రాయల్ ఛాలెంజర్స్ బెంగళూరు (RCB) స్టార్ బ్యాటర్, రన్ మెషీన్ విరాట్ కోహ్లి క్రికెట్ ప్రపంచంలో మరో అరుదైన మైలురాయిని అధిగమించి సరికొత్త చరిత్ర సృష్టించారు.

ఐపీఎల్ 2026 సీజన్‌లో భాగంగా పంజాబ్ కింగ్స్ (PBKS)తో జరిగిన మ్యాచ్‌లో కోహ్లి ఈ చారిత్రాత్మక ఘనతను తన పేరిట లిఖించుకున్నారు. ఈ మ్యాచ్‌లో వ్యక్తిగత స్కోరు 7 పరుగుల వద్దకు చేరగానే, ఐపీఎల్ చరిత్రలోనే ఒకే ఒక్క ఫ్రాంచైజీ (ఆర్‌సీబీ) తరఫున ఓపెనర్‌గా అత్యధికంగా 5,500 కంటే ఎక్కువ పరుగులు పూర్తి చేసిన ఏకైక బ్యాటర్‌గా విరాట్ రికార్డు సృష్టించారు. గతంలో శిఖర్ ధవన్, డేవిడ్ వార్నర్ లాంటి దిగ్గజాలు వేర్వేరు జట్లకు ప్రాతినిధ్యం వహిస్తూ ఓపెనర్‌గా ఈ రకమైన మైలురాళ్లను అందుకున్నప్పటికీ, లీగ్ ప్రారంభం నుండి ఒకే జట్టుకు ఆడుతూ ఈ ఘనత సాధించడం కేవలం కోహ్లికే చెల్లింది.

Read Also : గుజరాత్‌పై కోల్‌కతా నైట్ రైడర్స్ ఘన విజయం!

9 సీజన్లలో 500+ రన్స్.. వార్నర్, రాహుల్ రికార్డులు బ్రేక్!

ఈ మ్యాచ్‌లోనే విరాట్ కోహ్లి మరో మైండ్ బ్లోయింగ్ రికార్డ్‌ను కూడా తన ఖాతాలో వేసుకున్నారు. ఈ ప్రస్తుత సీజన్‌లో పరుగుల వరద పారిస్తున్న కింగ్ కోహ్లి 500 పరుగుల మార్కును దాటేశారు. దీనితో ఐపీఎల్ చరిత్రలో ఓవరాల్‌గా ఏకంగా 9 విభిన్న సీజన్లలో 500 కంటే ఎక్కువ పరుగులు సాధించిన ప్రపంచపు మొట్టమొదటి ఆటగాడిగా విరాట్ సరికొత్త రికార్డు నెలకొల్పారు. ఈ జాబితాలో ఇప్పటివరకు చెరో 7 సీజన్లతో ద్వితీయ స్థానాల్లో ఉన్న ఆస్ట్రేలియా స్టార్ డేవిడ్ వార్నర్, భారత బ్యాటర్ కేఎల్ రాహుల్‌లను విరాట్ చాలా వెనక్కి నెట్టేశారు. వయసు పెరుగుతున్నా తనలోని పరుగుల ఆకలి ఏమాత్రం తగ్గలేదని కోహ్లి ఈ అద్భుతమైన ఫీట్‌తో మరోసారి నిరూపించారు.