Sree Charani ICC Women T20: ఆంధ్రప్రదేశ్ మట్టిలో నుంచి ఎదిగిన యువ స్పిన్ సంచలనం, టీమిండియా క్రికెటర్ నల్లపురెడ్డి శ్రీచరణి (Nallapureddy Sree Charani) అంతర్జాతీయ వేదికపై సరికొత్త రికార్డు సృష్టించింది.
ఇంటర్నేషనల్ క్రికెట్ కౌన్సిల్ (ICC) తాజాగా విడుదల చేసిన మహిళల టీ20 అంతర్జాతీయ బౌలింగ్ ర్యాంకింగ్స్లో ప్రపంచ నంబర్ వన్ (No.1 T20I Bowler) స్థానాన్ని కైవసం చేసుకుని దేశానికి, ముఖ్యంగా ఆంధ్రప్రదేశ్కు అపారమైన కీర్తిని తెచ్చిపెట్టింది. కేవలం 21 ఏళ్ల వయసున్న ఈ లెఫ్ట్ ఆర్మ్ ఆర్థడాక్స్ స్పిన్నర్ ఘనతపై ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్ (Nara Lokesh) సామాజిక మాధ్యమాల వేదికగా ప్రశంసల వర్షం కురిపించారు. చరణి పట్టుదల, కఠోర శ్రమను కొనియాడుతూ.. గతేడాది ఆమెతో జరిపిన సంభాషణలను, ఆమె పడిన కష్టాలను ఈ సందర్భంగా గుర్తుచేసుకున్నారు.
మంత్రి నారా లోకేశ్ స్ఫూర్తిదాయక సందేశం
శ్రీచరణి నంబర్ 1 ర్యాంకు సాధించడంపై మంత్రి నారా లోకేశ్ స్పందిస్తూ.. ప్రతిభ, పట్టుదలకు ఎప్పుడూ సరైన గుర్తింపు లభిస్తుందని అనడానికి చరణి విజయమే నిదర్శనమన్నారు. "కడప జిల్లాలోని ఒక సాధారణ గ్రామం (ఎర్రమల్లెపల్లె) నుంచి వచ్చి, ఎన్నో ఆర్థిక ఇబ్బందులను ఎదుర్కొని నేడు ప్రపంచ అగ్రశ్రేణి బౌలర్గా ఎదగడం ప్రతి ఒక్కరికీ స్ఫూర్తిదాయకం. గతేడాది విశాఖపట్నంలో తనతో జరిపిన చిట్-చాట్ సమయంలో క్రికెట్ కోసం తను పడ్డ తపనను స్వయంగా విన్నాను. శ్రీచరణిని చూసి ఆంధ్రప్రదేశ్ గర్విస్తోంది. భవిష్యత్తులో ఆమె మరిన్ని మైలురాళ్లు అందుకోవాలి." (గమనిక: గతేడాది భారత్ వరల్డ్ కప్ గెలిచిన తరుణంలో ఎన్డీఏ కూటమి ప్రభుత్వం తరపున అమరావతిలో శ్రీచరణిని సీఎం చంద్రబాబు, మంత్రి లోకేశ్ ఘనంగా సత్కరించి రూ. 2.5 కోట్ల భారీ బహుమతిని అందజేసిన సంగతి తెలిసిందే).
టీ20 ప్రపంచకప్లో 'చరణి' స్పిన్ మ్యాజిక్
ప్రస్తుతం జరుగుతున్న ఐసీసీ మహిళల టీ20 ప్రపంచకప్ 2026 టోర్నమెంట్లో శ్రీచరణి నిలకడగా రాణిస్తూ అత్యధిక వికెట్లు తీసిన బౌలర్గా కొనసాగుతోంది. ఈ మెగా టోర్నీలో కేవలం 3 ఇన్నింగ్స్లలోనే ఆమె 10 వికెట్లు పడగొట్టింది. లీడ్స్ వేదికగా నెదర్లాండ్స్తో జరిగిన మ్యాచ్లో కేవలం 19 పరుగులిచ్చి 4 వికెట్లు (4/19) పడగొట్టి భారత్కు అద్భుత విజయాన్ని అందించింది. ఆ తర్వాత సౌతాఫ్రికాతో జరిగిన మ్యాచ్లోనూ 3 కీలక వికెట్లు తీసి టాప్ ర్యాంకు వైపు దూసుకెళ్లింది.
Sree Charani ICC Women T20: ఇంగ్లండ్ బౌలర్లను వెనక్కి నెట్టి అగ్రస్థానానికి
ఈ తాజా ర్యాంకింగ్స్ అప్డేట్ ప్రకారం.. ఇప్పటివరకు నంబర్ వన్ స్థానంలో ఉన్న ఇంగ్లండ్ స్పిన్నర్ లిన్సే స్మిత్ (Linsey Smith) మూడో స్థానానికి పడిపోగా, ఆమె స్థానాన్ని శ్రీచరణి భర్తీ చేసింది. మరో ఇంగ్లండ్ బౌలర్ చార్లీ డీన్ (Charlie Dean) రెండో స్థానంలో నిలిచింది. కేవలం ఏడాది క్రితమే (2025లో) అంతర్జాతీయ క్రికెట్లో అరంగేట్రం చేసిన చరణి, అతి తక్కువ సమయంలోనే 'బిసిసిఐ బెస్ట్ డెబ్యూ అవార్డు'తో పాటు ఈ ఐసీసీ నంబర్ 1 కిరీటాన్ని అందుకోవడం విశేషం. ఇదే ర్యాంకింగ్స్లో బ్యాటర్ల విభాగంలో ఆస్ట్రేలియాకు చెందిన జార్జియా వోల్ (Georgia Voll), ఆల్రౌండర్ల జాబితాలో వెస్టిండీస్ కెప్టెన్ హేలీ మాథ్యూస్ (Hayley Matthews) తమ అగ్రస్థానాలను విజయవంతంగా నిలబెట్టుకున్నారు.
ఐర్లాండ్ సిరీస్కు ముందు టీమిండియాకు షాక్.. గాయంతో యువ ఆల్రౌండర్ నితీశ్ రెడ్డి దూరం!