లార్డ్స్ మైదానంలో జరిగిన ఈ చారిత్రాత్మక ఫైనల్ పోరులో టాస్ ఓడి మొదట బ్యాటింగ్ చేసిన భారత్.. వెస్టిండీస్ ఘోరమైన పేస్ బౌలింగ్ దాడికి తట్టుకోలేక 60 ఓవర్లలో కేవలం 183 పరుగులకే ఆలౌట్ అయ్యింది. అత్యల్ప స్కోరే అయినప్పటికీ, భారత ఆటగాళ్లు ఎక్కడా ఆత్మవిశ్వాసం కోల్పోకుండా కంగారు పడకుండా కట్టుదిట్టమైన బౌలింగ్, ఫీల్డింగ్‌తో వెస్టిండీస్ బ్యాటర్లను ఉక్కిరిబిక్కిరి చేశారు. చివరకు విండీస్ జట్టును 140 పరుగులకే కుప్పకూల్చి, 43 పరుగుల తేడాతో గెలుపొంది సరికొత్త చరిత్రను లిఖించింది.

భారత క్రికెట్ దిశను మార్చిన ఆ క్షణం

ఈ మ్యాచ్ గమనాన్ని మార్చడమే కాకుండా, టోర్నీ చరిత్రలోనే అత్యంత ఐకానిక్ మూమెంట్‌గా నిలిచింది వివ్ రిచర్డ్స్ క్యాచ్. విండీస్ సులువుగా గెలుస్తుందనుకున్న తరుణంలో, ప్రమాదకరమైన బ్యాటర్ వివ్ రిచర్డ్స్ ఇచ్చిన గాల్లోకి లేచిన బంతిని అందుకోవడానికి కెప్టెన్ కపిల్ దేవ్ వెనక్కి పరిగెడుతూ దాదాపు 20 గజాల దూరం దూసుకెళ్లి పట్టిన అద్భుత క్యాచ్ మ్యాచ్‌కే టర్నింగ్ పాయింట్‌గా నిలిచింది. ఈ ఒక్క వికెట్ పతనంతో విండీస్ పతనం ప్రారంభమైంది. అప్పటివరకు కేవలం ఒక ఆటగా మాత్రమే ఉన్న క్రికెట్.. ఈ అద్భుత విజయంతో భారతదేశంలో ఒక మతంగా రూపాంతరం చెందింది. ఈ గెలుపు ఇచ్చిన స్ఫూర్తితోనే సచిన్ టెండూల్కర్ వంటి దిగ్గజాలు బ్యాట్ పట్టారు. బీసీసీఐ (BCCI) ప్రపంచంలోనే అత్యంత సంపన్న బోర్డుగా ఎదగడానికి, గ్లోబల్ క్రికెట్‌కు భారత్ కేంద్ర బిందువుగా మారడానికి 1983 నాటి ఈ జూన్ 25 విజయమే పునాది వేసింది.