క్రీడాకారుల కష్టాన్ని గుర్తించి, వారిని అన్నివిధాలా ప్రోత్సహించడంలో తమ ప్రభుత్వం ఎప్పుడూ ముందుంటుందని ఆయన స్పష్టం చేశారు. క్రీడారంగంలో యువత మరింత ముందుకు వచ్చేలా ఈ నజరానాలు దోహదపడతాయని పేర్కొన్నారు.

విద్య రామరాజ్, విశాల్‌లకు చెరో రూ. 50 లక్షలు

ప్రఖ్యాత 4×400 మీటర్ల మిక్స్‌డ్ రిలే రేసులో భారత్‌కు రజత పతకం అందించిన జట్టులో కీలక సభ్యులుగా ఉన్న తమిళనాడు అథ్లెట్లు విద్య రామరాజ్ మరియు విశాల్‌లకు చెరో రూ. 50 లక్షల నగదు బహుమతిని ముఖ్యమంత్రి కార్యాలయం ఎక్స్ (ట్విట్టర్) వేదికగా ప్రకటించింది. తమిళనాడు స్పోర్ట్స్ డెవలప్‌మెంట్ అథారిటీ (SDAT) ఆధ్వర్యంలోని ‘ఎలైట్ స్పోర్ట్స్‌పర్సన్ స్కీమ్’ ద్వారా ఈ ఆర్థిక సాయం నేరుగా క్రీడాకారులకు అందనుంది. అంతకుముందు ఆసియా క్రీడల్లో స్వర్ణ పతకం సాధించిన భారత మహిళా క్రికెట్ జట్టు సభ్యురాలు జి. కమలినికి కూడా సీఎం విజయ్ రూ. 75 లక్షల నజరానా ప్రకటించిన విషయం తెలిసిందే.

CM Vijay: క్రీడాకారుల విజయాలపై సీఎం విజయ్ ప్రశంసలు

భారత అథ్లెట్ల విజయంపై సీఎం విజయ్ ప్రత్యేకంగా అభినందనలు తెలిపారు. నలుగురు సభ్యులున్న భారత జట్టులో ఇద్దరు తమిళనాడుకు చెందిన వారు కావడం రాష్ట్ర క్రీడా చరిత్రలో గర్వించదగ్గ విషయమన్నారు. విద్య రామరాజ్, విశాల్‌ సాధించిన ఈ ఘనత రాబోయే తరాలకు, క్రీడల్లో రాణించాలనుకునే యువతకు గొప్ప ప్రేరణగా నిలుస్తుందని ఆయన కొనియాడారు. భవిష్యత్తులోనూ వీరు మరిన్ని అంతర్జాతీయ పతకాలు సాధించి దేశ కీర్తిని మరింత ఇనుమడింపజేయాలని ఆకాంక్షించారు.

ఉత్కంఠభరితంగా సాగిన రిలే పోటీలు

4×400 మీటర్ల మిక్స్‌డ్ రిలే ఈవెంట్‌లో విద్య రామరాజ్, విశాల్‌తో పాటు మను, పూవమ్మలు ఉన్న భారత బృందం కేవలం 3:14.46 సెకన్లలోనే రేసును పూర్తి చేసి రజత పతకాన్ని సొంతం చేసుకుంది. ఈ పోటీలో బహ్రెయిన్ జట్టు 3:12.87 సెకన్ల టైమింగ్‌తో నూతన గేమ్స్ రికార్డు సృష్టించి స్వర్ణ పతకాన్ని కైవసం చేసుకుంది. కాగా, ఆసియా క్రీడల మిక్స్‌డ్ రిలే విభాగంలో భారత్ వరుసగా మూడోసారి పతకం సాధించడం విశేషం. గతంలో 2018లో స్వర్ణం, 2022లో రజతం గెలిచిన భారత అథ్లెట్లు, తాజాగా మరోసారి రజతంతో మెరిసి భారత సత్తాను చాటారు.

వీధి వ్యాపారులకు సర్కార్ అండ