గంగూలీ జీవితం ఆధారంగా తెరకెక్కుతున్న ‘దాదా: ది సౌరవ్ గంగూలీ స్టోరీ’ బయోపిక్ ఫస్ట్ లుక్ పోస్టర్‌ను నేడు ఆయన 54వ పుట్టినరోజు సందర్భంగా విడుదల చేశారు. ఈ పోస్టర్ విడుదల తన పుట్టినరోజును మరింత ప్రత్యేకంగా మార్చిందని, ఇది తనకు లభించిన అత్యుత్తమ పుట్టినరోజు బహుమతి అని గంగూలీ సంతోషం వ్యక్తం చేశాడు. ఈ పోస్టర్‌పై స్పందించిన గంగూలీ.. “ఈ పోస్టర్ నా క్రికెట్ ప్రయాణంలోని ఒక మధురమైన జ్ఞాపకాన్ని గుర్తుచేసింది. రాజ్‌కుమార్ రావు ఈ పాత్ర కోసం ఎంతో చిత్తశుద్ధితో, నిబద్ధతతో పనిచేస్తున్నారు. ఆయనకు, చిత్ర బృందానికి నా శుభాకాంక్షలు” అని తెలిపాడు. 2027 మే 14న ఈ సినిమా థియేటర్లలోకి వచ్చినప్పుడు అభిమానులు ఆదరిస్తారని ఆశిస్తున్నట్లు పేర్కొన్నాడు.

Read Also : Sourav Ganguly biopic First Look: గూస్‌బంప్స్ తెప్పిస్తున్న సౌరవ్ గంగూలీ బయోపిక్.. 'దాదా' ఫస్ట్ లుక్ రిలీజ్

Sourav Ganguly: లార్డ్స్ బాల్కనీ సంబరాన్ని పునఃసృష్టించిన రాజ్‌కుమార్ రావు

ఈ సినిమాలో గంగూలీ పాత్రను జాతీయ అవార్డు గ్రహీత, ప్రముఖ నటుడు రాజ్‌కుమార్ రావు పోషిస్తున్నారు. ఫస్ట్ లుక్ పోస్టర్‌లో భారత క్రికెట్ చరిత్రలోని అత్యంత ఐకానిక్ క్షణాలలో ఒకటైన లార్డ్స్ బాల్కనీ సంబరాన్ని పునఃసృష్టించారు. 2002 నాట్‌వెస్ట్ ట్రోఫీ ఫైనల్‌లో భారత్ విజయం సాధించిన తర్వాత గంగూలీ చొక్కా విప్పి గిరగిరా తిప్పిన చారిత్రక దృశ్యాన్ని ఈ పోస్టర్‌లో రాజ్‌కుమార్ రావు ఆవిష్కరించారు. వెనుక భారత త్రివర్ణ పతాకం రెపరెపలాడుతుండగా, చొక్కా లేకుండా బాల్కనీలో నిలబడిన రాజ్‌కుమార్ రావు లుక్ అభిమానులను ఆకట్టుకుంటుోంది.

భారత క్రికెట్‌ను మలుపు తిప్పిన అగ్రెసివ్ కెప్టెన్సీ

భారత క్రికెట్‌లో సౌరవ్ గంగూలీ అత్యంత ప్రభావవంతమైన కెప్టెన్లలో ఒకరిగా నిలిచాడు. 2000వ దశకం ప్రారంభంలో తన దూకుడైన నాయకత్వ శైలితో జట్టులో కొత్త ఉత్సాహాన్ని నింపాడు. ఆస్ట్రేలియా 15 వరుస టెస్ట్ విజయాల జైత్రయాత్రకు బ్రేక్ వేసి, 2001లో స్వదేశంలో 2-1 తేడాతో సిరీస్ గెలవడంలో కీలక పాత్ర పోషించాడు. గంగూలీ కెప్టెన్సీలోనే భారత్ విదేశీ గడ్డపై 2004లో పాకిస్థాన్‌లో చారిత్రక టెస్ట్ సిరీస్ విజయం, 2003-04లో ఆస్ట్రేలియాలో సిరీస్ డ్రా చేసుకోవడం వంటి చిరస్మరణీయ విజయాలు సాధించింది. అలాగే, 2003 ఐసీసీ ప్రపంచకప్ ఫైనల్‌కు జట్టును నడిపించాడు. ఇప్పుడు దాదా కెరీర్‌లోని ఆ చారిత్రక ఘట్టాలు వెండితెరపైకి రానుండటంతో అభిమానుల్లో ఉత్కంఠ నెలకొంది.

The first video song from 'Toxic' has been released.

జనసేన పార్టీలో చేరిన సింగర్ శ్రీలలిత భర్త సీతారామ్