దేశవ్యాప్తంగా ఐదు రాష్ట్రాల అసెంబ్లీ ఎన్నికల ఫలితాల కౌంటింగ్‌కు సర్వం సిద్ధమైంది. రేపు ఉదయం వెలువడనున్న ఈ తీర్పు ఐదు రాష్ట్రాల రాజకీయ భవిష్యత్తును నిర్ణయించనుంది.

తమిళనాడు, కేరళ, పశ్చిమ బెంగాల్, అస్సాం మరియు పుదుచ్చేరి రాష్ట్రాల్లో జరిగిన అసెంబ్లీ ఎన్నికల ఫలితాలు రేపు (మే 4, 2026) వెలువడనున్నాయి. ఉదయం 8 గంటల నుంచి ఓట్ల లెక్కింపు ప్రారంభం కానుంది. దాదాపు నెల రోజుల పాటు సాగిన సుదీర్ఘ ఎన్నికల ప్రక్రియ తర్వాత, ప్రజల తీర్పు ఈవీఎంల నుంచి బయటకు రానుంది. ఈ ఫలితాలు కేవలం ఆయా రాష్ట్రాలకే పరిమితం కాకుండా, దేశ రాజకీయ ముఖచిత్రాన్ని ప్రభావితం చేసే అవకాశం ఉండటంతో సర్వత్రా ఆసక్తి నెలకొంది. ఎన్నికల కమిషన్ ఇప్పటికే అన్ని కౌంటింగ్ కేంద్రాల వద్ద భారీ భద్రతను ఏర్పాటు చేసింది.

Read Also : ఫాల్టా అసెంబ్లీ నియోజకవర్గంలో రీపోలింగ్: ఈసీ నిర్ణయంపై టీఎంసీ ఆగ్రహం

ఎగ్జిట్ పోల్స్ అంచనాలు: తమిళనాడులో ‘విజయ్’ మాయ?

ఎగ్జిట్ పోల్స్ అంచనాలు ఈసారి రాజకీయ విశ్లేషకులను సైతం ఆశ్చర్యానికి గురిచేస్తున్నాయి. ముఖ్యంగా తమిళనాడులో నటుడు విజయ్ స్థాపించిన తమిళగ వెట్రి కళగం (TVK) సంచలనం సృష్టించవచ్చని కొన్ని సర్వేలు పేర్కొంటున్నాయి. డీఎంకే-ఏఐఏడీఎంకేల మధ్య సాగే ద్రవిడ పోరులోకి విజయ్ ఎంట్రీ ఇవ్వడం, యువత మద్దతు ఎక్కువగా ఉండటంతో ఫలితాలు ఎలా ఉంటాయోనని ఉత్కంఠ నెలకొంది. మరోవైపు పశ్చిమ బెంగాల్‌లో మమతా బెనర్జీ నేతృత్వంలోని టీఎంసీ మరియు బీజేపీ మధ్య పోరు నువ్వా-నేనా అన్నట్లుగా సాగింది. బెంగాల్ ఓటర్లు మళ్లీ ‘దీదీ’కే పట్టం కడతారా లేక కమలం వికసిస్తుందా అనేది రేపు తేలనుంది.