కేంద్ర మంత్రి బండి సంజయ్ కుమారుడు బండి భగీరథ్‌పై నమోదైన పోక్సో (POCSO) కేసుపై తెలంగాణ ముఖ్యమంత్రి రేవంత్ రెడ్డి కీలక వ్యాఖ్యలు చేశారు. ఒక మీడియా కాన్క్లేవ్‌లో పాల్గొన్న ఆయన, ఈ కేసులో ప్రభుత్వం అనుసరిస్తున్న తీరును వివరిస్తూనే, బాధ్యతాయుతమైన పదవిలో ఉన్నవారు ఎలా వ్యవహరించాలో చురకలు అంటించారు.

విచారణకు సహకరించాలని సూచన

కొడుకుపై కేసు నమోదైనంత మాత్రాన తండ్రిని అరెస్ట్ చేయాల్సిన అవసరం లేదని, అయితే బాధ్యతాయుతమైన పదవిలో ఉన్న బండి సంజయ్ హుందాగా వ్యవహరించాలని సీఎం రేవంత్ రెడ్డి సూచించారు. “తక్షణమే తన కొడుకును తీసుకుని విచారణకు రావాల్సిన బాధ్యత ఆయనపై ఉంది” అని స్పష్టం చేశారు. ఈ వివాదం కారణంగా బండి సంజయ్‌కు తలవంపులు వచ్చాయని వ్యాఖ్యానించిన సీఎం, చట్టం ఎవరికీ చుట్టం కాదని గుర్తు చేశారు. బాధితురాలికి సంబంధించిన వయస్సు ధృవీకరణ పత్రాలను ఇప్పటికే సేకరించామని, ఆధారాలు పక్కాగా దొరికితే నిందితుడు ఎవరైనా సరే కఠిన చర్యలు తీసుకుంటామని ధీమా వ్యక్తం చేశారు.

Read Also : జవహర్‌నగర్‌ దోపిడీ కేసులో పురోగతి: నేపాల్ సరిహద్దుల్లో దొరికిన ఘరానా ముఠా

కేసు నమోదులో జాప్యంపై వివరణ

ఈ కేసు నమోదులో జాప్యం జరిగిందన్న విమర్శలపై సీఎం రేవంత్ రెడ్డి గణాంకాలతో సహా వివరణ ఇచ్చారు. ఈ నెల 8వ తేదీ రాత్రి బాధితురాలి తల్లి ఫిర్యాదు చేశారని, అయితే ఇది పోక్సో చట్టానికి సంబంధించిన కేసు కావడంతో బాధితురాలి స్టేట్‌మెంట్ రికార్డ్ చేయడం అత్యంత కీలకమని ఆయన పేర్కొన్నారు. 10వ తేదీన ప్రధానమంత్రి పర్యటన ఉండటంతో పోలీస్ యంత్రాంగం భద్రతా ఏర్పాట్లలో బిజీగా ఉందని, అందుకే 11న సెక్షన్లు నమోదు చేసి నిందితుడికి నోటీసులు ఇచ్చామని వివరించారు. నిందితుడికి ప్రభుత్వం సహాయం చేయాలనుకుంటే అసలు పోక్సో వంటి కఠినమైన కేసునే నమోదు చేసేవాళ్లం కాదని ఆయన ప్రతిపక్షాలకు కౌంటర్ ఇచ్చారు.