ఈడీ దాడులు: భయంతో తొమ్మిదో అంతస్తు నుంచి నోట్ల బ్యాగుల విసిరివేత

పంజాబ్ మరియు చండీగఢ్‌లో రియల్ ఎస్టేట్ అక్రమాలకు సంబంధించి ఎన్‌ఫోర్స్‌మెంట్ డైరెక్టరేట్ (ED) చేపట్టిన సోదాలు సినిమా ఫక్కీలో సాగాయి. మొహాలీ డెవలప్‌మెంట్ అథారిటీ (GMADA)లో భూ వినియోగ అనుమతుల అక్రమాల కేసులో ఈ దాడులు జరిగాయి.

దీనికి సంబంధించిన కీలక అంశాలు. మొహాలీలోని ఖరార్ ప్రాంతంలో ఉన్న ఒక అపార్ట్‌మెంట్‌పై ఈడీ అధికారులు దాడి చేయగానే, లోపల ఉన్న వ్యక్తులు భయంతో రెండు పెద్ద బ్యాగులను కిటికీలోంచి కిందకు విసిరేశారు. ఆ బ్యాగుల్లో రూ.500 నోట్ల కట్టలు ఉన్నట్లు స్థానికులు గుర్తించారు.

Enforcement Directorate

Enforcement Directorate: ముందే సిద్ధమైన డ్రైవర్

ఆ బ్యాగులు కింద పడగానే, అక్కడే వేచి ఉన్న ఒక కారు డ్రైవర్ వేగంగా వాటిని తన వాహనంలో వేసుకుని అక్కడి నుండి మాయమయ్యాడు. ఇదంతా పక్కా ప్లాన్ ప్రకారం జరిగినట్లు అధికారులు భావిస్తున్నారు. పంజాబ్ సీఎం భగవంత్ మాన్ ఓఎస్డీ (OSD) రజబీర్ ఘుమాన్‌తో సంబంధాలు ఉన్నాయనే ఆరోపణలు ఎదుర్కొంటున్న నితిన్ గోయల్ అనే వ్యక్తిని లక్ష్యంగా చేసుకుని ఈ దాడులు నిర్వహించినట్లు సమాచారం. నోట్ల బ్యాగులను విసిరేయడం, డ్రైవర్ వాటిని తీసుకెళ్లడం వంటి దృశ్యాలు సోషల్ మీడియాలో వైరల్ అయ్యాయి. దీనిపై పోలీసులు సీసీటీవీ ఫుటేజీని సేకరించి దర్యాప్తును వేగవంతం చేశారు. కేవలం మొహాలీలోనే కాకుండా, చండీగఢ్‌లోని పలువురు బిల్డర్లు, రియల్ ఎస్టేట్ దిగ్గజాల ఇళ్లలో కూడా ఈడీ అధికారులు ఏకకాలంలో తనిఖీలు చేపట్టారు.