేవాలన్నారు.

Chandrababu Naidu: 21 ప్రముఖ ఆలయాలు ఇక 'గ్రోత్ సెంటర్లు'.. ఫిర్యాదుల పరిష్కారానికి క్రౌడ్ సోర్సింగ్!

దేవాదాయ శాఖ పనితీరుపై జరిగిన సమీక్షలో భాగంగా సీఎం చంద్రబాబు ఒక సరికొత్త వ్యూహాన్ని తెరపైకి తెచ్చారు. రాష్ట్రంలోని అత్యంత ప్రముఖమైన 21 దేవాలయాలను ఆర్థిక, పర్యాటక వృద్ధి కేంద్రాలుగా (Growth Centers) తీర్చిదిద్దాలని అధికారులకు సూచించారు. ఆలయాల పరిసర ప్రాంతాల్లో ఆధ్యాత్మికత ఉట్టిపడేలా చేస్తూనే, భక్తులకు అందించే ప్రసాదాల నాణ్యతను పెంచాలని ఆదేశించారు.

అలాగే, ఆర్టీసీ బస్సులు సమయపాలన పాటించేలా చూడాలని, అన్నదాతలకు ఎక్కడా యూరియా కొరత రాకుండా ముందస్తు చర్యలు చేపట్టాలని వ్యవసాయ శాఖకు స్పష్టం చేశారు. అదేవిధంగా, ప్రజా ఫిర్యాదుల స్వీకరణ మరియు వేగవంతమైన పరిష్కారం కోసం 'క్రౌడ్ సోర్సింగ్' (Crowd Sourcing) విధానాన్ని తీసుకురావాలని సీఎం ఆదేశించారు. గత ప్రభుత్వ హయాంలో రాజకీయ కక్షపూరిత చర్యల కారణంగా చాలా మంది వ్యక్తిగత భూములను చట్టవిరుద్ధంగా 22A నిషిద్ధ భూముల జాబితాలో చేర్చారని మండిపడ్డారు. ఇలాంటి వివాదాలను త్వరితగతిన పరిష్కరిస్తే రియల్ ఎస్టేట్, అభివృద్ధి రంగాలు పుంజుకుంటాయని, ఇటీవల శెట్టిపల్లి భూ వివాదాన్ని చక్కదిద్దడం ద్వారా ప్రభుత్వానికి ఏకంగా రూ.900 కోట్ల విలువైన భూమి తిరిగి లభించడమే దీనికి నిదర్శనమన్నారు. ఈ సమావేశం ముగిశాక ఆర్టీజీఎస్ ప్రచురించిన ‘గవర్నెన్స్ దట్ నెవర్ స్లీప్స్’ మ్యాగజైన్‌ను సీఎం చంద్రబాబు ఆవిష్కరించారు.

అమ్మవారికి అగ్గిపెట్టెలోపట్టే పట్టుచీర సమర్పణ