India Map : భారతభూభాగానికి సంబంధించిన మ్యాప్ను తప్పుగా ప్రచురించిన ఖతార్కు చెందిన ప్రముఖ అంతర్జాతీయ వార్తా సంస్థ 'అల్ జజీరా' (Al Jazeera) తీరుపై కేంద్ర ప్రభుత్వం తీవ్ర ఆగ్రహం వ్యక్తం చేసింది.
ఇటీవల సింధూ జలాల ఒప్పందం (Indus Waters Treaty) పై రూపొందించిన ఒక ప్రత్యేక వార్తా కథనంలో, జమ్మూకశ్మీర్ మరియు లడఖ్లోని కొన్ని కీలక ప్రాంతాలు పాకిస్థాన్, చైనాల పాలనలో ఉన్నట్లుగా అల్ జజీరా తమ మ్యాప్లో చూపించింది. దీనిపై కేంద్ర విదేశాంగ మంత్రిత్వ శాఖ (MEA) పరిధిలోని ‘MEA ఫ్యాక్ట్ చెక్’ విభాగం తక్షణమే స్పందించింది. ఇది అత్యంత తప్పుదోవ పట్టించే చర్య అని స్పష్టం చేస్తూ, సదరు వార్తా సంస్థ ప్రసారం చేసిన మ్యాప్ లోపభూయిష్టంగా ఉందని గట్టిగా ఖండించింది.
విదేశాంగ శాఖ స్పష్టత
అల్ జజీరా చూపించిన వికృత మ్యాప్ను తీవ్రంగా తప్పుబట్టిన భారత విదేశాంగ మంత్రిత్వ శాఖ, భౌగోళిక మరియు రాజకీయ సరిహద్దులపై స్పష్టమైన వివరణ ఇచ్చింది. పూంఛ్, గిల్గిత్-బాల్టిస్తాన్ సహా జమ్మూకశ్మీర్ మరియు లడఖ్ ప్రాంతాలకు చెందిన ప్రతి అంగుళం భూభాగం భారత్లో విడదీయరాని అంతర్భాగాలని స్పష్టం చేసింది. అంతర్జాతీయ మీడియా సంస్థలు బాధ్యతాయుతంగా వ్యవహరించాలని, దేశ సార్వభౌమాధికారాన్ని మరియు భౌగోళిక సమగ్రతను దెబ్బతీసేలా తప్పుడు చిత్రణలు ప్రసారం చేయడం సరికాదని హెచ్చరించింది. భారత సార్వభౌమత్వానికి భంగం కలిగించేలా ఉన్న ఈ కథనంపై నెటిజన్ల నుంచి కూడా తీవ్ర నిరసన వ్యక్తమవుతోంది.