72nd National Film Awards 2026 : కేంద్ర ప్రభుత్వం ప్రతిష్టాత్మకమైన 72వ జాతీయ చలనచిత్ర పురస్కారాలను (National Film Awards) ప్రకటించింది. 2024 సంవత్సరానికి గాను చిత్ర పరిశ్రమలో ప్రతిభ కనబరిచిన పలు చిత్రాలను, నటీనటులను ఈ అవార్డులు వరించాయి.
ఈ నేపథ్యంలో తెలుగు సినీ ప్రియులకు ఎంతో గర్వకారణంగా, టాలీవుడ్ చిన్న చిత్రం ‘కమిటీ కుర్రోళ్లు’ ఉత్తమ ప్రాంతీయ తెలుగు చిత్రంగా (Best Telugu Film) జాతీయ అవార్డును కైవసం చేసుకుంది. యదు వంశీ దర్శకత్వంలో తెరకెక్కిన ఈ సినిమా, గ్రామీణ వాతావరణం, స్నేహం, భావోద్వేగాల కలబోతగా ప్రేక్షకులను విశేషంగా ఆకట్టుకుంది. ఈ అవార్డు ప్రకటనతో చిత్ర యూనిట్ ఆనందంలో మునిగిపోవడమే కాకుండా, కంటెంట్ బాగుంటే చిన్న సినిమాలనైనా జాతీయ స్థాయి పురస్కారాలు వరిస్తాయని మరోసారి నిరూపితమైంది.
ఇతర భాషల్లో ఉత్తమ చిత్రాల హవా
ఈ 72వ జాతీయ చలనచిత్ర పురస్కారాలలో దక్షిణాదితో పాటు బాలీవుడ్ చిత్రాలు కూడా తమ ముద్రను వేసుకున్నాయి. ఉత్తమ తమిళ చిత్రంగా వైవిధ్యభరిత నటుడు ధనుష్ స్వీయ దర్శకత్వంలో నటించిన ‘రాయన్’ ఎంపికవ్వగా, మలయాళంలో ‘ఫెమినిచ్చి ఫాతిమా’ (Feminichi Fathima) ఉత్తమ చిత్రంగా నిలిచింది. అలాగే కన్నడ సినీ పరిశ్రమ నుండి ‘మిథ్యా’ సినిమా ఉత్తమ కన్నడ చిత్రంగా జాతీయ అవార్డును సొంతం చేసుకుంది. ఇక హిందీ చిత్రసీమ విషయానికి వస్తే, అంధుడైన పారిశ్రామికవేత్త శ్రీకాంత్ బొల్లా జీవిత కథ ఆధారంగా తెరకెక్కిన ‘శ్రీకాంత్’ సినిమా ఉత్తమ హిందీ చిత్రంగా ఎంపికైంది. విభిన్న కథాంశాలతో రూపొందిన ఈ చిత్రాలన్నీ జాతీయ వేదికపై ఉత్తమ పురస్కారాలను అందుకోవడం విశేషం.