ఇండియన్ ప్రీమియర్ లీగ్ (IPL) లో రాజస్థాన్ రాయల్స్ (RR) సరికొత్త రికార్డులతో చరిత్ర సృష్టించింది. లక్నో సూపర్ జెయింట్స్ (LSG) తో జరిగిన ఉత్కంఠభరిత పోరులో అద్భుత విజయాన్ని అందుకోవడమే కాకుండా, ఐపీఎల్ చరిత్రలోనే అత్యధిక సార్లు 220 కంటే ఎక్కువ పరుగుల భారీ లక్ష్యాలను ఛేదించిన విజయవంతమైన జట్టుగా అగ్రస్థానానికి దూసుకెళ్లింది.

ఇప్పటివరకు రాజస్థాన్ రాయల్స్ ఏకంగా నాలుగు సార్లు 220+ పరుగుల టార్గెట్‌ను విజయవంతంగా ఛేజ్ చేసి ఈ ఘనత సాధించింది. ఈ జాబితాలో పంజాబ్ కింగ్స్ (PBKS), సన్‌రైజర్స్ హైదరాబాద్ (SRH) చెరి మూడు సార్లతో రెండో స్థానంలో ఉండగా, ముంబై ఇండియన్స్ (MI) రెండు సార్లు ఈ మైలురాయిని అందుకుంది. రాయల్స్ బ్యాటర్లు కనబరుస్తున్న అసాధారణ పోరాట పటిమకు ఈ రికార్డు నిదర్శనంగా నిలిచింది.

Read Also : అత్యధిక వికెట్లు తీసిన కెప్టెన్‌గా కమిన్స్‌ రికార్డు

హోంగ్రౌండ్ శాపం వీడింది.. రికార్డుల వేటలో రాయల్స్!

ఈ అద్భుత విజయంతో రాజస్థాన్ రాయల్స్ కేవలం టార్గెట్ రికార్డు మాత్రమే కాకుండా, తమ హోంగ్రౌండ్ అయిన జైపూర్ సవాయ్ మాన్‌సింగ్ స్టేడియంలో ఎదుర్కొంటున్న వరుస ఓటముల శాపానికి కూడా బ్రేక్ వేసింది. గత ఐదు మ్యాచ్‌లుగా సొంత గడ్డపై వరుసగా పరాజయాలు చవిచూసిన రాయల్స్, ఎట్టకేలకు లక్నోపై గెలిచి తమ అభిమానుల్లో ఆనందాన్ని నింపింది. ఇకపోతే, ఐపీఎల్‌లో 200 కంటే ఎక్కువ పరుగుల లక్ష్యాలను అత్యధిక సార్లు ఛేదించిన ఓవరాల్ జాబితాలో కూడా రాజస్థాన్ రాయల్స్ 7 సార్లతో టాప్ రేసులో ఉంది. ఈ 200+ ఛేజింగ్స్ జాబితాలో మాత్రం పంజాబ్ కింగ్స్ (11 సార్లు), ముంబై ఇండియన్స్ (8 సార్లు) ప్రస్తుతం రాజస్థాన్ కంటే ముందు వరుసలో ఉన్నాయి. తాజా విజయంతో లీగ్‌లో రాజస్థాన్ రాయల్స్ ప్లేఆఫ్స్ అవకాశాలను మరింత మెరుగుపరుచుకుంది.